Лъытэныгъэр унагъом ылъачI
Адыгеим и Джэджэ район щыпсэухэрэ Колесников зэшъхьэгъусэхэу Светланэрэ Викторрэ Урысые зэнэкъокъоу «Илъэсым иунагъу» зыцIэм хэлэжьагъэх ыкIи «Унагъор — шэн-хабзэхэм яухъумакIу» зыфиIорэ лъэныкъомкIэ текIоныгъэр къыдахыгъ. Унагъом тэри зыIудгъэкIагъ.
Светланэрэ Викторрэ Адыгэ къэралыгъо университетым чIэхьанхэу ушэтынхэр атыхэзэ ащ щызэIукIагъэх. НыбжьыкIитIур нэужым нахь нэIуасэ, зэпэблагъэ зэфэхъугъэх. Мары илъэс 32-рэ зикIыхьэгъэ щыIэныгъэ гъогу къызэдакIугъ.
Колесниковхэм ялIакъокIэ ятарихъ ухаплъэмэ, илъэси 100-м ехъугъэу кIэлэегъэджэ сэнэхьатым рэлажьэх. Виктор ОБЖ-мкIэ ыкIи физическэ культурэмкIэ регъаджэх, Светланэ химиемрэ биологиемрэкIэ кIэлэегъадж.
Зэшъхьэгъусэхэм япшъашъэу Аринэ илъэс 21-рэ ыныбжь, янэрэ ятэрэ ягъогу къыхихыгъ, Адыгэ къэралыгъо университетым естествознаниемкIэ ифакультет щеджэ. Аринэ дышъэ медалькIэ еджапIэр къыухыгъ, сэнаущыгъэ зыхэлъ ныбжьыкIэхэм IэпыIэгъу ятыгъэнымкIэ Адыгэ Республикэм истипендие, муниципальнэ программэу «Гъэсэныгъэм хэхъоныгъэ егъэшIыгъэныр» зыфиIорэ лъэныкъомкIи стипендие къыраты. 2020-рэ илъэсым Урысые зэнэкъокъоу «Большая перемена» зыцIэм текIоныгъэ къыщыдихыгъ.
Светланэ игукъэкIкIэ унэгъо мин 11-м ехъу зыхэлэжьэгъэ зэнэкъокъум зыщаушэтыгъ. Унэгъо 388-у шъолъырхэм ащытекIуагъэхэр къыхахыгъэх.
Iофтхьабзэм изыфэгъэхьазырын фэгъэхьыгъэу Светланэ къытфиIотагъ.
— Мазэм къыкIоцI зыдгъэхьазырыгъ, видеоролик тетхыгъ, нэпэеплъ сурэтхэр зэхэдгъэуцуагъэх, ищыкIэгъэ тхьапэхэр тыугъоигъэх, — къеIуатэ тидэгущыIэгъу.
Унагъом ишэн-хабзэхэм афэгъэхьыгъэ упчIэм джэуап гъэшIэгъон къыритыжьыгъ.
— Унэгъо зэфыщытыкIэхэр гъэпытэгъэнхэм, шэн-хэбзэ зэхэтыкIэхэм ямэхьанэ зэрэиныр тиунагъокIэ къыдгурэIо. Тинахьыжъ тэгъэлъапIэ, зэгурыIоныгъэ тиунагъо илъынэу ныбжьыкIэхэр тэпIух, пщэрыхьаным ишъэфхэр лIэужым етэгъашIэ. Сыд фэдэ мэфэкI тиIэми, Аринэ янэжъ-ятэжъхэм шIухьафтын афешIы. Тигъэпсэфыгъо лъэхъан, хабзэ зэрытфэхъугъэу, зекIо тэкIо, къушъхьэр, хыр тикIас ыкIи Урысыем ичIыпIэ дахэхэр зэтэгъэлъэгъух, — къыIуагъ Светланэ.
Унагъом ишъэфхэми ягугъу тидэгущыIэгъу къытфишIыгъ.
