Экономикэ хэхъоныгъэм иамалышIух
Республикэм и ЛIышъхьэу КъумпIыл Мурат Адыгеим ибизнес-инкубатор зыщэIэм резидентхэм, учреждением ипащэхэм ыкIи иIофышIэхэм аIукIагъ. Iофтхьабзэм хэлэжьагъэх АР-м иминистрэхэм я Кабинет и Тхьаматэ игуадзэу ЛIыхэсэ Махьмудэ, экономикэ хэхъоныгъэмкIэ ыкIи сатыумкIэ министрэу Шэуджэн Заур.
2011-рэ илъэсым Мыекъуапэ республикэ бизнес-инкубаторыр къыщызэIуахыгъ, 2016-рэ илъэсым къыщегъэжьагъэу Джэджэ районым истаницэу Дондуковскэм чIыпIэ гъэнэфагъэхэр ащ къыщыфыхагъэкIыгъэх. Мыщ предприниматель IофшIэныр щезыгъэжьэгъакIэхэм ежьхэм яунэе бизнес къызэIуахынымкIэ IэпыIэгъу къащыфэхъух, фэгъэкIотэныгъэ хэлъэу унэхэр, чIыгу Iахьхэр ыкIи производствэм щагъэфедэщт Iэмэ-псымэ зэфэшъхьафхэр бэджэндэу щаратых.
Бизнес-инкубаторым ипащэ ипшъэрылъхэр зыгъэцэкIэрэ Хьасанэкъо Махьмудэ къызэриIуагъэмкIэ, предпринимательствэ цIыкIумрэ гурытымрэ IэпыIэгъу ятыгъэным фытегъэпсыхьэгъэ учреждениер зызэхащагъэм къыщегъэжьагъэу резиденти 120-м ехъумэ ащ ифэIо-фашIэхэр къызфагъэфедагъэх. ФэгъэкIотэныгъэ зыхэлъ уахътэу яIэр зекIым ыуж ежь-ежьырэу фэIо-фашIэхэмрэ товархэмрэ япхыгъэ Iофтхьабзэхэр зэшIуахыхэ хъугъэ. Апэрэ лъэбэкъур бизнесым щызышIыгъэхэр мебелышI предприятиеу «Данила мастер», IэшIу-IушIушI предприятиеу «Жак Андре» зыфиIохэрэр ары, джащ фэдэу чэтхэм, мэлхэм яхъункIэ, хэтэрыкIхэмрэ пхъэшъхьэ-мышъхьэхэмрэ ягъэшIоIункIэ, адыгэ къуаем иихынкIэ ыкIи нэмыкI лъэныкъохэмкIэ предприятие заул.
«ПредприятиякIэ пэпчъ экономикэм ихэхъоныгъэкIэ мэхьэнэ гъэнэфагъэ иI, анахьэу етIани цIыф псэупIэ цIыкIухэм адэсхэмкIэ. Ежьхэм яунэе бизнес пылъхэ зыхъукIэ, цIыфхэм ашъхьэкIи, яунагъокIи ящыкIагъэхэр зэрагъотылIэжьынхэ алъэкIыщт, IофшIэпIэ чIыпIакIэхэр щыIэ хъунхэмкIи яшIуагъэ ахэм къэкIо, чIыпIэхэм къащагъэхьазырырэ продукцие дэгъур бэдзэрым щащэ. Предпринимательствэм къэралыгъо IэпыIэгъоу еттырэм ренэу хэтэгъахъо, фэгъэкIотэныгъэхэр, субсидиехэр, грант IэпыIэгъур амал зэриIэкIэ нахьыбэ тэшIых. Бизнесым IэпыIэгъу етыгъэнымкIэ амалэу щыIэхэм нахь игъэкIотыгъэу цIыфхэр ащыдгъэгъозэнхэ, предпринимательхэми нахьыбэ IэпыIэгъу ятыгъэн фае», — къыIуагъ АР-м и ЛIышъхьэ.
Республикэ бизнес-инкубаторым непэкIэ ишIуагъэ зэригъэкIырэр 16 мэхъу. Ащ АР-м мэкъу-мэщымкIэ и Министерствэ, фермерхэм я Союз, республикэм и Сатыу-промышленнэ палатэ, Дондуковскэ мэкъумэщ техникумым гъусэныгъэ пытэ адыриI. ЕзыгъэжьэгъакIэхэм бизнесым икъулайныгъэхэр аIэ къырагъахьэх, студентхэми производственнэ практикэр акIу, IофшIэным ишъэф-
хэр зэрагъашIэх.
Республикэм и ЛIышъхьэ Джэджэ районым зыщэIэм Дондуковскэ мэкъумэщ техникумым ипащэхэм зэIукIэгъу адыриIагъ, агропромышленнэ комплексым IэпэIэсэныгъэ зиIэ IофышIэхэр фэгъэхьазырыгъэнхэмкIэ пшъэрылъэу щытхэм кIэлэегъаджэхэр нэIуасэ афашIыгъэх. Предприятиехэм яфэныкъоныгъэхэм япхыгъэу IофышIэхэр гъэхьазырыгъэнхэ зэрэфаер лъэныкъо пстэумкIи къыдалъытэщт.
«Мы аужырэ илъэсхэм мэкъу-мэщым зэхъокIыныгъэ инхэр фэтшIыгъэх, хъызмэт зехьанымкIэ технологиякIэхэр тэгъэфедэх, джырэ уахътэм диштэрэ научнэ ушэтын амалэу щыIэхэм акIэтэгъэгушIух. Анахь мэхьанэ зиIэр мы Iофтхьабзэхэм IэпэIэсэныгъэ ыкIи шIэныгъэ куу зиIэ IофышIэхэр адэлэжьэнхэр ары. Республикэм иэкономикэ пае IофышIэхэр егъэджэгъэнхэмкIэ, гъэхьазырыгъэнхэмкIэ амалхэр тIэкIэлъых, предприятиехэм гъусэныгъэ адытиIэу чIыгум щылэжьэн зылъэкIыщт цIыфхэр дгъэхьазырынхэ, еджэным дакIоу IофшIэнымкIи ящыкIэгъэ къулайныгъэр къызIэкIагъэхьаным тынаIэ тедгъэтын фае», — къыIуагъ Адыгеим и ЛIышъхьэ.
АР-м и ЛIышъхьэ ипресс-къулыкъу къытыгъэ къэбархэмкIэ Тхьаркъохъо Сафыет.