Бжыхьэ дзэ дэщыгъор чъэпыогъум и 1-м Адыгеим щырагъэжьагъ, ар тыгъэгъазэм и 31-м нэс кIощт.

Iофтхьабзэр республикэм зэрэщылъы­кIуатэрэм, федеральнэ гупчэм къафигъэуцугъэ пшъэрылъхэр зэрагъэцакIэхэрэм, гъэтхэ дзэ дэщыгъом изэфэхьысыжьхэм зыщатегущыIэгъэхэ пресс-зэIукIэ Адыгэ Республикэм идзэ комиссариат зэхищагъ.
Iофтхьабзэм хэлэжьагъэх АР-м идзэ комиссариат ипащэу Александр Авериныр, ныбжьыкIэхэр дэщыгъэнхэмкIэ ыкIи ухьазырыгъэнхэмкIэ отделым ипащэу Виталий Лебедевыр, АР-м идзэ комиссариат идзэ врачебнэ-комиссие итхьаматэу Игорь Буренковыр, комиссар шъхьаIэм иIэпыIэгъоу Одэжьдэкъо Руслъан, районхэм ащыIэ дзэ комиссариатхэм ятхьаматэхэр, журналистхэр.
Пресс-зэIукIэр дзэ комиссар шъхьа­Iэм къызэIуихызэ, бжыхьэ дзэ дэщы­гъом къыхиубытэу къулыкъур зыхьынэу къызытефэрэ нэбгырэ 2500-рэ фэдизмэ къызэряджэщтхэр къыхигъэщыгъ. Мы уахътэм ехъулIэу ахэм ащыщэу процент 80-м макъэ арагъэIун алъэкIыгъ.
— Мы илъэс зэкIэлъыкIохэм дзэм къулыкъур щызыхьы зышIоигъо ныбжьыкIэхэм япчъагъэ къыщыкIэрэп ыкIи адрэ илъэсхэм афэдэу федеральнэ гупчэм къытфигъэуцугъэ планыр зэрэдгъэцэкIэщтым сицыхьэ телъ. Зэрэхабзэу, дзэ дэщыным Iоф дэзышIэрэ комиссии 10-мэ яIофшIэн аублагъ. УФ-м ухъумэнымкIэ и Министерствэ иунашъокIэ Адыгеим щыщ ныбжьыкIэ 400 фэдиз къулыкъум дгъэкIощтыр. Ахэм лъэсыдзэхэм, мэшIокудзэхэм, ошъогу десантыдзэхэм, стратегическэ мэхьанэ зиIэ ракетыдзэхэм, хыдзэ флотым ыкIи Урысые Федера­цием и Лъэпкъ гвардие идзэхэм къулыкъур ащахьыщт. Альтернативнэ къулыкъур къыхэзыхыгъэхэр мыгъэ нахьыбэ хъугъэ, нэбгыри 9. Дзэ-учетнэ сэнэхьатым фагъэхьазырынхэмкIэ унашъоу къытфа­гъэуцурэр илъэс зэкIэлъыкIохэм Ады­геим и ДОСААФ проценти 100-м нэсэу егъэ­цакIэ, джыри шIэхэу водительхэу къулыкъум дгъэкIощтхэм яеджэн къаухыщт, — хигъэунэфыкIыгъ Александр Авериным.
Адыгеим идзэ комиссар шъхьаIэ къы­зэрэхигъэщыгъэмкIэ, дзэ комиссариатыр бжыхьэ дзэ дэщыгъом сыд фэдэрэ лъэ­ныкъокIи фэхьазыр, шъуашэхэри, гъомылапхъэхэри къыIэкIэхьагъэх. Бжыхьэ дзэ дэщыгъоу рагъэжьагъэм епхыгъэу зэхъокIыныгъакIэ зэрэщымыIэр А. Авериным къыIуагъ. Джыри повесткэхэр тхьапэхэмкIэ афагъэхьых.
Нэужым гъэтхэ дзэ дэщыгъоу блэкIыгъэм зэфэхьысыжь полковникым къыфишIыгъ. Ар зэрифэшъуашэу рекIокIыгъ, унашъоу къафагъэуцугъэр игъом агъэцэкIагъ, нэбгырэ 550-рэ фэдиз къулыкъум арагъэщагъ.
— Гъэтхэ дзэ дэщыгъом къыдыхэлъы­тагъэу дзэ комиссариатхэм яIофшIэн игугъу къэтшIымэ, апэрэ чIыпIэр Красногвардейскэ, Шэуджэн районхэм аубытыгъ, ахэм къакIэлъэкIо Адыгэкъалэ, Тэхъутэмыкъое ыкIи Теуцожь районхэм язэхэубытэгъэ дзэ комиссариат, ящэнэрэ хъугъэ къалэу Мыекъуапэ идзэ комиссариат. Муниципальнэ образованиехэм тахаплъэмэ, анахь чанэу Iоф зышIагъэ­хэм Шэуджэн, Красногвардейскэ район администрациехэр ащыщых, — къы­Iуагъ А. Авериным.
НыбжьыкIэхэм ямедицинэ уплъэкIун игугъу къэтшIымэ, зэхъокIыныгъэхэр зэрэфэхъугъэр къыхэщы. ИкIыгъэ илъэ­сым ибжыхьэ дзэ дэщыгъо изэфэхьысыжьхэм къызэрагъэлъэгъуагъэмкIэ, ныбжьыкIэхэм япроцент 64,4-м къулыкъу ахьын алъэкIыщт. ИпсауныгъэкIэ къулыкъур зыхьынэу къызтефэхэрэр ыпэрэ илъэсхэм ябгъапшэмэ, нахь макIэ хъугъэ.
Iофтхьабзэм икIэухым журналистхэр зыгъэгумэкIырэ упчIэхэр бэу къатыгъэх. Ахэр анахьэу зыфэгъэхьыгъэхэр Украинэм щыкIорэ хэушъхьафыкIыгъэ дзэ операцием, Курскэ ныбжьыкIэхэр ащэщтхэмэ ары.
— Ыпэрэ илъэсхэми къэсIуагъ ыкIи нафэ къытфашIыгъ хэушъхьафыкIыгъэ дзэ операцием мыщ фэдэ ныбжьыкIэхэр зэрамыщэхэрэр. Офицерхэр ыкIи дзэ­къу­лыкъушIэхэу зэзэгъыныгъэм кIэтхагъэхэр ары агъакIохэрэр. Арышъ, мы лъэныкъомкIэ ны-тыхэр гумэкIыгъо хэтынхэ ищыкIагъэп. Курскэ игугъу къэтшIымэ, ащ фэдэ хъугъэ-шIагъэ тыди къыщыхъун ылъэкIыщт ыкIи гъэнэфа­гъэу къулыкъу зыщахьырэ чIыпIэхэм мыр ахэтэп, — къыIуагъ Александр Авериным.
НэмыкI упчIэу къатыгъэхэми дзэ комиссар шъхьаIэм яджэуапхэр къаритыжьыгъэх.
Iэшъынэ Сусан.
Сурэтыр: Артур Лаутеншлегер.