Творческэ зэхэт купэу «Ошъадэм» идэкIыгъо къэгъэлъэгъонхэр апэрэу Тыркуем мы мафэхэм щэкIох. Кавказ Хасэхэм я Конфедерациеу Тыркуем щызэхэщагъэр ахэм кIэщакIо афэхъугъ. Хэхэс тилъэпкъэгъухэр анахьыбэу зыщыпсэурэ къэралыгъом икъэлипшIымэ «Ошъадэм» закъыщигъэлъэгъощт. Непэрэ мафэм ехъулIэу Дюздже, Истамбыл, Синоп концертхэр ащыкIогъахэх.

Апэрэ къэгъэлъэгъоныр тиартистхэм Дюздже къыщатыгъ. Спорт гупчэ анахь инэу къалэм дэтым ар щыкIуагъ. АР-м культурэмкIэ изаслуженнэ артисткэу Едыдж Викторие зипэщэ «Ошъадэр» Дюздже имэрэу Фарук Озлю ригъэблэгъагъ, нэIуасэ зафишIыгъ, мэфэкI пчы­хьэшъхьашхэ афызэхищагъ.
Концертым Дюздже дэс адыгэхэр бэу къекIолIагъэх. Я Адыгэ Хасэ итхьаматэу Тыпшъэу Айщэт тиартистхэм шIуфэс гущыIэхэр афигъэзагъэх. «Ошъадэм» фэдэ купхэр лъэпкъ культурэм изехьакIо­хэу, иухъумакIохэу зэрэщытхэр хигъэу­нэфыкIыгъ. Ащ фэдэу Хэкужъым къи­кIыхэзэ адыгэ лъэпкъ шэн-хабзэхэр, лъэпкъ культурэм илъэгапIэхэр хэхэс адыгэхэм къазэранагъэсыхэрэм мэхьанэшхо иIэу къыIуагъ.

Едыдж Викторие Адыгеим щыпсэу­хэрэм ацIэкIэ къэгъэлъэгъоным къекIо­лIагъэхэм сэлам фабэ арихыжьыгъ. «Ошъадэм» хэт купхэу «Синдикэм», «Ащэмэзым», «Бэгъэуджым» нэIуасэ афишIыгъэх.
Адыгэ къашъохэмрэ ижъырэ лъэпкъ орэдхэмрэ зыхэт сыхьатитIу къэгъэлъэ­гъоным дюздже адыгэхэр тхъэжьыхэу, Iэгу теохэмэ, адежъыухэзэ еплъыгъэх. Концертыр заухым, Дюздже Адыгэ Хасэм итхьаматэу Тыпшъэу Айщэт, къэлэ мэрием ыкIи Тырку парламентым ядепутатхэр пчэгум къихьагъэх, артистхэр агъэшIуагъэх, «Ошъадэм» фагъэшъошэгъэ шIухьафтынхэр Едыдж Викторие къыратыгъэх. Нэужым спорт гупчэм адыгэ джэгушхо щызэхащэжьыгъ. Дюз­дже щыпсэурэ тилъэпкъэгъухэр тиартистхэм ягуапэу къадэшъуагъэх.

Адыгеим икIыгъэхэу Дюздже университетым илъэсипшIым къехъугъэу Iоф щызышIэрэ кIэ­лэегъаджэхэу ХьакIэмызэ Мирэ, Долэ Рузанэ ыкIи Шъхьэлэхъо Сусанэ концертым къэкIогъа­гъэх, ахэм тазэраIукIагъэр тигуапэ хъугъэ.
Мыекъуапэ къикIыхи Едыдж Мэмэтрэ Севильрэ «Ошъадэм» икъэгъэлъэгъон еплъынхэу Дюз­д­же къэкIуагъэх.
Хэхэс тилъэпкъэгъухэм ащыщэу КIуай Абдурахьман Хэку­жъым щыпсэурэ адыгэхэм ащыщэу КIуай Тамилэ «Ошъа­дэм» къызэрэщышъорэр зе­шIэм, ащ нэIуасэ зыфишIымэ шIоигъоу Измит къикIи, Дюзджэ къэкIуагъ, къэшъокIо ныбжьыкIэ цIыкIум зыкъыригъэшIагъ.
Зыфэдэ къэмыхъугъэ гуфэбэныгъэ мыщ фэдэ зэIукIэгъухэм ащызэхэошIэ. Зылъапсэ зымыгъэкIодырэ лъэпкъым неущырэ мафэ иIэу гугъапIэхэр щыIэх.

