ИлъэсыкIэ мэфэкIхэм зафытырагъэпсыхьэгъ
ИлъэсыкIэ мэфэкIхэр джыри чыжьэхэу шъоIуа? Ар зэрэхигъэунэфыкIыщтым мэхьанэ езытыхэрэмкIэ — къэсыгъах. Арышъ, а мафэхэм зызэрагъэпсэфыщт шIыкIэмрэ зыдэкIощтхэмрэ мэзитф-хыр ыпэу рахъухьэгъах.
Адыгеим илъэсыкIэр къыщизыгъахьэ зышIоигъохэм Мыекъопэ районым ихьакIэщхэм япроцент 70-р бэджэндэу аштэгъах. Процентишъэм кIахьэхэрэри мымакIэу ахэтых. Ушэтынхэм къызэрагъэлъэгъуагъэмкIэ, Урысыем щыпсэухэрэм фэдитIукIэ нахьыжьэу хьакIэщхэр зыпатхэхэ хъугъэ. Илъэс пчъагъэ хъугъэу зекIоным ылъэныкъокIэ Iоф зышIэрэ Петр Фешинми ар къеушыхьаты. Ащ къызэрэтиIуагъэмкIэ, илъэсыкIэ мэфэкIхэм ихьакIэщ къыщыуцугъагъэхэм ащыщхэр кIожьыхэ зыхъукIэ, илъэс псау джыри апэ илъэу, къэкIорэгъэм зытырагъэпсыхьэ, бэджэндыпкIэр къагъанэ. Джырэ щыIэныгъэмкIэ ар шапхъэ хъугъэу ащ къыхегъэщы.
ИлъэсыкIэ мэфэкIхэмкIэ хьакIэщхэм ятын жъоныгъокIэ-мэкъуогъу мазэхэм рагъажьэ. Ащ ежэу щысыгъэ зекIохэм псынкIэу ахэр зэлъаштэх.
— ИлъэсыкIэ мэфэкIхэм атефэу унэхэм ятын шышъхьэIум едгъэжьагъ. Непэрэ мафэм ехъулIэу процентишъэм кIахьэу зэбгырахыгъ. Нахьыбэрэм мэфищ пIалъэкIэ унэхэр аштэх. ЗекIохэр Урысыем ишъолъыр пстэуми къарэкIых. Унэр пэшIорыгъэшъэу зэрэпштагъэм уасэр елъытыгъэп, ар зэхъокIырэп, — къыддэгощагъ псэупIэу Дахъом дэт хьакIэщым иIофышIэу Валентинэ.
ХьакIэщхэр зыIыгъхэм къызэраIорэмкIэ, зекIохэр мыщ фэдэу чаны зыхъугъэхэр аужырэ илъэсищ-плIыр ары. Къэралыгъор пштэмэ, илъэсыкIэм ипэгъокIэу пэшIорыгъэшъэу аштэгъэ хьакIэщхэм япроцент 60-р Къыблэм къыфэкIо. Урысыем зэрэщытэу, шъолъырхэми шъхьафэу чIыпIэ зекIоным зызэращиушъомбгъурэр ащ ылъапс. Илъэсым къыкIоцI республикэм къихьэрэ зекIохэм япчъагъэ нэбгырэ мин 500-м блэкIыгъ. Ахэм псэупIэхэр икъоу ягъэгъотыгъэным шъолъырым Iоф дешIэ. АР-м зекIонымрэ зыгъэпсэфыпIэхэмрэкIэ и Комитет ителеграм-нэкIубгъо къызэрэщитырэмкIэ, лъэпкъ проектэу «ЗекIоныр ыкIи хьакIэпэгъокIыныр» зыфиIорэм Адыгеир хэлажьэ. Ащ къыдыхэлъытагъэу, УФ-м экономикэмкIэ и Министерствэ 2023-рэ илъэсым хьакIэщхэм яшIынкIэ республикэм ипроекти 8-мэ къадыригъэштагъ ыкIи ахъщэ IэпыIэгъоу сомэ миллиони 150-рэ республикэм къыфитIупщыгъ. Ащ ишIуагъэкIэ, илъэсым ыкIэ нэс модульнэ хьакIэщи 122-рэ шъолъырым щашIыщт. Ащ изы Iахь агъэцэкIэгъах, къэнагъэхэм IофшIэнхэр зэлъыкIагъахьэх. Ащ нэмыкIэу, ахъщэ тедзэу гупчэм къытIупщыгъэм ишIуагъэкIэ джыри проектитIумэ ахъщэ IэпыIэгъу агъотыщт. Зэхэтэу ахэм хьакIэщ унэ 80 ашIыщт. Ащ елъытыгъэу, субсидиер сомэ миллион 220-м къехъущт. Ежь проектхэр зыгъэцакIэхэрэм яахъщэу халъхьагъэр къыдыхэплъытэмэ, IофшIэнхэм сомэ миллион 500 фэдиз апэIухьащт.
А1-рэ, я 3-рэ нэкIубгъохэр зыгъэхьазырыгъэр Анцокъо Ирин.
Сурэтхэр: АР-м зекIонымрэ зыгъэпсэфыпIэхэмрэкIэ и Комитет ихъарзынэщ.