Зэхэпхъэгъэ бэнэнымкIэ (ММА) Адыгеим и ЛIы­шъхьэ и Кубок икъыдэхын фэгъэхьыгъэ зэнэкъокъум спортсмен 200-м ехъу ­хэлэжьагъ. Iофтхьабзэр спорт комплексэу «Ошъутенэм» щыкIуагъ.

Адыгеим, Дагъыстаным, Къэ­рэщэе-Черкесым, Къэбэртэе-­Бэлъкъарым, Къырым, Чэчэным, Краснодар ыкIи Ставрополь крайхэм, Волгоград ыкIи Ростов хэкухэм къарыкIыгъэ ныбжьыкIэ­хэу 2007 — 2008-рэ, 2009 — 2010-рэ, 2011 — 2012-рэ илъэс­хэм къэхъугъэхэм заушэ­тыгъ.
Адыгеир зэнэкъокъум къыщызыгъэлъэгъуагъэхэр Мыекъуапэ, псэупIэу Яблоновскэм ыкIи Краснодар ащыIэ клуб зэфэшъхьафхэм ялIыкIохэр ары.
Адыгеим и ЛIышъхьэу КъумпIыл Мурат ыцIэкIэ республикэм къыщызэрэугъоигъэ спортсменхэм шIуфэс гущыIэхэмкIэ закъыфигъэ­загъ АР-м и Къэралыгъо Со­вет — Хасэм и Тхьаматэ игуа­дзэу, Урысыем и ЛIыхъужъэу Цэй Эдуард.
— Мыщ фэдэ зэнэкъокъу апэрэу Адыгеим щызэхащэ, ау тицыхьэ телъ тапэкIи ар зэрэ­лъагъэкIотэщтым. Республикэм спортыр шIу щалъэгъу, шъолъырым щыпсэухэрэм азыныкъо нахьыбэр ащ пыщагъ, ахэм язы Iахьышхо кIэлэцIыкIух ыкIи ныбжьыкIэх. Спорт лъэпкъ зэфэшъхьафхэм зафэзыгъасэхэрэм япчъагъэ хэгъэхъогъэнымкIэ, мыщ фэдэ мэхьанэшхо зиIэ зэнэкъо­къухэр нахьыбэу зэхэщэгъэнхэмкIэ республикэм бэ щызэшIуахырэр. УФ-м спортымкIэ и Ми­нистерствэ IэпыIэгъу къытфэхъузэ къэралыгъом испорт федерациехэм зэпхыныгъэу адытиIэр тэгъэ­пытэ, — къыIуагъ Цэй Эдуард.
Мыщ ыуж финали 9 щыIагъ. Мы пчыхьэм октагоным къихьагъэхэм Адыгеим щыщ нэбгы-
ритIу ахэтыгъ — Мыекъуапэ щыщ Дмит­рий Петрушинымрэ псэупIэу Яблоновскэм илIыкIоу Хъут Дауррэ. Тиспортсменхэм текIоныгъэр къыдахын алъэкIыгъэп, ау клубэу «Нартым» хэт Гиви Беридзе тигъэгушIуагъ, ар Абдул-Халим Мусихановым текIуагъ. Къы­рым испортсменхэм тфэгъогогъо апэрэ чIыпIэр къахьыгъ.