БзэджэшIагъэ зезыхьагъэхэм пщыныжь ягъэхьыгъэнымкIэ Федеральнэ къулыкъум (ФСИН) ипащэу Аркадий Гостевым Адыгеим и ЛIышъхьэу КъумпIыл Мурат нэIуасэ фишIыгъ Урысыем и ФСИН Адыгэ РеспубликэмкIэ и ГъэIорышIапIэ ипэщакIэу агъэнэфэгъэ подполковникэу Мерген Тубитовым.

Видеоконференцие шIыкIэм тетэу кIогъэ Iофтхьабзэм хэлэжьагъэх АР-м и Апшъэрэ хьыкум итхьаматэу Шумэн Байзэт, АР-м ипрокурорэу Игорь Шевченкэр, республикэм ихэбзэухъумэкIо къулыкъухэм япащэхэр.
Урысыем и ФСИН ипэщакIэ зэрэхигъэунэфыкIыгъэмкIэ, шъолъыр гъэIорышIапIэм ипащэу агъэнэфагъэм исэнэхьаткIэ IэпэIэсэныгъэшхо иI. 2002-рэ илъэсым Тубитов Мерген Алексей ыкъом уголовнэ-гъэцэкIэкIо системэм Iоф щишIэу ыублагъ. Илъэси 9 оперативнэ подразделениехэм къулыкъу ащихьыгъ, илъэси 5 пэщэ IэнэтIэ зэфэшъхьафхэм аIутыгъ. Аужырэ илъэси 2-м Урысыем и ФСИН АР-мкIэ и ГъэIорышIапIэ ипащэ иапэрэ гуадзэу щы­тыгъ.
Аркадий Гостевым Урысыем и ФСИН АР-мкIэ и ГъэIорышIапIэ ипэщагъэу Виталий Перхоровичрэ шъолъыр гъэIорышIапIэм Iутхэмрэ яIофшIэн осэ дэгъу къыритыгъ, ынаIэ зытыригъэтын фэе пшъэрылъхэр пэщакIэм къыфишIыгъэх.
Урысыем и ФСИН ипащэ республикэм и ЛIышъхьэ пщыныжь ягъэхьыгъэнымкIэ системэм иучреждениехэм, хьапсхэм къачIэкIыжьырэ ныбжьыкIэхэм IэпыIэгъу зэрафэхъурэм фэшI зэрэфэразэр къы­Iуагъ.
«Тизэдэлэжьэныгъэ нахь дгъэлъэшымэ, зэдытипшъэрылъхэм язэшIохынкIэ гъэхъэгъэшхохэр тшIынхэ зэрэтлъэкIыщтым сицыхьэ телъ», — къыIуагъ Аркадий Гостевым.
Республикэм игъэцэкIэкIо хэбзэ къу­лыкъухэм, ихэбзэухъумэкIо къулыкъухэм шъолъыр гъэIорышIапIэм зэдэлэжьэныгъэ дэгъу зэрэдыряIэр Адыгеим и ЛIышъхьэ къыхигъэщыгъ.
«Координационнэ зэIукIэм, Оперативнэ штабым, терроризмэм пэуцужьыгъэ­нымкIэ комиссием, нэмыкI къулыкъухэм зэрагъэнэфэгъэ шIыкIэм тетэу лъэныкъохэм язэпхыныгъэ лъэкIуатэ. Уголовнэ-гъэцэкIэкIо системэм иIофхэр нахьышIоу Адыгеим щызэхэщэгъэнхэмкIэ пшъэрылъхэр тызэгъусэу тапэкIи зэдызэшIотхыщтых», — къыIуагъ КъумпIыл Мурат.
Республикэм ипащэ джащ фэдэу псауныгъэм икъэухъумэн фэгъэзэгъэ учреждениеу ФСИН-м къыфэIорышIэхэрэм Iоф ащызышIэщтхэм ягъэ­хьазырынкIэ амалэу щыIэхэм ягугъу къышIыгъ.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.