Къэбэртэе-Бэлъкъарым инароднэ сурэтышIэу, мы лъэхъаным Германием щыпсэурэ Пашъты Алим иапэрэ къэгъэлъэгъон хьалэмэтэу «Мывэ» зыфиIорэр Адыгеим и Сурэт къэгъэлъэгъуапIэ къыщызэIуахыгъ.

Ащ фэгъэхьыгъэ Iофтхьабзэм хэлэжьагъэх Адыгэ Республикэм культурэмкIэ иминистрэу Аулъэ Юрэ, сурэтышIхэм я Союз итхьаматэу Елена Абакумовар, республикэм изаслуженнэ сурэтышIэу, Адыгеим и Сурэт къэгъэлъэгъуапIэ ипащэу Бырсыр Абдулахь, КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэ ипащэу ШъэуапцIэкъо Аминэт, лъэпкъ интеллигенцием илIыкIохэр, искусствэр зикIа­сэхэр.
Къэгъэлъэгъоным икIэщакIох Къэ­бэртэе-Бэлъкъарым ыкIи Адыгэ Респуб­ликэм культурэмкIэ яминистерствэхэр, Адыгеим и Сурэт къэгъэлъэгъуапIэ.
Пашъты Алим Дунэе зэнэкъокъу ыкIи къэгъэлъэгъоныбэмэ ахэлэжьагъ. СурэтышIыр шIыкIэ зэфэшъхьафхэм афэкъу­лай, графикэр, литографиер, скульптурэр, медиа-артыр, анимациер зызфигъа­зэхэрэм ащыщых.
СурэтышIымкIэ мы къэгъэлъэгъоным мэхьанэшхо иI — лIэшIэгъуныкъом къы­дэхъугъэ IэшIагъэхэм илъэпкъ гупсэ апэрэу уасэ къафешIы. Пкъыгъуи 100 фэдиз хъурэ, лъэныкъуабэ къизыгъэлъэ­гъукIырэ Iэпэщысэхэр, документальнэ фильмыр къэгъэлъэгъоным хэхьагъэх. Пашъты Алим къэгъэлъэгъоныр Iахьищэу ыгощыгъ: къашъор, трансформациер, микро ыкIи макрокосмосыр. Къэ­кIыхэрэр, псэушъхьэхэр сурэт ешIых, фарфорыр нахь куоу зыдэлэжьэрэ лъэ­ныкъомэ ащыщ.
Адыгэ Республикэм культурэмкIэ иминистрэу Аулъэ Юрэ Iофтхьабзэр къызэIуихыгъ.
— ИжъыкIэ къыщыублагъэу адыгэхэм хьакIэр якIас. Непэ апэрэу Адыгеим къеблэгъагъ хьакIэ лъапIэу Пашъты Алим. Анахь тызыгъэгушIорэр тихьакIэ ылъапсэхэр тилъэпкъ къызэрэщежьэхэрэр ары. IэпэIасэм иIэшIагъэхэм гупшысакIэр, лъэпкъ нэшанэхэр апхырыщы­гъэх. ЧIыгур фимыкъоу, уашъом хилъэгъукIырэ лъэныкъуакIэм нэIуасэ тыфешIы. Лъэпкъым итхыдэ дахэу къэбгъэлъэгъон фаеу зыхъурэм, искусствэр, ащ изы Iахьэу сурэтшIыныр, шIыкIэ-амалышIоу зэрэщытыр Пашъты Алим къыушыхьатыгъ,— къыIуагъ Аулъэ Юрэ.
Кавказ ис лъэпкъхэм язэфыщытыкIэхэр зэрэпытэхэрэм, яискусствэ бай дэдэу зэрэщытым ыкIи нахьышIоу зэгъэ­шIэгъэн зэрэфаем игупшысэ IэшIагъэхэм уафащэ. IэкIыб къэралыгъом щэпсэуми, илъэпкъ ылъапсэ чIинагъэп.
Лъэпкъым игъашIэ дэIорышIэзэ, чIыгуи уашъуи къыригъэлъэгъукIызэ, IэпэIасэм игупшысэхэр ыIапэкIэ ыгъэ­чъынхэр фызэшIокIыгъ. ЦIыфхэм азыфагу зэгурыIоныгъэ илъыныр IофшIагъэ­хэм ямэхьэнэ лъачIэ хэлъ. Сурэтхэр щыIэныгъэм щыщых, куоу уагъэгупшысэ. IэшIагъэхэр лъэпкъ гупшысэм къыпкъы­рэкIых. Мыщ фэдэ искусствэр щыIэныгъэм иIотакIу. Пашъты Алим тын зэфэшъ­хьафхэр иIофшIагъэхэмкIэ къылэжьыгъ, сэнаущыгъэ инэу хэлъыр исурэтшIыгъэ­хэм къызэрахэщырэр къэгъэлъэгъоным икъызэIухын хэлажьэхэрэм хагъэунэфыкIыгъ.
Фарфорым хэшIыкIыгъэ анахь вазэ лъагэу «АРУРА» зыфаIоу Германием имузейхэм ащыщ чIэтыр Пашъты Алим ары зышIыгъэр. Ащ фэгъэхьыгъэу фильмым къыщеIуатэ. Гранитым хишIыкIыгъэ скульптурэу тонн 20 хъурэ «Жъогъо мыжъор» «Атажукинскэ сад» зыфаIоу Къэбэртэе-Бэлъкъарым щагъэуцугъэр сурэтым къыщигъэлъэгъуагъ. IэпэIасэм иIэшIагъэхэр къэпчъыгъуай, ишIэныгъэ куу нэрылъэгъу.
— АпэрэмкIэ, Адыгеим сыкъызэрэкIуа­гъэр сэркIэ насыпыгъ. Адыгэ чIыгур нэгушIоу къыспэгъокIыгъ. Германием илъэс 30 хъугъэу сыщэпсэу, КъБР-м сыщэлажьэ. СиIэшIагъэхэр слъы щыщ адыгэ лъэпкъым фэгъэхьыгъэх. Непэрэ къэгъэлъэгъонэу «Мывэ» зыфиIорэм къежьапIэ фэхъугъэр сидипломнэ Iоф­шIагъ ары. ПроектыкIэу згъэхьазыр­хэрэмкIэ тапэкIи адыгэ чIыгум сыдэгощэн гухэлъ сиI, — къыIуагъ Пашъты Алим.
ШэкIогъум и 3-м нэс къэгъэлъэгъоныр зэIухыгъэщт.