Адыгеим и Къэралыгъо филармоние и Нысхъэпэ театрэу «Дышъэ къошыным» ия 25-рэ илъэс хигъэунэфыкIыгъ.

Ащ фэгъэхьыгъэ Iофтхьабзэр къызэIуи­хыгъ АР-м культурэмкIэ иминистрэу Аулъэ Юрэ.
— АР-м и ЛIышъхьэу КъумпIыл Мурат, культурэмкIэ Министерствэм ацIэкIэ «Дышъэ къошыным» имэфэкIкIэ тыфэгушIо. Илъэс 25-рэ хъурэ творческэ гъогур ифэ­-шъуа­шэу къакIугъэми, джыри ныбжьыкIэх, дэгъубэ апэкIэ илъ. Партиеу «Единэ Россием» ифедеральнэ проектэу «Хэгъэгу цIыкIум икультур» зыцIэм ипрограммэу «Театрэхэр — кIэлэцIыкIухэм апай» зыфиIорэм ишIуагъэ­кIэ къэгъэлъэгъон гъэшIэгъонхэр къе­гъэхьазыры. 2017-рэ илъэсым къыщыублагъэу къэралыгъо субсидиехэр Нысхъэпэ теат­рэм къы­фэкIо ыкIи къэгъэлъэгъонхэр егъэуцух, — къыIуагъ Аулъэ Юрэ.
АР-м и ЛIышъхьэу КъумпIыл Мурат и Рэзэныгъэ тхылъ Адышэс Спартак ащ ритыжьыгъ.
МэфэкI Iофтхьабзэм хэлэжьагъ АР-м и Къэралыгъо Совет – Хасэм и Тхьаматэ игуадзэу Цэй Эдуард.
— «Дышъэ къошыным» имэфэкIкIэ сыфэгушIо. Илъэс 25-рэ хъугъэу кIэлэцIыкIухэр пшысэ хьалэмэти 100 пчъа­гъэм ахащэх, япIуныгъэ-гъэсэныгъэ дэлажьэх. Къэгъэлъэгъоным къыщыгущыIэрэ нысхъапэхэр сценэм тет артистхэмрэ кIэлэцIыкIоу еплъыхэрэмрэ зэрапхых, нахь зэпэблагъэ ашIых, яшIэныгъэхэм ахагъахъо, лъэпкъым игушъхьэ­лэжьыгъэ анаIэ нахь тырарагъадзэ, ныдэлъфыбзэм иIэшIугъэ алъегъэIэсы. Нысхъэпэ театрэр хэмытэу Адыгеим икультурэ нэгум къыкIэгъэуцогъуай. Шъуитворчествэ нахь лъагэу зиIэтызэ бэрэ шъулэжьэнэу сышъуфэлъаIо, — къыIуагъ Цэй Эдуард.
АР-м и Къэралыгъо Совет — Хасэм и Рэзэныгъэ тхылъ Нысхъэпэ театрэу «Дышъэ къошыным» къыфигъэшъошагъ. Ащ нэмыкIэу Цэй Эдуард рэзэныгъэ тхылъхэр аритыжьыгъэх: нысхъапышIэу ТIэшъу Светланэ, артистэу Сергей Вегериным.
ЗимэфэкIхэм къафэгушIуагъ УФ-м инароднэ артистэу, АР-м итеатральнэ IофышIэхэм я Союз ипащэу Зыхьэ Заурбый.
— Нысхъапэхэр цIыфым ицIыкIугъом къыщыублагъэу кIыгъух. Актерхэр мыгуlэхэу, гукlэ ащэчырэр къыбгурагъаlоу, lофышхоу ашlэрэм ори уадыхэтэу къып­щагъэхъоу спектаклэхэр «Дышъэ къошыным» егъэуцух. Непэ Нысхъэпэ театрэр тикIэлэцIыкIухэм ящыкIагъ, — къыIуагъ Зыхьэ Заурбый.
Рэзэныгъэ тхылъхэр ащ афигъэшъошагъ Нысхъэпэ театрэм ипащэу Джолэ Ларисэ, художественнэ пащэу Сихъу Станислав, режиссерэу Нэгъой Зурет, артистхэу Евгений Колычевым ыкIи Сергей Вегериным.
МэфэкIым къыдыхэлъытагъэу «Дышъэ къошыным» IофшIэгъу лъэхъаныкIэ къызэIуихыгъ. Апэрэу М. Лермонтовым ироманэу «Герой нашего времени» зыфиIорэм къыхэхыгъэ пычыгъоу «Бэла» къагъэлъэгъуагъ. Урысые политическэ партиеу «Единэ Россиер» кIэщакIо зыфэхъугъэ федеральнэ проектэу «Хэгъэгу цIыкIум икультур» зыфиIорэм ипрограммэу «Театрэхэр — кIэлэцIыкIухэм апай» зыцIэм ишIуагъэкIэ мыр агъэуцугъ.
— АР-м и ЛIышъхьэу КъумпIыл Мурат, культурэмкIэ министрэу Аулъэ Юрэ, министерствэм иотдел ипащэу Шэуджэн Бэлэ тафэраз титеатрэ непэ лэжьэн амал къызэрэратырэмкIэ. «Дышъэ къошыным» щыIэныгъэм упчIэу къыщытэджыхэрэр къыхигъэщынышъ, цIыфхэр ахэм аригъэгупшысэнхэр ары ипшъэрылъыр. Къэгъэлъэгъоным мэхьанэу иIэм кIэлэцIыкIухэр ригъэ­гупшысэн, яакъыл, язэхашIэ къыгъэущын фае. Артист дэгъум ыл узызэ ироль къызэришIырэм фэдэу, ащ еплъы­нэу театрэм къэкIуагъэхэм ар зэхари­гъэшIэн фае, — къыIуагъ Джолэ Ларисэ.
— Къэгъэлъэгъоным сценэм тет артистхэмрэ кIэлэцIыкIоу ащ еплъы­хэрэмрэ зэрепхых, нахь зэпэблагъэ ешIых, яшIэныгъэхэм ахегъахъо, лъэпкъ­хэм язэгурыIоныгъо-зыкIыныгъэ алъегъэIэсы. Нысхъэпэ театрэм ихудожественнэ пащэу, АР-м инароднэ артистэу Сихъу Станислав спектаклыр ыгъэуцугъ. СурэтышIэу, АР-м инароднэ сурэтышIэу Сихъу Рэмэзан, нысхъапэхэр зы­гъэхьазырыгъэхэ Хубецов Станислав, мэкъамэхэм адэлэжьэгъэ Иуаныкъо Бетал Iофышхо ашIагъ, — къыIуагъ спектаклэм ирежиссерэу Нэгъой Зурет.
Къэгъэлъэгъоныр кIэлэцIыкIухэм лъэшэу агу рихьыгъ ыкIи ягуапэу еплъыгъэх.
Лъэпшъыкъо Фатим.

Сурэтыр: Iэшъынэ Аслъан.