Илъэсым иректор хъугъэ
Адыгэ къэралыгъо университетым иректорэу Мамый Даутэ Урысыем ипрофессорхэм язэIукIэ илъэпкъ шIухьафтынэу «Илъэсым иректор» зыфиIорэр лъэныкъоу «Классическэ апшъэрэ еджапIэхэр» зыфиIорэмкIэ къыфагъэшъошагъ.
ШIухьафтыныр къетыгъэнымкIэ комиссием унэшъо гъэнэфагъэ ыштагъ. Профессорхэм яяблэнэрэ зэхэхьэшхоу «Гъэсэныгъэр, шIэныгъэр, унагъор — Урысыем ихэхъоныгъэкIэ лъапсэх» зыфиIорэм ипленарнэ зэхэсыгъо тегъэпсыхьагъэу шэкIогъум и 12-м шIухьафтыныр къыратыжьыщт. Iофтхьабзэр зыщыкIощтыр Г. В. Плехановым ыцIэкIэ щыт Урысые экономическэ университетым и Конгресс-гупч.
Лъэныкъохэу «Аграрнэ апшъэрэ еджапIэхэр», «Культурэм иапшъэрэ еджапIэхэр», «Медицинэм иапшъэрэ еджапIэхэр», «Егъэджэн IофымкIэ апшъэрэ еджапIэхэр» ыкIи «ТехникэмкIэ апшъэрэ еджапIэхэр» зыфиIохэрэмкIэ комиссием текIоныгъэр къыдэзыхыгъэхэр ыгъэнэфагъэх.
2020-рэ илъэсым Урысыем ипрофессорхэм язэIукIэ шIухьафтынэу «Илъэсым иректор» зыфиIорэр щагъэнэфэгъагъ. Ар зыфытегъэпсыхьагъэр Урысыем шIэныгъэмрэ апшъэрэ гъэсэныгъэмрэкIэ амалэу иIэхэм тапэкIи нахь зягъэушъомбгъугъэныр, наукэмрэ техникэмрэ яхэхъоныгъэ нахь фэгъэчэфыгъэнхэр, научнэ ыкIи егъэджэн Iофым фэгъэзэгъэ цIыф цIэрыIохэр къыхэгъэщыгъэнхэр ары. Апшъэрэ еджапIэм шIуагъэ къытэу пэщэныгъэ зэрэдызэрахьэрэм, наукэмрэ гъэсэныгъэмрэ яхэхъоныгъэ яIахьышхо зэрэхашIыхьэрэм апае а шIухьафтыныр афагъэшъуашэ. Университетхэу, академиехэу, институтхэу хэгъэгум ишъолъырхэм арытхэм (мыщ къыхиубытэхэрэп Москварэ Санкт-Петербургрэ) япэщэ шIэныгъэлэжьхэм ар афагъэшъуашэ. Анахь дэгъухэр къыхахыхэ зыхъукIэ къыдалъытэрэ лъэныкъо шъхьаIэр университетым федеральнэ ыкIи шъолъыр проектхэм иIахьэу ахишIыхьэрэр ары. Урысыем ипрофессорхэм язэIукIэ и Президиум ыгъэнэфэгъэ шIыкIэм тетэу ашIыгъэ бгъэхэлъ тамыгъэмрэ дипломымрэ текIоныгъэр къыдэзыхыгъэхэм афагъэшъуашэх.
ШIухьафтынэу «Илъэсым иректор» зыфиIорэр афэгъэшъошэгъэнымкIэ комиссием итхьаматэр апшъэрэ еджапIэхэм я Ассоциациеу «Хэгъэгум ипрофессорхэм IэпыIэгъу ятыгъэныр» зыфиIорэм ипрезидентэу Сергей Степашиныр ары.
Адыгэ къэралыгъо университетым
ипресс-къулыкъу