Адыгеим икомсомол зызэхащагъэр илъэси 100 зэрэхъугъэм фэгъэхьыгъэ зэхахьэ тыгъуасэ Мыекъуапэ щыкIуагъ.

Iофтхьабзэм хэлэжьагъэхэр егъэшIэрэ машIом ыкIи В. И. Лениным ясаугъэтхэм якIолIагъэх, къэгъагъэхэр акIэралъхьагъэх.
Нэужым Iофтхьабзэм хэлэжьагъэхэр АР-м и Лъэпкъ театрэ и Унэ еблэгъагъэх. Комсомол организацием итарихъ фэгъэхьыгъэ къэгъэлъэгъоным еплъыгъэх.
Предприятиехэм ыкIи организациехэм якомсомол организациехэм апэрэ пащэу яIагъэхэм, комсомольцэ пэрытхэм ыкIи лэжьакIохэм, джащ фэдэу Хэгъэгу зэошхом илъэхъан лIыхъужъныгъэ зезыхьагъэхэм ыкIи зэо ужым народнэ хъыз­мэтыр зэтегъэуцожьыгъэнымкIэ зиIа­хьышIу хэзышIыхьагъэхэм ясурэтхэр мыщ къыщагъэлъэгъуагъэх.
Ащ ыуж Адыгеим икомсомол ыныбжь илъэси 100 зэрэхъугъэм фэгъэхьыгъэ зэIукIэ щыIагъ. АР-м и ЛIышъхьэу Къум­пIыл Мурат ыцIэкIэ комсомол движением иветеранхэм шIуфэс къарихыгъ Iоф­тхьабзэу «Адыгеим икомсомол иилъэ­си 100» зыфиIорэм изэхэщэкIо комитет итхьаматэу Виктор Орловым.
— Адыгеим щыпсэурэ лIэужыбэхэмкIэ комсомолыр текIоны­гъэшхохэм ыкIи IофшIэнымкIэ гъэхъагъэхэм ятамыгъэу щыт. Зэоуж илъэсхэм народнэ хъызмэтым изэтегъэуцожьын Адыгеим икомсомольцэхэр чанэу хэлэжьагъэх, промышленнэ псэолъэ инхэр зэтырагъэпсыхьа­гъэх. Къиныгъохэм уапэшIуекIоным, шэн пытэ гъэпсыгъэ хъуным комсомолым уфигъасэ­щтыгъ, — къыIуагъ В. Орловым.
ЗэхэщэкIо комитетым итхьаматэ игуа­дзэу Нэхэе Юрэ кIэлэцIыкIухэм ыкIи ныбжьыкIэхэм япIуныгъэкIэ комсомолым мэхьанэшхо зэриIэр къыкIигъэтхъыгъ.
— Комсомольцэхэр нахьышIум щыгугъхэзэ хьэрамыгъэ къызхамыгъафэу ыкIи хьалэлэу лэжьагъэх. Яхэгъэгу шIу алъэгъу­щтыгъ, ар къеушыхьаты Граждан ыкIи Хэгъэгу заохэм апсэ емыблэжьэу зэрэхэлэжьагъэхэр. Сыд фэдэрэ къини пэшIуекIохэзэ текIоныгъэм къыфэкIуагъэх, — къыIуагъ Ю. Нэхаим.
Нэужым Адыгеим икомсомольцэхэм къафэгушIуагъ Краснодар и ВЛКСМ икомитет иапэрэ секретарэу Александр Масловыр.
КIэухым Адыгеим икомсомол фэгъэ­хьыгъэ фильмым зэIукIэм къекIолIагъэ­хэр рагъэплъыгъэх.
КIАРЭ Фатим.