Тыркуем икъалэу Анкара къикIыгъэ IэпэIасэхэу Тхьац Щенесер, Кучба Эсен, Мамхыгъэ Салиха ыкIи АР-м иIэпэIасэхэр зыхэлэжьэгъэ зэIукIэгъу АР-м и Лъэпкъ музей ихьакIэщ щыкIуагъ. КъэралыгъуитIум ябзылъфыгъэхэу IэпэщысэшIыным пылъхэр дышъэидэным фэгъэхьыгъэ шIэныгъэхэмкIэ зэхъожьыгъэх.

Зэхахьэр къызэIуихыгъ АР-м культурэмкIэ иминистрэ игуадзэу Кушъу Светланэ.
— Общественнэ организациеу «Адыгэ Хасэм» итхьаматэу ЛIымыщэкъо Рэмэзан Тыркуем IэпэIасэхэр къикIынхэшъ, Адыгеим къызэрэкIощтхэр къызытеIом, лъэшэу тигъэгушIуагъ. ТихьакIэхэм тиIэпэIасэхэр аIудгъакIэхэ, IэпэIасэныгъэм ишъэфхэмкIэ шъузэдэдгъэгуащэхэ тшIоигъоу хьакIэщым шъу­къедгъэблэгъагъ, — къыIуагъ Кушъу Светланэ.
ХьакIэхэм къыздащэгъэ Iэпэщысэхэр къагъэлъэгъуагъэх. Дышъэидагъэр, ­лъэпкъ тхыпхъэр зыщыгъэфедэгъэ пкъы­гъохэр, жьыфыр, къэтэбэ Iэлъмэкъхэр, шъэгъэ хьалэмэтхэр, бгырыпхыхэр нэмыкI хьап-щыпхэр.
Анкара къикlыгъэ lэпэlасэу Тхьац Щенесер ащ щызэхэщэгъэ Адыгэ Хасэм итхьаматэ игуадз. ИсэнэхьаткIэ модельер, дэн-бзэным феджагъ.
— Лъэпкъым иIэшIагъэ лъызыгъэ­кIотэрэ дышъэидэным этническэ лъапсэ иI. Сэ сшъхьэкlэ мы lофым сызпылъыр илъэс 30 хъугъэ. Дышъэидэнэу тlэкlэзыжьырэм зедгъэужьыжьыныр тигухэлъэу ыуж тихьагъ. Тыркуем щылэжьэрэ Адыгэ Хасэхэм егъэджэнхэр ащызэхатщэхэзэ ныбжьыкlэхэм ар алъытэгъэ­Iэсы. Тэ типшъэрылъыр ахъщэ кlэтхыныр арэп, лlэужыкlэхэм ядгъэшIэныр ары нахь. Непэ мыщ фэдэ lэпэщысэхэр зышlэу, дышъэидэныр зыlэкlэлъыр нэбгырэ 300 фэдиз мэхъу, джыри игъэкIотыгъэу ащ тыдэлажьэ, — ыlуагъ Тхьац Щенесер.
Гъунапкъэ зимыIэ творчествэм иIэшIагъэхэм адыгэ шэн-хабзэхэр къырагъэлъэгъукIы. Дышъэидэныр ныбжьыкIэхэм арагъашIэзэ, дунэе культурэ иным иIахь анахь гъэшIэгъон фагъэнэIуа­сэх. Адыгэ лъэпкъым итарихъ къыпкъы­рыкIыхэзэ, адыгэу дунаим тетхэр дышъэ Iуданэм зэпэблагъэ зэфешIых, нахь пытэу зэрепхых.
АР-м иIэпэIасэхэу Сетэ Сафыет, Гумэ Ларисэ, Мыгу Рузанэ яIэшIагъэ ягугъу къашIыгъ.
— ТэркIэ зымыуасэ щыIэп тилъэпкъэ­гъухэм яIэпэIэсагъэ зэдгъэлъэгъуныр. Адыгэ лъэпкъым итарихъ, ишэн-хабзэхэм гукIэ зафэбгъазэмэ, бзылъфыгъэм ищыIэкIэ-псэукIэ, IэпэIасэм ишIыкIэшIу­хэр нахь куоу зэбгъашIэхэ пшIоигъоу зэгъэпшэнхэр ошIых. Дышъэ хэдыкIыныр адыгэ бзылъфыгъэм ылъ хэлъэу къэхъу, — къыIуагъ Гумэ Ларисэ.
Адыгэхэм яшэн-хабзэхэм ядэхагъэ IофшIагъэхэм къащэлъагъо.
— Адыгэмэ ядышъэидэн лъэпкъым илIэужыкIэ едгъэшIэным тызэрэхэлажьэрэм гушхуагъэ къытхелъхьэ. НыбжьыкIэхэр тилъэпкъ культурэ зэрэбаим, зэрэдахэм щыдгъэгъозэнхэм тапэкIи тыфэлэжьэщт, — къыIуагъ Анкара къикIыгъэ Кучба Эсен.
Лъэпкъым икультурнэ кIэн фэгъэхьыгъэ Iофтхьабзэхэр Тыркуем инэмыкI къалэхэми зэращызэхащэщтхэр хьакIэхэм хагъэунэфыкIыгъ. Адыгеим шIэныгъакIэу щызэрагъэгъотыгъэхэри яIэпэщысэхэм зэращагъэфедэщтхэр хагъэунэфыкIыгъ.

Лъэпшъыкъо Фатим.