Республикэ филармонием щыкIогъэ мэфэкI зэIукIэм Адыгеим и ЛIышъхьэу КъумпIыл Мурат лъэныкъо зэфэшъхьафхэм пэрытныгъэ ащызыIыгъ IофышIэхэм Урысые Федерациемрэ Адыгэ Республикэмрэ якъэралыгъо тынхэр щаритыжьыгъэх.

«Тихэку гупсэ, ащ итарихъ, икультурэ бай, гъэхъагъэу тиIэхэм лъэшэу тарэгушхо, ащ инеущырэ мафэ нахь дахэ зэрэхъущтым тицыхьэ теплъ. Адыгеим игъэхъагъэхэр зичIыгу гупсэ хьалэлэу, гуетыныгъэ фызиIэу щылажьэхэрэм ягъэхъагъэхэм къакIэкIуагъэх. ЗиIоф­шIэнкIэ, зизэчыйкIэ, къыхахыгъэ гъогум зэрэфэшъыпкъэхэмкIэ республикэм гъэхъагъэу иIэхэм ахэзыгъэхъорэ цIыфхэр мыщ чIэсых», — къыIуагъ АР-м и ЛIышъхьэ.
Хэгъэгум ипащэ Адыгэ Республикэм и ЛIышъхьэ иупчIэжьэгъоу Хъоткъо Хъызыр Нурбый ыкъом Iофэу ышIэрэм осэшхо къыфишIыгъ. Лъэпкъхэм язэ­къошныгъэ зэригъэпытэрэм, Херсон хэкумкIэ Геническэ районым IэпыIэгъу зэрэфэхъурэм афэшI Зэкъошныгъэм иорден ащ къыфагъэшъошагъ.
Медалэу «Адыгеим и Щытхъузехь» зыфиIорэр къэзэкъ генералэу, къэралыгъо IофышIэу, адыгэхэмрэ къэзэкъхэмрэ язэкъошныгъэ игъэпытэн зиIахьышIу хэзышIыхьэгъэ Громов Владимир Прокофий ыкъом фагъэшъошагъ. Джащ фэдэу орденэу «Хэгъэгум ыпашъхьэ гъэхъагъэу щыриIэхэм афэшI» зыфиIорэм имедалэу я II-рэ шъуашэ зиIэр лицееу N 19-м икIэлэегъаджэу Тыгъушъэ Олег къыфагъэшъошагъ.
Врачхэу Дыхъу Эммэ, Вячеслав
Кожушко, медсестра шъхьаIэу Марина Жилинам, фельдшерэу Шъаукъо Ольгэ щытхъуцIэхэу «УФ-м изаслуженнэ врач», «УФ-м псауныгъэр къэухъумэгъэнымкIэ изаслуженнэ IофышI» зыфиIохэрэр афагъэшъошагъэх. Красногвардейскэ районымкIэ Лениным ыцIэ зыхьырэ колхозым иинженер шъхьаIэу Анатолий Щербина щытхъуцIэу «УФ-м мэкъу-мэщымкIэ изаслуженнэ IофышI» зыфиIо-
рэр къызэрэфагъэшъошагъэм фэшI ­фэгушIуагъэх.
«Республикэми, хэгъэгуми яхэхъоныгъэ шъуиIахьышIу зэрэхэшъушIыхьэрэм фэшI лъытэныгъэшхо къэжъулэжьыгъ. ШъуиIоф хэшIыкIышхо зэрэфышъуиIэм ишIуагъэкIэ лъэныкъуабэмэ тащылъыкIотэн тэлъэкIы. ТапэкIи шъуегугъузэ шъузэрэлэжьэщтым, Адыгеим ихэхъоныгъэ шъузэрэфэIорышIэщтым тицыхьэ телъ», — къыIуагъ КъумпIыл Мурат.
Адыгэ Республикэр зызэхащагъэр илъэс 33-рэ зэрэхъурэм фэгъэхьыгъэ мэфэкI зэIукIэм Ioфтхьабзэр лъигъэкIотагъ.
Iофтхьабзэм хэлэжьагъэх УФ-м и Федеральнэ ЗэIукIэ хэтхэр, федеральнэ министерствэхэмрэ къулыкъухэмрэ ячIыпIэ подразделениехэм япащэхэр, АР-м иминистрэхэм я Кабинет хэтхэр, АР-м и Къэралыгъо Совет – Хасэм идепутатхэр, общественнэ IофышIэхэр, лэжьэкIо купхэм, ветеран организациехэм ялIыкIохэр, ныбжьыкIэхэр. Адыгеим и ЛIышъхьэу КъумпIыл Мурат АР-м и МафэкIэ къэзэрэугъоигъэхэм къафэгушIуагъ.
