КIэлэегъаджэхэм яIэпэIэсэныгъэ къы­зыщагъэлъэгъогъэ республикэ зэнэкъо­къухэу 2024-рэ илъэсым зэхащагъэхэм ащатекIуагъэхэмрэ къащыхагъэщыгъэ­хэмрэ зыщагъэшIуагъэхэ Iофтхьабзэр АР-м и Правительствэ зычIэт унэм щыкIуагъ. Адыгеим и ЛIышъхьэу КъумпIыл Мурат пшъэрылъ къызэрэфишIы­гъэм тетэу АР-м иминистрэхэм я Кабинет и Тхьаматэ игуадзэу Виктор Орловым кIэлэегъаджэхэм тынхэр аритыжьыгъэх.
Ащ зэрэхигъэунэфыкIыгъэмкIэ, непэ, тихэгъэгу чIыпIэ къин зыщит лъэхъаным, кIэлэегъэджэ чанхэр, зиIоф фэшъыпкъэ­хэр ищыкIэгъэ дэдэх.
«Президентэу Владимир Путиным пшъэрылъ къыгъэуцугъ Урысыем итехнологическэ суверенитет гъэпытэгъэнэу, экономикэм илъэныкъо шъхьаIэхэм Iоф ащызышIэщтхэр гъэхьазырыгъэнхэу. КIэлэегъаджэхэмкIэ шапхъэу щыIэхэм ахэхъо. Республикэм икIэлэегъаджэхэм тыкъагъэукIытэжьырэп. ТикIэлэпIухэм, кIэлэегъаджэхэм, производствэм фэзыгъэсэрэ мастерхэм IофшIэнымкIэ ящыкIэгъэ амалхэр яIэнхэмкIэ тфэлъэкIырэр зэкIэ тэшIэ», — къыIуагъ Виктор Орловым.
Ащ къызэрэхигъэщыгъэмкIэ, джырэ шапхъэхэм адиштэу ныбжьыкIэхэм гъэсэ­ныгъэ ягъэгъотыгъэнымкIэ, специалист ныбжьыкIэхэм IэпыIэгъу афэхъугъэнымкIэ лъэпкъ проектхэмрэ къэралыгъо программэхэмрэ атетэу республикэм бэ щызэшIуахырэр. Илъэс къэс еджапIэхэр, кIэлэцIыкIу IыгъыпIэхэр агъэпсых е агъэкIэжьых, кIэлэцIыкIу модельнэ тхылъеджапIэхэр ашIых. ГущыIэм пае, мыгъэ Тэхъутэмыкъое районым нэбгырэ 2450-мэ ателъытэгъэ еджэпIи 3 къыщызэIуахыгъ. Джыри нэбгырэ 2450-рэ зычIэфэщт еджэпIи 3 агъэпсы. Гъэцэ­кIэжьыгъэнхэм атегъэпсыхьэгъэ програм­мэр зыпхыращырэ илъэсищым еджэпIэ 20 фэдиз зэтырагъэпсыхьажьыгъ. Къи­хьащт илъэсым къыщыублагъэу къэралыгъом ипащэ кIэщакIо зэрэфэхъугъэм тетэу кIэлэцIыкIу IыгъыпIэхэм ягъэцэкIэжьынкIэ программэм Iоф дашIэщт.
ЗипсауныгъэкIэ щыкIагъэ зиIэ кIэлэцIыкIухэм яеджапIэ мыгъэ Мыекъуапэ щагъэцэкIэжьыгъ, еджэпIакIэхэр зэрагъэпсыгъэхэм къыхэкIэу ятIонэрэ сменэм щеджэхэрэр нахь макIэ хъугъэ.
Гъэсэныгъэ тедзэ ягъэгъотыгъэнымкIэ Iофтхьэбзабэ республикэм щызэрахьагъ: непэкIэ Адыгеим IT-клуби 2-мэ, кIэлэцIыкIу технопарки 6-мэ Iоф щашIэ, «Точка роста» зыфиIорэм фэдэ гупчи 102-рэ къоджэ еджапIэхэм къащызэIуа­хыгъ. Мыекъопэ индустриальнэ техникумым къыщызэIуахыгъэ Гупчэм нэбгырэ 840-рэ щырагъэджагъ, кIэлэеджэкIо 9000-м фэдизмэ тренингхэр щакIугъэх.
Федеральнэ проектэу «Профессионалитетым» ишIуагъэкIэ гурыт IофышIэхэр зыщагъэхьазырыщтхэ гупчитIу Адыгеим щызэхащагъ. Ахэр АР-м зекIонымкIэ ыкIи фэIо-фашIэхэмкIэ и Гупчэрэ медицинэ кластерэу «ПрофиМед» зыфиIорэмрэ арых.
Виктор Орловым къызэриIуагъэмкIэ, блэкIыгъэ илъэс еджэгъум специалист ныбжьыкIэ 200-мэ еджапIэхэмрэ кIэлэцIыкIу IыгъыпIэхэмрэ Iоф ащашIэу ауб­лагъ, мы илъэсым иIоныгъо щегъэжьагъэу кIэлэегъэджи 164-рэ ахэм къахэ­хъуагъ. Къэралыгъо программэу «Къоджэ кIэлэегъадж» зыфиIорэм диштэу нэбгырэ 49-мэ къоджэ еджапIэхэм Iоф ащашIэу аублагъ. АКъУ-мрэ гъэсэныгъэм­кIэ платформэу «Школково» зыфиIорэмрэ япроектэу кIэлэегъэджэ ныбжьыкIэхэр къоджэ еджапIэм къегъэблэгъэгъэнхэм тегъэпсыхьагъэр гъэрекIо Адыгеим щагъэфедэу аублагъ. Республикэм иеджапIэхэм педагогическэ класс 26-рэ къащызэIуахыгъ, ахэм кIэлэеджэкIо 400 фэдиз ащеджэ.
Республикэм икIэлэегъаджэхэр яIэпэIэсэныгъэ къызыщагъэлъэгъорэ рес­публикэ, федеральнэ зэнэкъокъухэм ахэлажьэх. Мыгъэ сомэ мин 200 хъурэ федеральнэ шIухьафтынхэр Адыгеим икIэлэегъэджи 5-мэ, сомэ мин 50 хъурэ республикэ шIухьафтынхэр нэбгыри 6-мэ къафагъэшъошагъэх. Зэнэкъокъоу «2024-рэ илъэсымкIэ Урысыем икIэлэегъэджэ анахь дэгъу» зыфиIорэр къызыфагъэшъошэгъэ нэбгыри 6-мэ ащыщ Мыекъо­пэ гурыт еджапIэу N 7-м урысыбзэмрэ литературэмрэкIэ икIэлэегъаджэу Светлана Великовар. Мыекъопэ гимназиеу N 5-м икIэлэегъэджэ-психологэу Анна Мельниковам Урысые зэнэкъокъоу «КIэ­лэегъэджэ-психолог – 2024» зыфиIорэм я 2-рэ чIыпIэр къыщихьыгъ.
Адыгэ Республикэм и ЛIышъхьэ идипломхэмрэ ахъщэ шIухьафтынхэмрэ зэнэкъокъухэм ащатекIогъэ кIэлэегъэджэ 28-мэ афагъэшъошагъ.
КIэлэегъаджэхэм ынаIэ къызэратыригъэтырэм фэшI зэнэкъокъухэм ащатекIуагъэхэм республикэм ипащэ «тхьауегъэпсэу» раIуагъ.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.