Мырэущтэу зэджэгъэхэ концертыр Адыгэ Республикэм и Къэралыгъо филармоние иэстраднэ ансамблэу «Ошъутенэм» Мыекъуапэ къыщитыгъ. ОрэдыIо ансамблэм ижъырэ адыгэ орэдхэр, джырэ лъэхъан аусыгъэхэр, гум иорэдхэр, лъэпкъ гупшысэм ехьылIагъэхэр къыIуагъэх.

«Ошъутенэм» ихудожественнэ пащэр Адыгэ Республикэм искусствэхэмкIэ изаслуженнэ IофышIэшхоу ХьэкIэко Алый. Урысыем, дунэе эстрадэм лъэ­хъаным диштэу ащагъэфедэрэ шIыкIэхэм къапкъырыкIхэзэ, музыкальнэ произведениехэр ансамблэм пае композиторхэм зэрагъэфагъэх. Произведениехэр аранжировкэ ашIыхэ зыхъукIэ, адыгэ лъэпкъ гупшысэр орэдышъом ыкупкI шъхьаIэу зэрэщытыр къыхагъэщы.
Ансамблэм ипащэу ХьэкIэко Асиет къызэрэтиIуагъэмкIэ, пэсэрэ адыгэ орэдхэу «Си Мэмэт», «Си Пакъ», нэмыкIхэри ижъырэ къэIуакIэм тетэу Хьа­зэщыкъо Мосэ къыIуагъэх. «Лащынэр» Мэкъоо Маринэрэ КIэнышхэ Заремэрэ къызэдаIуагъ. Жарэкъо Руслъан, Юрий Конжиныр, Никита Козенковыр, Алевтина Кобазевар пчыхьэзэхахьэм хэлэжьагъэх.
Гупшысэу ахэлъымкIэ орэдхэр зэфэшъхьафых. ЛIыхъужъныгъэм, шIулъэгъу къабзэм, гум ифэбагъэ ахэм кIуачIэу ахэлъыр нахь зэпэблагъэ ашIы. Лъэхъэ­нэ зэфэшъхьафхэм аусыгъэ орэдхэр щыIэныгъэм иIотакIох.
«Ошъутенэм» ипрограммэ орэдыкIэхэри хэтых. «Усимыгъусэмэ» зыфиIорэ орэдыкIэу ХьэкIэко Алый ытхыгъэр Мэкъоо Маринэ къыIуагъ.
Орэдхэм тамэ аратызэ, лъэпкъ гупшысэм къыпкъырыкIырэ гущыIэхэм псэ къапагъакIэ. «Ошъутенэм» лъэпкъ искусствэм хэхъоныгъэу щишIырэмкIэ цIыфхэр егъэгушIох, орэдым пIуныгъэ мэхьанэу иIэр къеушыхьаты.
Лъэпшъыкъо
Фатим.
Сурэтыр: ансамблэм ихъарзынэщ.