Адыгэ Республикэм и Къэралыгъо академическэ лъэпкъ ансамблэу «Налмэсым» «Уахътэм пхырыкIыгъэ къашъохэр» зыфиусыгъэ концерт программэр къытыгъ. Къэгъэлъэгъоныр ямышIыкIэу агъэпсыгъ, еплъыхэрэм лъэшэу ар ашIогъэшIэгъоныгъ. IофшIэгъакIэм «Налмэсыр» анахь шъошэ лъагэм нэсэу ыIэтыгъ, ансамблэм иIэпэIэсэныгъэ ишыхьат ар хъугъэ.

ЛIэужищым яуахътэ къизыгъэлъэгъу­кIырэ концертым къэшъо дахэхэр хэ­хьагъ. Лъэпкъ къашъохэм искусствэм ибаиныгъэ къыраIотыкIы, аIэты, лъэпкъ зэфэшъхьафхэм алъагъэIэсы. Адыгэ къашъохэу «ЗэфакIор», «Зыгъэлъатэр», «Абхъаз къашъор», «ЛъэпэчIасэр», «Ислъамыер», «Къафэр», «Адыгэ уджхэр», нэмыкIхэри къашIыгъэх.
Купым ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ шъолъыр язаслуженнэ артистэу, Адыгеим инароднэ артистэу Хъоджэе Аслъан къыIуагъ:
— Къытэмызэщэу къытфакIорэмэ лъэшэу тафэраз. Анахь тилъапIэхэр адыгэ чIыгум ицIыфхэр ары. Iофтхьэбзэшхоу тапэкIэ илъыр Кремлым тикъэгъэлъэгъонэу щыкIощтым изыфэгъэхьазырын. Лъэпкъ искусствэр хэгъэгум нахьышIоу щашIэным фэшI тапэкIи нэмыкI концертхэр зэхэтщэщтых. Бжыхьэм Урысыем ишъолъыр 18-мэ тащыIэщт. Сыбыр тынэсыщт. Къашъохэм ягъэхьазырын игъэкIотыгъэу тыдэлажьэ. ШэкIогъум и 17-м «Нал­мэс-налкъутэр мэжъыу» зыфиIорэ концертыр Мыекъуапэ къыщыдгъэлъэгъощт. Еплъы зышIоигъохэр къе­тэгъэблагъэх. Жъымрэ кIэмрэ зэзыпхырэ Iофтхьабзэу ар дгъэ­псыгъэ, гъэшIэгъонэу рекIокIыщтэу тэгугъэ. Ансамблэр Туркменистан кIощт, «Уахътэм пхырыкIыгъэ къашъохэр» къэд­гъэлъэгъощт, — къыIуагъ Хъоджэе Аслъан.
— Ижъырэ къашъохэм ядэхагъэ лъэшэу сыгу рихьыгъ. КъашъохэмкIэ лъэпкъым икультурэ къыкIугъэ гъогур къытагъэлъэгъугъ. «Налмэсым» икъэшъуакIоу, Адыгеим изаслуженнэ артистэу Хьажэкъо Пщымафэ къамэхэр ыIыгъхэу къашъоу къышIыгъэм жьы къэсымыщэу сеплъыгъ. Къамэр адыгэхэмкIэ апэрэ Iашэу, иунагъуи илъэпкъи янамыс хъулъфыгъэм къыгъэгъунэнхэу зэрэфэхьазырым итамыгъэу щыт. Джырэ лъэхъаным къамэр Iашэу агъэфедэжьырэп, ау адыгэм лIэшIэгъубэм къапкъырихыгъэу непэрэ мафэхэми фэIазэу егъэIорышIэ, — къы­Iуагъ Тыркуем къикIыгъэ хьакIэу Жьыу Щэрифэ.
НэкIубгъор зыгъэхьазырыгъэр
Лъэпшъыкъо Фатим.
Сурэтхэр авторым иех.