Нэгъэплъэ Аскэрбый ифильмэу «Черкесхэр. Намыс гъогур» зыфиIорэм иапэрэ къэгъэлъэгъон чъэпыогъум и 1-м АР-м и Къэралыгъо филармонием щырагъэкIокIыщт. Черкесхэм ядзэ къулаиныгъэу, культурэу дунаим зэрыщызэлъашIагъэхэр ащ къыреIотыкIы. Ахэм лIыгъэу, гушхуагъэу ахэлъыр, зэрэдунаеу щызэлъашIэ хъугъэ шы лъэпкъ дэгъу­хэр, лъэпкъым икъамэ имэхьанэ ащыпхырыщыгъ.
Режиссерэу, УФ-м икинематографистхэм я Союз икъутамэу АР-м щыIэм ипащэу, режиссерэу Нэгъэплъэ Аскэрбый зыIудгъэкIагъ, гущыIэгъу тыфэхъугъ.
— Фильмым итехын, ар зэдгъэкIужьыным, къэгъэлъэ­гъоным фэхьазыр тшIыным зэкIэмкIи илъэси 2,5-рэ ыхьыгъ. ЛъэпкъыцIэр зыIэтрэ шэн-хабзэхэр къизыIотыкIырэр зы сыхьатрэ такъикъи 7-рэ макIо. Актерхэм ащыгъыгъэ шъуашэхэм язэгъэуIун къиныгъуа­бэ къыпыкIыгъ. Iашэхэм ащыщхэу къэлатыр, шхончыр, къа­мэхэр, сэшхохэр, нэмыкIхэри дгъэфедагъэх. Фильмым пшъэрылъ шъхьаIэу иIагъэр къыткIэхъухьэрэ ныбжьыкIэхэм яхэгъэгу шIу алъэгъоу пIугъэнхэр, тарихъыр ягъэшIэгъэныр, лъэпкъым тхьамыкIагъоу пэкIэкIыгъэр агурыгъэIогъэныр ары. Адыгэм и Мафэ ехъулIэу фильмыр Налщык апэу къыщыдгъэлъэгъуагъ, еплъыгъэхэр ыгъэрэзагъэх, — къыIуагъ Нэгъэплъэ Аскэрбый.
«Черкесхэр. Намыс гъогур» зыфиIорэр гупшысэ гъэнэфагъэхэр озыгъэшIырэ IофшIагъ. Адыгэ лъэп­къым тарихъ баеу иIэр сценарием хэолъэгъукIы.
Фильмым икъэгъэлъэгъон культурэм иунэхэм, гъэсэныгъэм иучреждениехэм ащылъагъэкIотэщт, неущ ыпкIэ хэмылъэу еплъышъущтых.
Лъэпшъыкъо Фатим.