Белгород дэт дзэ госпиталым чIэлъ дзэкъулыкъушIэхэм апае гуфэкIо купэу «Сбор нашим.Май­коп» зыфиIорэм шIу­шIэ IэпыIэгъу ­ыугъоигъ. ДзэкIолIхэм ящыкIагъэхэм якъэщэфын, посылкэхэм язэ­дэлъхьан ыуж итыгъэх Адыгеим икъэзэкъ ныбжьыкIэхэм я Союз.

ЗэIэзэхэрэ дзэкъулыкъушIэ­хэм афащагъэх гъомылапхъэхэр, Iэзэгъу уцхэр, бэщхэр, чIэгъ-чIэлъхэр, телефонхэр, зэ­рэтхьакIэхэрэр ыкIи зызэра­тхьакIыхэрэр, зашъохэрэ псыр, щыгъын фабэхэр, IэшIу-IушIухэр. Адыгеим икъэзэкъ ныбжьыкIэ­хэм я Союз итхьаматэу Екатерина Даниловар, Мыекъопэ район къэзэкъ отделым хэтэу Александр Даниловыр хэушъхьа­фыкIыгъэ дзэ операцием хэла­жьэхэрэм адэжь щыIагъэх ыкIи шIушIэ IэпыIэгъоу афащагъэхэм ягъусэу шIухьафтынэу кIэлэ­цIыкIу сурэтшIыгъэхэмрэ письмэ­хэмрэ аратыжьыгъэх.
ШIушIэ IэпыIэгъур нагъэсыным кIэщакIо фэхъугъ станицэу Донскоим (къалэу Старый Оскол) икъэзэкъ обществэ иатаман игуадзэу Алексей Голдаевыр, зыдэщыIэщтхэ чIыпIэр къафигъэпсыгъ Белгород иныбжьыкIэхэм Iоф адэшIэгъэнымкIэ атаманым игуадзэу Сергей Гринько.
Адыгеим ращыгъэ шIушIэ IэпыIэгъум изы Iахь къэзэкъ штурмовой батальонэу «Таврида» зыфиIорэм иотряд фащагъ. АщкIэ Белгород дэт чылысым идинлэжьэу Василий ишIуагъэ къаригъэкIыгъ. Джащ фэдэу зэшъхьэгъусэ Даниловхэр зыухъумэхэрэ хъытыухэр чылысым щызыблэрэ гуфакIохэм аIукIагъэх.

ШIушIэ IэпыIэгъум иугъоин къыхэлэжьэгъэ пстэуми та­фэраз: Пшызэ къэзэкъ гупчэу «Баско», тучанэу «Сладкоежка» зыфиIорэр зие унэе предпринимателэу Владимир Демиденкэр, ООО-у Мыекъопэ пи­вэшI заводым ипащэу Юрий Горносталевыр, Мыекъопэ кIэлэцIыкIу IыгъыпIэу N55-р, поселкэу Победэм игурыт еджапIэу N4-м иIофышIэхэр ыкIи щеджэхэрэм янэ-ятэхэр, мэкъу­мэщ предприятиеу «Аракс» ипащэу Андрей Буш, Адыгэ ыкIи Мыекъопэ епархиехэм ядинлэжьхэр, нэмыкIхэри.
— ХэушъхьафыкIыгъэ дзэ операцием хэлажьэхэрэм, гос­питальхэм зыщяIазэхэрэм Iэпы­Iэгъу тафэхъуныр, тызэракъотыр зэхядгъэшIэным епхыгъэ Iоф­тхьабзэр лъытэгъэкIуатэ. Ар ти­пшъэрылъ шъхьаIэхэм ащыщэу тэлъытэ. ТиухъумакIохэр псын­кIэу алъэ къытеуцожьынхэм ар фэIорышIэ. Адыгеим ыкIи Краснодар краим ащы­псэурэ цIыфхэу тидзэкIолIхэм янеущрэ мафэ къырыкIощтым ыгъэгумэкIырэ пстэури шIушIэ Iофтхьабзэм къыхэлэжьагъэх, ащкIэ «тхьа­шъуегъэпсэу» ятэIо. Тызэкъотмэ — ткIуачIэ лъэ­шыщт, а кIуа­чIэм къытекIо­шъущтхэп, ТекIоныгъэр тиещт! — къыIуагъ Александр Даниловым.
Екатерина Данилова.