Лъэпкъ зыкIыныгъэм и Мафэ фэгъэхьыгъэ Iофтхьабзэхэр Адыгеим ичIыпIэ зэфэшъхьафхэм ащызэхащагъэх.

«Лъэпкъхэр бэ мэхъух, Родинэр зы!» зыцIэ Iофтхьабзэу «Искусствэхэм ячэщ» къыдыхэ­лъытагъэр АР-м икIэлэцIыкIу тхылъеджапIэ щыкIуагъ.
МэфэкI Iофтхьабзэр тхылъеджапIэм ипчъэIупэ щаублагъ. Къэгъэлъэгъон гъэшIэгъонхэр, джэгукIэ зэфэшъхьафхэр зэхэщакIохэм агъэ­хьазырыгъэх. Орэд чэфхэмрэ лъэпкъ къашъохэмрэ къыщашIыгъ.
— Урысыер шIу зылъэгъоу, ащ рыгушхорэ пстэуми мыр ямэфэкI. Урысыем ибаиныгъэ шъхьаIэр ащ щыпсэурэ лъэпкъ­хэр ары. ЦIыф лъэпкъ зэфэшъхьафхэм къахэкIыгъэхэм язэфыщытыкIэхэр кIэлэцIыкIухэм агурыгъэIогъэн фае. Хэгъэгур шIу алъэгъоу тпIунхэр типшъэрылъ шъхьаIэу, Iофтхьабзэ зэфэшъхьафхэр титхылъеджапIэ щызэхэтэщэ. «ТкIуачIэр — тизыкIыныгъ» зыфиIорэ джэпсалъэр непэ тиIофтхьэбзэ пхырыщыгъ, — къаIуагъ кIэлэцIыкIу тхылъеджапIэм иIофышIэхэм.
Лъэпкъ музыкальнэ Iэмэ-псымэхэми нэIуасэ афашIыгъэх, шыкIэпщынэмрэ пхъэкIычымрэ кIэлэцIыкIухэм лъэшэу ашIогъэшIэгъоныгъ. ИскусствэхэмкIэ кIэлэцIыкIу еджапIэу Лъэцэрыкъо Кимэ ыцIэ зыхьырэм иеджакIохэм мэфэкIыр къагъэдэхагъ, ­лъэпкъ къэшъо дахэхэр къа­шIыгъ. ШъхьапцIэжъыкъо Самирэ — шыкIэпщынэм, Къэлэшъэо ТIахьир пщынэм мэкъамэхэр къарагъэIуагъ. Къэ­лэшъэо Аидэ ригъэджэрэ кIэ­лэеджакIохэм хэгъэгум фэгъэхьыгъэ усэхэр къаIуагъ.

— Непэ дунаир тыдэрэ чIыналъи щыпхъапхъ, пщэнэу ыкIи пщэфынэу щымыт мамыр­ныгъэр ухъумэгъэн зэрэфаер мы сыхьат еджэнымкIэ ныбжьыкIэхэм къафэтIотагъ, лъэпкъ­хэм языкIыныгъэ имэхьанэ къэдгъэлъэгъуагъ, — къыIуагъ тхылъеджапIэм иIофышIэу Жарэкъо Мариет.
АР-м культурэмкIэ изаслуженнэ IофышIэу Галина Лодяновам театрэм фэгъэхьыгъэ сыхьат егъэджэн зэхищагъ. Ащ ыгъэуцугъэ къэгъэлъэгъон кIэкIым кIэлэцIыкIухэр хэлэжьагъэх. Пкъыгъо гъэшIэ­гъонхэр зыщашIыгъэ Iофтхьаб­зэу «Пхъуантэ хьалэмэт», «Матэм ишIын» зыфиIохэрэр гъэшIэгъоныгъэх. Лъэпкъ тхыпхъэ дахэхэу ныбжьыкIэмэ аIэкIэ ашIыгъэхэр шIухьафтынэу аратыжьыгъэх.
ТхылъеджапIэм лIэужыкIэм ипIун чанэу Iоф дешIэ. «Родинэр — зы, ар Ным ычIыпI!» зыфиIорэ гупшысэ куур кIагъэ­тхъэу, Iофыгъуабэ зэшIуахы,
НэкIубгъор
зыгъэхьазэрыгъэр
Лъэпшъыкъо Фатим.
Сурэтхэр авторым иех.