Урысые Федерацием и Президентэу Владимир Путиным пшъэрылъ къызэрафишIыгъэу, партиеу «Единэ Россиер» IэпыIэгъу къафэхъузэ, къуаджэхэм адэт почтэхэр джырэ шапхъэхэм адиштэу зэтырагъэпсыхьэхэу зырагъэжьагъэр 2022-рэ илъэсыр ары.

Почтэ 18-у республикэм щагъэцэкIэжьыгъэхэм Пэнэжьыкъуае дэтыри ащыщ. Ащ илъэсишъэ ыныбжьыми умышIэжьынэу, непэрэ уахътэм диштэу ашIыжьыгъ.
Дунэе хъытыум иамал зэфэшъхьафхэр цIыфхэм нахь агъэфедэми, почтэм имэхьанэ къеIыхырэп. Урысыем и Почтэ икъутамэу Пэнэжьыкъуае дэтым ипшъэ­рылъхэр зэригъэцакIэрэм тыщигъэгъозагъ ащ ипащэу ЛIыхъурэе Светланэ.
Ар зипэщэ коллективыр пстэумкIи нэбгыри 8 зэрэхъурэр: 6-р — почтальоных, 1-р — оператор, ежь пащэр. Iоф­шIэпIэ чIыпIэр коллективымкIэ унагъом фэд, зэдеIэжьых, зэгурэIох, зэфэсакъы­жьых. КъяуалIэхэрэм Iэдэб ахэлъэу апэгъокIых, ащ фэдэу ежь цIыфхэри къафыщытых.
Почтэм Iоф щыпшIэныр къызэрыкIоу щытэп, ащ кIуачIи акъыли ищыкIагъ. Ахэм мафэ къэс чылэдэсхэр къафэкIох, яфэIо-фашIэхэр афагъэцакIэх: посылкэхэр, бандерольхэр, ахъщэр зыфэе чIыпIэу къаIорэм афатIупщых. Коммунальнэ фэIо-фашIэхэм ауасэ, хэбзэIахьхэр, тазырхэр, кредитхэр бэмэ почтэм щаты. Гъэзет ыкIи журнал зэфэшъхьафыбэ къафэкIо, ахэр цIыфхэм ащэфых, акIэтхэх. Лотереехэм ящэни яIофшIэн щыщ, страховкэхэм ягъэхьазырынкIи закъыфэзыгъэзэрэ цIыфхэм адэIэ-
пыIэх.

— Типочтальонхэм нэжъ-Iужъ 600 фэдизмэ япенсиехэр аIэкIагъахьэ. ТиIоф­шIэн лъэныкъо пчъагъэу зэтеутыгъ. Ащ къыдыхэлъытагъэу гъомылэпхъэ зэфэшъхьафхэр, IэшIу-IушIу гъэпкIагъэхэр, зэрыгыкIэхэрэ порошокхэр, сабынхэр, цэлъэкIхэр, шампуньхэр тщэнхэ фае, ащкIэ план гъэнэфагъэ тиI, республикэм игъэзетхэм якIэтхэгъу уахъти макIо. Пэнэжьыкъое къоджэ псэупIэм Iоф щызышIэрэ организацие пэпчъ «Адыгэ макъэр» къыретхыкIы. НахьыжъыIохэр зэрыс унагъохэм хабзэ зэрафэхъугъэу, лъэпкъ гъэзетым кIатхэх. Адыгэ пэпчъ лъэпкъ къэбархэр шIогъэшIэгъонын фае. Джы интернетым ишIуа­гъэкIэ гъэзетым итхыгъэхэм ныбжьыкIэхэр ащыгъуазэх. Илъэсишъэ зыныбжь гъэзетыр лъэпкъым ишIэжь, ар къэтыухъумэным фэшI цIыфыбэ кIэдгъэтхэнэу тыкъыфэджэ, — еIо Светланэ.
— ЦIыфхэм ащыщхэм гъэзетхэм яуахътэ икIыгъэу, зэкIэ непэ интернетым ибгъотэщтэу алъытэ. Ау ахэм сэ адезыгъаштэрэп, сыда пIомэ гъэзетыр IэпыIэгъу псынкIэм фэд. Адыгэ Республикэм къихъухьэрэр зэкIэ псынкIэу къыплъыIэсынымкIэ ащ ишIогъэшхо къэкIо, уинэIуасэхэм, къыппэблагъэхэм ягъэхъагъэхэм афэгъэхьыгъэхэр ыкIи нэмыкI гъэшIэгъоныбэ «Адыгэ макъэм» инэкIубгъохэм арыбгъотэщт, — еIо къоджэдэсэу Iэшъынэ Аминэт.
ЦIыфхэм яшIуагъэ арагъэкIыныр ары Пэнэжьыкъое почтэм иIофышIэхэм пшъэрылъ шъхьаIэу яIэр ыкIи ар къа­дэхъу.
Сурэтхэр: Iэшъынэ Аслъан.