ФутболымкIэ студентхэм азыфагу зэхащэгъэ турнирым ифиналныкъо къыдыхэлъытэгъэ ешIэгъухэр Мыекъуапэ щыкIуагъэх. Ащ Адыгеим, Краснодар, Владикавказ ыкIи Воронеж якомандэхэр хэлэжьагъэх.

Республикэр зэнэкъокъухэм къащызыгъэлъэгъуагъэр Адыгэ къэралыгъо университетыр ары. ЗэIукIэгъухэр АКъУ-м и Мыекъо­пэ къэралыгъо гуманитар-техническэ колледж истадионэу «Ректор Ячиков» зыфиIорэм щыкIуагъэх. ЗэхэщакIохэм зэрагъэнэфагъэу, командэхэр зэрызэ зэIукIагъэх, зэфэхьысыжьхэмкIэ очко анахьыбэ изыгъэкъугъэм текIоныгъэр къыдихыгъ.
ЕшIэгъухэр гъэшIэгъонэу кIуагъэх. Апэрэ чIыпIэр къыдэзыхыщтыр къызщынэфагъэр Адыгэ къэралыгъо университетымрэ физическэ культурэмкIэ, спортымкIэ ыкIи зекIонымкIэ Пшызэ къэралыгъо университетымрэ язэIукIэгъу ары. Пчъагъэр зэфэдизэу (1:1-у) ешIэгъур аухыгъ. Ау Мыекъуапэ икомандэ къэгъэлъэгъон нахь дэгъухэр иIэу къы­чIэкIыгъ ыкIи мы едзыгъом текIоныгъэр къыщыдихыгъ. Ар финалым ихьагъ ыкIи шэкIогъум и 16 — 25-м къалэу Ессентуки щыкIощт къыкIэлъыкIорэ уцугъом хэлэжьэщт. Краснодар икомандэ ятIонэрэ хъугъэ, ящэнэрэ чIыпIэр Воронежскэ къэралыгъо университетым фагъэшъошагъ, Владикавказ илIыкIохэр яплIэнэрэх.
Мыекъуапэ щыкIогъэ едзыгъом анахь дэгъоу зыкъыщызыгъэлъэгъогъэ футболистхэр зэхэщакIохэм къыхагъэщыгъэх: Сармат Остани (Владикавказ), Глеб Недолуга (Краснодар), Никита Тербунскэр (Воронеж), Максим Манжиевыр (Краснодар), Иван Матрениныр (Мыекъуапэ). Турнирым иешIэкIо анахь дэгъоу къыхахыгъэр Шъхьэ­лэхъо Амир (Мыекъуапэ).
Апэрэу зэнэкъокъум ифиналныкъо Адыгеим щызэхащагъ. ШэпхъэшIухэм адиштэу турнирыр зэрэрекIокIыгъэр къыхагъэщыгъ Лъэпкъ студенческэ футбольнэ лигэм ипащэхэм. АР-м футболымкIэ и Федерацие итхьаматэ игуадзэу, зэнэкъокъум исудья шъхьаIэу Болэ Хьасин къызэрэхигъэщыгъэмкIэ, спортым хэхъоныгъэхэр ышIынхэмкIэ мыщ фэдэ Iофтхьабзэхэм мэхьанэшхо яI.
— Турнирыр зэхэщагъэ зэрэ­хъугъэм командэхэр лъэшэу ыгъэ­рэзагъэх. АщкIэ Адыгэ къэралыгъо университетым ипащэхэм алъэкI къагъэнагъэп. Джащ фэдэу Лъэпкъ студенческэ футбольнэ лигэм ипрезидентэу Андрей Стукаловыр республикэм щыIагъ, финалныкъом иешIэгъухэм яп­лъыгъ, Iофтхьабзэр зэрэзэхащагъэм осэшIу фишIыгъ, — къыхигъэщыгъ Болэ Хьасин.
Шъугу къэдгъэкIыжьын, ыпшъэ­кIэ зигугъу къэтшIыгъэ Урысые зэнэкъокъухэм гъэсэныгъэм иор­ганизаце 280-рэ фэдизмэ якомандэхэр ахэлэжьагъэх. Ахэм ащыщэу 32-р гощыгъэхэу финалныкъохэм ащызэIокIэх. ЕшIэгъу­хэр Ивановскэ хэкум, Красноярскэ, Курган, Смоленскэ, Томскэ, Ульяновск, Владивосток ыкIи Мыекъуапэ ащэкIох. Мыщ ащытекIохэрэр финалым ихьащтых. Ахэм ягъусэщтых къэралыгъом щызэхащэгъэ турнир инхэм текIоныгъэр къащыдэзыхыгъэхэр ыкIи квотэкIэ финалым ихьагъэхэр.
Адыгэ къэралыгъо
университетым
ипресс-къулыкъу.