БаскетболымкIэ Урысыем ичемпионат иапшъэрэ лигэ щешIэрэ «Динамо-МГТУ-м» къалэу Тобольскэ къэзыгъэлъэгъорэ «Нефтехимикым» тIогъогогъо IукIагъ.

БлэкIыгъэ илъэсым елъытыгъэ­мэ, тикомандэ хэпшIыкIэу зэхъо­кIыныгъэхэр фэхъу­гъэх. ТиешIакIохэм ащыщхэр «Динамо-МГТУ-м» хэкIыжьыгъэх, ахэм ащыщ «Нефтехимикым» зыгъэзэжьыгъэ Николай Муха. Командэм аштэгъэхэ Алексей Павловым, Константин Клементьевым ыкIи Даниил Волковым мы зэIукIэгъум уигъэрэзэнэу зыкъыщагъэлъэ­гъуагъ. ЕшIэгъуитIум язэфэхьысыжьхэмкIэ, нэбгырэ пэпчъ очко 35-м ехъу командэм къыфихьыгъ.
«Динамо-МГТУ-м» Тобольскэ щыриIэгъэ ешIэгъуитIури ­шIуахьыгъ. Джы чъэпыогъум и 16 – 17-м Екатеринбург ичIыпIэ командэ IукIэщт, шэкIогъум и 9 – 10-м Мые­къуапэ щешIэщт.