Псэупlэу Къэлэрмэз (Келермесскэм) дэт культурэм и Унэ lофтхьэбзэ гъэшlэгъон щыкlуагъ. Ащ ихьакlэхэм Урысыем иджырэ тарихъ и Къэралыгъо гупчэ музееу Москва щыIэм пэlудзыгъэ экскурсиекlэ нэlуасэ зыфашlыгъ. Музеир загъэпсыгъэр мыгъэ илъэсишъэ мэхъу. Лlэшlэгъу ныбжьым фэгъэхьыгъэ lофтхьабзэхэр илъэсым къыкlоцl къэралыгъом ишъолъырхэм ащэкlох. Адыгеири ахэм яз.

Хьакlэу lофтхьабзэм къекlолlагъэхэм ыпэрапшlэу музеим итарихъ къафаlо­тагъ: зэрагъэпсыгъэр, щыухъумэгъэ пкъыгъохэр зыфэдэхэр, ахэм зэрахагъахъорэр, музеир Хэгъэгу зэошхом ыпэм ыкlи ыужым.
Iофтхьабзэм ыцlагъэр «Текlоныгъэм игъогу. Тарихъ къэкlуапlэхэм къаушыхьатырэр». Пэlудзыгъэ шIыкIэм тет нахь мышlэми, а чlыпlэ дэдэм ущыl къыпшIуи­гъэшIэу экскурсиер кlуагъэ. Пкъыгъоу чlэлъхэр, зекlозещэм къыIотагъэр, экраным иадырэбгъу щыIэр зэкIэ еплъыгъэхэм ашlогъэшlэгъоныгъ.
Виртуальнэ зекlоным хэлэжьагъ АР-м культурэмкlэ изаслуженнэ lофышlэшхоу Нурет Головиновар. Iофтхьабзэм игуапэу ар хэлэжьагъ ыкIи ылъэгъугъэр ыгу рихьыгъ.
«Сэ Москва зэп сызэрэщыlагъэр, ау Урысыем иджырэ тарихъ имузей сычlэхьанэу хъугъэп. Арышъ, сигуапэу непэрэ экскурсием сыхэлэжьагъ. Джырэ технологиехэм амалэу къытатырэм шlогъэшхо пылъ. Зы чlыпlэ тисэу Москва дэт музеим къыщыткlухьагъ, — къы­Iуагъ ащ.
Анцокъо Ирин.
Сурэтыр: культурэм и Унэ ихъарзынэщ.