Адыгэ Республикэм хэгъэгу кIоцI IофхэмкIэ и Министерствэ икъулыкъу зэфэшъхьафхэм яIоф­шIэн зэрэзэхащэрэр мы мафэхэм ныбжьыкIэхэм арагъэлъэгъугъ.
Мыекъуапэ икъэлэ парк хэбзэухъумакIохэм Iоф зэрашIэрэ Iэмэ-псымэхэр къыщагъэлъэгъуа­гъэх. Полицейскэхэм ямызакъоу нэмыкI хэбзэухъумакIохэри ащ къырагъэблэгъагъэх. Iоф зэра­шIэрэ Iашэхэр, шъуашэу ащы­гъ­хэр, хэушъхьафыкIыгъэ техникэу ыкIи Iэмэ-псымэу агъэфедэхэ- рэр ныбжьыкIэхэм ашIогъэшIэгъоныгъэх.
Мыщ фэдэ Iофтхьабзэ апэрэу зэхащагъ, нэбгырэ 500 фэдиз хэлэжьагъ. Ахэр апшъэрэ классхэм ащеджэрэ кIэлэеджакIох, Адыгэ къэралыгъо ыкIи Мыекъо­пэ къэралыгъо технологическэ университетхэм ястудентых.
Iофтхьабзэр къызэIуихыгъ АР-м хэгъэгу кIоцI IофхэмкIэ иминистрэ игуадзэу, полицием иполковникэу Виталий Элибековым.

— ХэбзэухъумакIохэм IофшIэ­нэу ашIэрэм имэхьанэ къыжъу­гурыIон фае. Лъэныкъо пэпчъ пшъэрылъэу иIэр, IофшIэнэу ыгъэцакIэрэр шъулъэгъущт. Гу­мэкIыгъоу апэ къикIыхэрэр, ахэр зэрэзэшIуахыхэрэр къышъуфа­Iотэщт, упчIэхэр шъуиIэхэмэ яджэуапхэр жъугъотыщтых.
ЕджапIэр къызышъуухыкIэ шъуищыIэныгъэ зэшъупхыщт сэнэхьатыр къыхэшъухыщт. Профильнэ апшъэрэ еджапIэхэм узэрачIэхьащтыр къышъуфаIо­тэщт. Полицием Iоф щызышIэнэу фаехэр къызэрэшъухэтхэм тицыхьэ телъ. Нэбгырэ пэпчъ икъэралыгъо шIу ылъэгъун, ыгъэ­лъэпIэн, ар къызэриухъумэщтым пылъын фае. Урысыем, тишъолъыр хэхъоныгъэхэр ашIынхэр шъоры зэлъытыгъэр, — къыIуагъ Виталий Элибековым.
Нэужым ныбжьыкIэхэр куп-купэу гощыгъэхэу нахь ашIогъэ­шIэгъон лъэныкъохэм акIэрыхьагъэх. ЗэкIэмкIи къэгъэлъэгъони 6 хъущтыгъэ. АР-м хэгъэгу кIоцI IофхэмкIэ и Министерствэ илIыкIохэм цIыф зэрымыс быбы­рэ пкъыгъохэр зыфэдэхэр къагъэлъэгъуагъэх. НыбжьыкIэхэм нахь ашIогъэшIэгъоныгъэхэм ащыщ хьэ гъэсагъэхэм къаорэ пкъыгъохэр къызэрагъотыхэрэр. Ахэр зэрагъасэхэрэри къафаIотагъ.
Урысыем хэгъэгу кIоцI Iоф­хэмкIэ и Министерствэ епхыгъэ апшъэрэ еджапIэхэм узэрачIэ­хьащтыр, фэгъэкIотэнхэр зиIэхэр, ащ амалэу къытыхэрэр, IофшIэпIэ чIыпIэу нэужым аратыхэрэр кIэлэеджакIохэм къафаIотагъ.
Джащ фэдэу шъолъыр къулыкъу зэфэшъхьафхэм яIофшIэн зэрэзэхащэрэр ныбжьыкIэхэм нэрылъэгъу афэхъугъ. Хьыкум приставхэм, бзэджашIэхэм пшъэ­дэкIыжь ягъэхьыгъэнымкIэ федеральнэ къулыкъум и ГъэIорышIапIэу республикэм щыIэм, УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгеим щыIэм, Рос­гвардием ыкIи Урысыем и След­ственнэ комитет иследственнэ ГъэIорышIапIэ яIофышIэхэр ныб­жьыкIэхэм гущыIэгъу афэхъу­гъэх, агъэфедэрэ пкъыгъохэр арагъэлъэгъугъэх.
— НыбжьыкIэхэр дзэ къулыкъум фэгъэсэгъэнхэ, ащ имэхьанэ къагурыгъэIогъэн фае. Сыда пIомэ илъэс заулэкIэ ахэм дзэм къулыкъу щахьыщт. Арышъ, мыщ фэдэ Iофтхьабзэхэм мэхьанэшхо яI, — къыIуагъ дзэ патриотическэ клубым ипащэу Юрий Шестаковым.
Iофтхьабзэм къыдыхэлъытагъэу Мыекъуапэ итворческэ коллективхэу «Шпаргалка» ыкIи «Вечный огонь» зыфиIохэрэм концерт къатыгъ.
ДЕЛЭКЪО Анет.