ЗэIухыгъэ Урысые зэнэкъокъухэу «Лига ЧемпионОК» зыфиIорэм къуаджэу Еджэркъуае икомандэ Адыгеир къыщигъэлъэгъуагъ. 2012 – 2013-рэ илъэсхэм къэхъугъэ пшъашъэхэр ары зызыушэтыгъэхэр. Iофтхьабзэр Краснодар краим и ТIопсэ район щырагъэкIокIыгъ.

ТекIоныгъэм команди 10 фэбэнагъ. Ахэр Арзамас, Липецкэ, псэупIэу ПсышIуапэм, Махачкала, Полевскоим, Смоленскэ, Шъачэ, Ставрополь, Тобольскэ ыкIи къуа­джэу Еджэркъуае къарыкIыгъэх.
Кощхьэблэ кIэлэцIыкIу-ныбжьыкIэ спорт еджапIэм зыщызыгъа­сэхэрэм къатекIуагъэр Тобольскэ икоманд ары, адрэхэм зэкIэми къашIуахьыгъ. Ащ ишIуагъэкIэ Адыгеим илIыкIохэм тыжьын медальхэр къахьыгъэх. Ящэнэрэ чIыпIэр Липецкэ иволейболисткэхэм къыдахыгъ.

Командэ гъэхъагъэм дакIоу, турнирым иешIэкIо анахь дэгъу­хэу къыхагъэщыгъэх Дэгужъые Джэнэт­рэ Енэмыкъо Аидэрэ. Пшъашъэхэр зыгъасэхэрэр тренер-кIэлэегъаджэу Бэрзэдж Руслъан.