Адыгэ культурэм ибаиныгъэ ныбжьыкIэхэм алъыгъэIэсыгъэным фытегъэпсыхьэгъэ Iоф­тхьабзэу «Адыгэ къэбым и Мафэ» Мыекъопэ районым изыгъэпсэфыпIэу Рыфабгъо чъэпыогъум и 19-м щыкIощт.

Мыщ ихэгъэунэфыкIын зигукъэкIыр республикэм щызэлъашIэрэ IофшIапIэу «Руфа-Турым» илъэсыбэрэ ипэщагъэу, спортымкIэ мастерэу Бибэ Мурат. Ар опсэуфэ лъэпкъ мэфэкIхэм язэхэщэн ишъыпкъэу пылъыгъ, джы иунагъо ар лъегъэкIуатэ. Мыгъэ адыгэ къэбым и Мафэ я 13-у хагъэунэфыкIыщт.
ИжъыкIэ къыщегъэжьагъэу адыгэхэм ящыIэкIэ-псэукIэ къэ­бым чIыпIэ гъэнэфагъэ щеубыты. Я ХVI-рэ лIэшIэгъум къы­щегъэжьагъэу адыгэмэ къэбыр къагъэкIы. Адыгеим ичIыгухэр ащ къекIух. Адыгэхэм илъэс къэс кIэр рахыжьызэ ар къа­гъэкIы. Пстэуми тызэрэ­щы­гъуа­зэу, адыгэ къэбыр нэмыкI къэб лъэпкъхэм зэратекIырэр ар Iэ­шIоу, такъоу зэры­щытыр ары.

Адыгэхэм къэбыр хэтэрыкI­хэм «япщэу» алъытэ. Мыр диетическэ гъомылапхъэу щыт, шхын зэмылIэужыгъохэр хашIыкIы: агъажъо, агъажъэ, къэбщыпс, къэбыпс ашIы, къэбыкIэр ашхы.
ПсыкъечъэхыпIэу Рыфабгъо щыкIощт мэфэкIым адыгэ къэбым хэшIыкIыгъэ шхыныгъо зэмылIэужыгъохэм яIэшIугъэ щышъууплъэкIун шъу­лъэкIыщт.
«Къупшъхьэ къызхэмыкIырэ къэбым» фэгъэхьыгъэу зэнэкъо­къухэр, джэгукIэхэр, мастер-­классхэр зэхэщакIохэм агъэ­хьазырых. Хабзэ зэрэхъугъэу, те­кIоныгъэ къыдэзыхыхэрэм шIухьафтынхэр аратыщт. Къэбым хэшIыкIыгъэ гъомылапхъэ­хэр къекIуалIэхэрэм арагъэшхыщт.