— Тиунагъо ащ фэдиз шъэфышхо иIэп. Унагъом ишIэн мафэ къэс узыдэлэжьэн фае IофшIэнышху. ШIулъэгъур, цыхьэ зэфэшIыныр, зэгурыIоныгъэр, узэфэгумэкIыныр тиунагъо ишапхъэх. Джары зэкIэмкIи тишъэфхэр. Тянэрэ тятэрэ ашIэрэм тыкIырыплъызэ тыкъэтэджыгъ. Iофым тызэрипсыхьагъэм лъэшэу ишIуагъэ къытэкIыжьыгъ. Къиныгъохэм уащымыщынэнэу, узышъхьамысыжьынэу, епхьыжьагъэр ыкIэм нэбгъэсынэу IофшIэным уегъасэ. Сятэ Iофыр ныкъуашIэу ныбжьи къыгъэнагъэп, тэри ащ тыфигъэсагъ. ШIэныгъэ зэфэшъхьафхэр зэдгъэгъотынхэр, цIыф Iушмэ такIырыплъыныр тиунагъо ишэн.
Тым чIыпIэ ин унагъом зэрэщиубытырэр бзылъфыгъэм игущыIэхэм къахэщыгъ.
— Виктор унагъом ышъхь, игущыIэ пытэ тырэгъуазэ. Сабыим ипIункIэ, унагъомкIэ тым имэхьанэ лъэгапIэм ибгъэуцоныр тэрэзэу сэлъытэ. СыдигъокIи типшъашъэ тыр ищысэтехыпIэным сыпылъ. Iофтхьабзэу тызхэлэжьагъэм тиунагъо илъ хэбзэ-зэхэтыкIэхэр нахь ыгъэпытагъэх, — къыIуагъ Светланэ.
Виктор ОБЖ-мкIэ ыкIи физическэ культурэмкIэ зэрэригъаджэхэрэм нэмыкIэу, дзэ къулыкъум дащыщтхэм ягъэхьазырынкIэ Джэджэ районым щызэхэщэгъэ гупчэу «Рубеж» зыфиIорэм пэщэныгъэ дызэрехьэ, юнармейскэ отрядэу «Бгъашхъоми» ипащ. Унагъом исхэр юнармейцэхэм ягъусэхэу Iофтхьэбзэ зэфэшъхьафхэм ахегъэлажьэх, хэушъхьафыкIыгъэ дзэ операцием щыIэхэм апае зыгъэбылъхэрэ хъытыухэр аблэх, тидзэкIолIхэм дэтIыкIыгъэ чIыпIэхэм ащагъэфедэщт шэф остыгъэхэри ашIых.
УнагъомкIэ ты пхъашэмэ Виктор теупчIыгъ.
— СигущыIэ мэхьанэ иIэным, шъхьэкIэфэныгъэрэ лъытэныгъэрэ зэфэтшIыжьэу тыпсэуным сыпылъ. Лъытэныгъэр, ар унагъом ылъачI. Ным унагъомкIэ ыпшъэ ифэрэ IофшIэныр нахьыбэми, тыр ащ ыуж къимынэу къысщэхъу. Сишъхьэгъусэрэ сипшъашъэрэ сырякъогъукъотыным сыпылъ. Сыд фэдэу зызгъэпхъэшагъэми, шъхьэгъусэмрэ пшъашъэмрэ ялъэIу сымыгъэцэкIэн слъэкIырэп. (мэщхы Виктор).
Урысые Iэнэ хъураеу «Кузница профессионалов» зыфиIорэм зэшъхьэгъусэ Колесниковхэр рагъэблэгъагъэх. Ар Урысыем изэнэкъокъоу «Илъэсым иунагъу» зыфиIорэм къыдыхэлъытагъэу, зиIофшIэн хэшIыкI ин фызиIэ специалист дэгъухэм афэгъэхьыгъ. Iофтхьабзэм игъэкIотыгъэу Светланэрэ Викторрэ зыфагъэхьазыры.