Урысые Федерацием псауныгъэр къэухъумэгъэнымкIэ и Министерствэ телемедициннэ системэу ыгъэпсыгъэм ишIуагъэкIэ, чIыпIэ зэфэшъхьафхэм ащыIэ врачхэр упчIэжьэгъу зэфэхъужьынхэ алъэкIы хъугъэ. А амалыр къызфагъэфедэзэ, Адыгеим иврачхэр IэпыIэгъу афэхъух Геническэ щыIэ ясэнэхьатэгъухэм.

АР-м псауныгъэр къэухъумэгъэнымкIэ и Министерствэ къызэрэщаIуагъэмкIэ, компьютернэ томографие уплъэкIунхэм къагъэлъагъохэрэр зэхэфыгъэнхэмкIэ шъолъыритIум ащыIэ зэсэнэхьатэгъухэр ренэу упчIэжьэгъу зэфэхъух. Аужырэ мэзищым сымаджэхэм афашIыгъэ уплъэ­кIун 350-м ехъум къапкъырыкIыхэзэ цIыфхэм узэу яIэхэр тиврачхэм агъэ­унэфыгъэх. Ахэр яIэубытыпIэхэу Геническэ гупчэ сымэджэщым итерапевтхэр, хирургхэр сымаджэхэм яIазэх.
БэмышIэу Адыгэ республикэ клиническэ сымэджэщым иврачхэр онлайн шIыкIэм тетэу IэпыIэгъу афэхъугъэх гъогу хъугъэ-шIагъэу Геническэ къыщыхъугъэм хэфагъэм шъобжэу тещагъэ хъугъэхэр къэгъэнэфэгъэнхэмкIэ ыкIи еIэзэгъэным иамалхэр къыхэхыгъэнхэмкIэ. Тисымэджэщ иврач-рентгенологхэм компьютернэ томографием къыгъэлъэгъуагъэм къыпкъырыкIыхэзэ агъэунэ­фыгъ ащ ыцагэхэр сэмэгубгъумкIэ чIыпIабэхэм зэращызэпыкIыгъэхэр, ыбгъэлыбэ зэрэзэпыутыгъэр, ыбгъэгу лыпцэхэр зэрэпщыгъэхэр…
«Геническэ гупчэ район сымэджэщым врач-рентгенолог зэримыIэм къыхэкIэу, томографием къыгъэлъэгъуагъэр тирес­публикэ клиническэ сымэджэщ къагъэ­хьыгъ. Тиврачхэм ар зэхафыгъ ыкIи агъэнэфэгъэ Iэзэн Iофтхьабзэхэм атетэу джы сымаджэм чIыпIэм щеIэзэщтых», — къыIуагъ Адыгэ республикэ клиническэ сымэджэщым иврач шъхьаIэу Чэужъ Нателлэ.