«ЧIыопс дахэ, культурэ бай зиIэ, хьакIэхэм дахэу зыщапэгъокIыхэрэ шъо­лъыр тыгъэпсэу Адыгеир щыт. БлэкIыгъэр тадэжь сакъхэзэ къыщаухъумэ, тятэжъ пIашъэхэм яшэн-хабзэхэр щагъэ­лъапIэх, уахътэм дэбэкъонхэмкIэ афэлъэкIырэр ашIэ. Ащ иапэрэ пащэхэу Джарымэ Аслъан, Шъэумэн Хьазрэт, ТхьакIущынэ Аслъан ацIэхэр егъэшIэрэу республикэм итарихъ къыхэнагъэх. Рес­публикэр ылъэ теуцоным, ащ ихэхъоныгъэ зиIахь хэзышIыхьэгъэ пстэуми лъэшэу тафэраз. Ащ фэдэ гъогум тырыкIозэ, Адыгеим ущыпсэуныр, Iоф щыпшIэныр, кIэлэцIыкIухэр щыппIунхэр нахь Iэрыфэгъу хъунымкIэ ткIуачIэ къы­хьырэр зэкIэ тэшIэ. ЦIыфхэм ящыIэкIэ-псэукIэ зыкъегъэIэтыгъэнымкIэ Президентэу Владимир Путиным къыгъэуцугъэ пшъэрылъхэр зэкIэ тэгъэцакIэх», — къыIуагъ КъумпIыл Мурат.
Хэгъэгум ипащэхэр яIэпыIэгъухэу лъэныкъо зэфэшъхьафхэмкIэ проектипшI пчъагъэ республикэм щагъэцакIэ. Мы аужырэ илъэсхэм къиныгъоу къэтэджыгъэхэм ямылъытыгъэу, Адыгеим иэкономикэ инвестициеу къыхалъхьэхэрэм, ежь шъолъырым ифедэхэм къахэхъуагъ, мэкъу-мэщым хэхъоныгъэ ешIы. Джащ фэдэу Адыгеим ипсэупIэхэм ягъэ­кIэжьынкIэ Iофтхьэбзабэ зэрахьэ, гъогухэм, коммунальнэ инфраструктурэм язытет нахьышIу мэхъу, общественнэ чIыпIэхэм язэтегъэпсыхьан ыуж итых.

Социальнэ инфраструктурэм изытет нахьышIу шIыгъэнымкIэ Iофэу ашIэхэрэм республикэм и ЛIышъхьэ къатегущыIагъ. ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм IэпыIэгъу афэхъугъэнымкIэ республикэм бэ щызэшIуахырэр. Партиеу «Единэ Россиер», Народнэ фронтыр, общественнэ движениехэр, ныбжьыкIэ патриотическэ организациехэр якIэщакIохэу шIушIэ Iофтхьабзэхэр ренэу республикэм щызэрахьэх.
«Адыгеим исхэр къыддемыIэщтыгъэ­хэмэ, пшъэрылъхэм язэшIохын къин дэдэ къытщыхъущтыгъэ. ЩыIэныгъэм проектхэр щыпхырызыщыхэрэр, гъэхъа­гъэхэр зышIыхэрэр тичIыпIэгъу зэчыишIухэр, акIуачIэ къызэрихьэу лажьэхэрэр ары. ТкIуачIэ зэхатлъхьэзэ, Адыгеим хэхъоныгъэхэр етэгъэшIых. Адрэ шъо­лъырхэм тырягъусэу тапэкIи Урысыешхом хэхъоныгъэ егъэшIыгъэным ыуж титыщт», — къыIуагъ КъумпIыл Мурат.
Республикэм и ЛIышъхьэ Адыгеим исхэм мэфэкIымкIэ къафэгушIуагъ, псауныгъэ пытэ, щыIэкIэ-псэукIэ дэгъу яIэнэу, шIоу щыIэр зэкIэ къадэхъунэу, унагъо пэпчъ рэхьатныгъэ илъынэу, тидзэкIолIхэм псынкIэу ядэжь къагъэзэжьынэу афэлъэIуагъ.
Джащ фэдэу АР-м и Къэралыгъо Совет – Хасэм и Тхьаматэу Владимир Нарожнэр республикэм щыпсэухэрэм мэфэкIымкIэ къафэгушIуагъ. Адыгеим искусствэхэмкIэ иIэпэIасэхэмрэ итворческэ купхэмрэ мэфэкI концерт хьакIэхэм къафагъэлъэгъуагъ.