Джащ фэдэу «Ошъадэм» икъэ­гъэлъэгъонхэр пчыхьитIо зэпытэу Истамбыл иевропэ ыкIи иазие чIыналъэхэм ащы­кIуа­гъэх.
Кавказ Хасэхэм я Конфедерацие итхьаматэу Хьалау (Улучай) Юнал ыкIи тхьаматэм игуадзэу Щэутыку Умар концертхэм язэхэщэн дэгъоу рекIо­кIыным лъэшэу анаIэ тетыгъ.
ПчыхьитIум «Ошъадэм» икъэ­гъэлъэгъонхэр шIухьафтын шъып­къэ тилъэпкъэгъухэм афэхъу­гъэх. «Синанэр», «Зэныбджэгъуищыр» «Ащэмэзым» иорэдыIохэм къадаIощтыгъ. «Удж-сандракъым», «Зыгъэлъа­тэм», чэчэн ыкIи убых къа­шъохэм лъэшэу Iэгу афытеощтыгъэх. «Синдикэм», «Бэгъэ­уджым», «Ащэмэзым» ахэт ар­тистхэм агу къызэрэдащэя­гъэр нэрылъэгъоу, чIыпIэм имысы­жьышъухэу кIэухым къа­фэтэ­джыщтыгъэх.

КАФФЕД-м итхьаматэу Хьалау Юнал «Ошъадэм» иартистхэм яIэпэIэсэныгъэ агу зэрэнэсыгъэр къыIуагъ:
«Пандемиер къемыжьэзэ «Ошъадэр» Тыркуем къэтщэнэу тыфэягъ, бэшIагъэу ыуж титыгъ. Тинасып къы­хьи зэкIэ къызэпыфэжьыгъ. Джы мы купыр Тыркуем ис адыгэмэ ашIэщт. Шъолъэгъу зэрапэгъокIыхэрэр, лъэшэу тигуапэ мыщ фэдэу тызэрэзэхахьэрэр, хэкумрэ Тыркуем ис адыгэхэмрэ зэрэзэпхыгъэхэр. Тикультурэ, тишэн-хабзэхэм якъэухъумэнкIэ ащ ишIогъэ­шхо къэкIощт».
КАФФЕД-м итхьаматэ игуадзэу Щэутыку Умар:
«Ошъадэр» профессионал куп зэхэт. Ар непэ тинэрылъэгъу хъугъэ. Якъа­шъохэмкIи, яорэд къэIуа­кIэкIи, яшъуашэхэмкIи, яоркестрэ имэкъэмэ къыхэгъэщыкIэкIи — мыхэр шэпхъэ лъэгэ дэдэмэ анэсыгъэх. Орэди, къашъуи, мэкъами — зэкIэ зы купым къегъэлъагъо — ар гъэшIэгъон ыкIи шъуашэ. Лъэшэу тыгу екIугъ».

Чэтэо Бедиа — КАФФЕД-м хэт:
«Мыщ фэдэ куп джыри тадэжь къэкIуагъэп. Лъэшэу тыгу екIугъ. Хэкум шъу­къикIи шъукъызэрэкIуагъэр бэу тигуапэ, тикIалэхэри зэрэшIэных. Тызэхахьэ къэс нахь зэпэблагъэ тызэфэхъущт. ШъукъэкIо зэпыт, тэ ар лъэшэу тигуап!»
«Ошъадэм» Истамбыл ятIо­нэрэ концертэу къыщитыгъэм нэбгырэ мин фэдиз къекIолIагъ. УФ-м и Консульствэ шъхьаIэ и Вице-консулэу Сергей Трофимовыр, Кавказ Хасэхэм я Кон­федерацие итхьаматэу Хьалау Юнал къэгъэлъэгъоным къе­- ­кIо­лIагъэхэм ащыщыгъэх. КАФФЕД-м итхьаматэ «Ошъа­дэм» иартист­хэм зэрафэразэр къыкIигъэтхъыгъ. Купым ипащэу Едыдж Викторие адыгэ къуаехэмрэ лъэпкъ Iэпэщысэхэмрэ КАФФЕД-м итхьаматэрэ Сергей Трофимовымрэ аритыгъэх.
«Мамырныгъэм илъэмыдж тытетэу тыкъэкIуагъ, лъэпкъ зэшIуны­гъэм, лъэпкъ кIэным икъэу­хъумэн тафэлажьэ. Ащ фэдэу лъыкIотэ­нэу, тизэпхыныгъэ­хэр нахь пытэ хъунхэу тыщэгугъы», — къы­Iуагъ Едыдж Викторие.
Тыркуем, Урысыем ыкIи Адыгеим ябыракъхэр къэгъэлъэгъоным икIэух сценэм къыдахьыягъэх. Лъэпкъ культурэр лъэпкъ зэгурыIоныгъэм фэIорышIэ.
Тэу Замир.
Адыгеир – Тыркуер.
Сурэтхэр авторым иех.