Урысыем и Къыблэ прокуратурэ иветеранхэм яя VIII-рэ Къырым форум апэрэу Мыекъуапэ щыкIуагъ.

Iофтхьабзэм хэлэжьагъэх АР-м ипрокуратурэ ипащэ ыкIи иIофышIэхэр, Къы­рым Республикэм ипрокуратурэ иветеранхэм ыкIи ипенсионерхэм я Урысые общественнэ организацие ишъолъыр къутамэ итхьаматэу Геннадий Колосовыр, джащ фэдэу Урысые Федерацием ишъо­лъыри 8-мэ япрокуратурэхэм яветеран организациехэм ялIыкIохэр. Ахэр Севастополь, Къырым Республикэм, Къалмыкъым, Къэбэртэе-Бэлъкъарым, Адыгеим, Темыр Осетием — Аланием, Краснодар ыкIи Ставрополь крайхэм къарыкIыгъэх.
Форумым иIофшIэн къызэIуихыгъ АР-м ипрокурорэу Игорь Шевченкэм. Ащ зэхэ­сыгъом хэлажьэхэрэм шIуфэс гущыIэхэмкIэ закъыфигъэзагъ ыкIи шIуагъэ къытэу IофшIэн зэIукIэгъур рекIокIынэу къафэлъэIуагъ.
— Мыщ фэдэ форумхэм мэхьанэшхо яI. Сыда пIомэ прокуратурэм иветеранхэм ыкIи ипенсионерхэм IэпэIэсэныгъэшхоу аIэкIэлъымкIэ къыткIэхъухьэрэ ныб­жьыкIэхэм адэгуащэх, анаIэ атырагъэты, — къыIуагъ АР-м ипрокурор.
Нэужым прокуратурэм иветеранхэм ыкIи ипенсионерхэм я Урысые Общественнэ организацие и Адыгэ шъолъыр къутамэ итхьаматэу Георгий Хастян къэгущыIагъ. Шъолъыр къутамэу зипащэм иIофшIэн зэрэгъэпсыгъэм, пшъэрылъэу къафагъэуцугъэм изэшIохын зэрэдэлажьэхэрэм зэхэсыгъом хэлажьэхэрэр щигъэгъозагъэх.
Форумым къекIолIагъэхэр шъолъыр къутамэхэм яIофхэм язытет къытегущы­Iагъэх ыкIи мы аужырэ уахътэм прокурор ныбжьыкIэхэм япIуныгъэ яIахьышIу зэрэхалъхьэрэр къыхагъэщыгъ. НыбжьыкIэхэм яхэгъэгу шIу алъэгъоу пIугъэнхэм, граждан обществэм хэхъоныгъэ егъэшIыгъэным ыкIи гъэпытэгъэным алъэныкъокIэ IофшIэн гъэнэфагъэхэр зэрахьагъэх.
Прокуратурэм иветеранхэм ыкIи ипенсионерхэм я Урысые общественнэ организациехэм яшъолъыр къутамэхэм япащэхэр непэрэ щыIэкIакIэм диштэу яIофшIэн зэрагъэпсырэм къытегущыIа­гъэх, специалист ныбжьыкIэхэм алъэныкъокIэ IэпэIэсэныгъэу аIэкIэлъымкIэ зэхъожьыгъэх, тапэкIэ пшъэрылъэу ыкIи мурадэу яIэхэм язэшIохын Iоф зэрэда­шIэщт шIыкIэхэм атегущыIагъэх.
Зэхахьэм къыщыгущыIагъэ пэпчъ къы­Iуагъ мыщ фэдэ зэхахьэхэм яшIуагъэкIэ прокуратурэм иветеран организациехэм зэпхыныгъэ пытэ яIэу Iоф зэрэзэдашIэрэр, хабзэр гъэпытэгъэнымкIэ ыкIи рэхьатныгъэр къэухъумэгъэнымкIэ ветеранхэм ыкIи пенсионерхэм яшIогъэшхо къызэрагъакIорэр.
КIАРЭ Фатим.
Сурэтыр: Iэшъынэ Аслъан.