Кавказ биосфернэ заповедникым гъэмэфэ дэкIыгъохэм ялъэхъан ыухыгъ. Мэфэ заулэ зыхьырэ гъогууанэхэр зыпхырыкIырэ лъагъохэр зэфишIыжьыгъэх.

Ащ фэгъэхьыгъэ унашъом кIэтхагъ Кавказ биосфернэ заповедникым ипащэ. Чъэпыогъум и 23-м къыщегъэжьагъэу лъэгъуиплI зэфашIыгъ: N 30(В,Г-р), N 8а-р, N 9-р, N 13-р. N 30-р блэтIупщыпIэу «Узуруб» щегъэжьагъэу «псы­хъоу Лабэ» зыфиIорэм нэс. Арышъ, зэрэхъу­рэмкIэ, чэщ къыхэмыхьэу, блэтIупщыпIэу Лэгъо­накъэ къыщегъэжьагъэу «Инструкторская щель» зыфиIорэм нэс зы мэфэ гъогу-уанэкIэ пкIун плъэкIыщт. Нахь ыпаIоу, чъэпыогъум и 17-м зэфашIыжьыгъэх гъогууанэхэу N 8-р ыкIи N 12-р.
Лъагъохэр зыкIызэфашIыгъэхэм ушъхьагъу заулэ иI: чъыIэ къэхъугъ, чэщырэ къегъэщты, ос къыщесыгъ, къушъхьэ­лъэ гъогууанэм къыщыпкIухьаныр щынагъо. Ащ фэшъхьафэу зекIо уцупIэхэр кIымэфэ лъэхъаным фагъэ­хьазырынхэу къапыщылъ. Осышхо къе­мысызэ ащ игъо фифэнхэ фае. Арышъ, джырэкIэ Iоф зышIэщт лъагъохэр: блэтIупщыпIэу Лэгъо­накъэ щегъэжьа­гъэу я 2-рэ чыжьэплъапIэм, е «Инструкторская щель» зыфи­Iорэм унэсышъущт, гъогууанэу N 15Ю, N 14, N 13/1. Джащ фэдэу илъэсым къыкIоцI Iоф зышIэрэ экогупчэхэу «Лаура», «Гъозэрыплъэ» ыкIи «Парк Южные культуры» зыцIэхэр зекIо­хэм къяжэх.
БлэкIыгъэ илъэсым егъэпшагъэмэ, мы гъэмэфэ лъэхъаныр мэфипшIыкIэ нахьыжьэу зэфашIыжьыгъ. ГъэрекIо ар шэкIогъум и 3-р арыгъэ.
Сурэтыр: А. Балабась.