Мыекъуапэ щызэхащагъ
ХоккеимкIэ Къыблэ ыкIи Темыр-Кавказ федеральнэ шъолъырхэм япервенствэ Мыекъуапэ щыкIуагъ. Мэфитфым къыкIоцI 2013-рэ илъэсым къэхъугъэхэр ыкIи ахэм анахьыкIэхэр зыщызэхаугъоегъэхэ командэхэр зэнэкъокъугъэх.
Адыгеир турнирым къыщызыгъэлъэгъуагъэр республикэ спорт еджапIэу N 3-м зыщызыгъасэхэрэр зыхэхьэгъэхэ командэу «Щагъдый» зыфиIорэр ары.
Зэнэкъокъум иятIонэрэ едзыгъо хэлэжьэнхэмкIэ зы путевкэу щыIэм командэхэр фэбэнагъэх. Мыекъуапэ илIыкIохэм дэгъоу зыкъагъэлъэгъуагъ, акIуачIэ рахьылIэзэ джэгугъэх, ау яплIэнэрэ чIыпIэр ары ныIэп къыдахын алъэкIыгъэр. Тикомандэ буллитхэмкIэ зытекIуагъэр къалэу Симферополь къикIыгъэ «Легионыр» ары.
Волгоград кIымэфэ спорт лъэпкъхэмкIэ испорт еджапIэ текIоныгъэр фагъэшъошагъ, Симферополь икомандэу «Наследиер» ятIонэрэ хъугъэ, Ростов-на-Дону къэзыгъэлъэгъогъэ олимпийскэ резервымкIэ спорт еджапIэу N 6-м ящэнэрэ чIыпIэр къыдихыгъ.