Ары зыфэгъэхьыгъагъэр АР-м и Къэралыгъо Совет – Хасэм и Тхьаматэу Владимир Нарожнэмрэ ащ игуадзэу Цэй Эдуардрэ зэхэсыгъоу зэхащэгъагъэр. Мы лъэныкъом фэгъэзэгъэ министерствэхэмрэ къулыкъухэмрэ ялIыкIохэр, шIэныгъэлэжьхэр ащ хэлэжьагъэх.

Iофтхьабзэр шъолъыр Парламентым зекIонымкIэ, экологиемкIэ ыкIи чIыопсым игъэфедэнкIэ и Комитет ипащэу Евгений Саловым къызэIуихыгъ. Ащ къызэриIуа­гъэмкIэ, шхъомч чъыгэу («конский каштан» зыфаIохэрэр) Мыекъуапэ иурамхэм атетхэм «минирующая» зыцIэ хъунэ лъэпкъыр къахэхьагъ. Специалистхэр чъыгхэм къарыкIощтым зэригъэгумэкIыхэрэр депутатым къыхигъэщыгъ. ПкIашъэм хъунэр зытетIысхьэкIэ, псэу кIэтыр къыкIешъушъ, егъэфыкъо, ащ ыпкъ къикIэу чъыгыр махэ мэхъушъ, охътэ кIэкIым уз къыхэхьэ.
Мы хьацIэ-пIэцIэ лъэпкъым псынкIэу зеушъомбгъу, илъэс къэс чъыгхэм атесыр нахьыбэ мэхъу, лъэшэу иягъэ арегъэкIы. Зэхэсыгъом къызэрэщыхагъэ­щыгъэмкIэ, Адыгеим изакъоп гумэкIыгъор зэрылъыр, Урысыем ишъолъыр 24-мэ а хъунэ лъэпкъыр ащагъэунэ­фыгъ.
Ащ узэрэпэшIуекIон плъэкIыщт шIыкIэхэм специалистхэр къатегущыIагъэх. ШIэныгъэлэжьхэу Алексей Бибинымрэ Евгений Грабенкэмрэ Калининградскэ хэкум щагъэфедагъэу, зишIуагъэ къэкIуа­гъэм анаIэ тырарагъэдзагъ. Зигугъу къашIыгъэр хьацIэ-пIацIэу е хьампIырашъоу зиягъэ къэзыгъакIохэрэр чъыгым къыримыгъэкIолIэнхэу «феромон» зыфаIорэ биологическэ веществохэр чъыг­хэм апылъэгъэнхэр ары. ЯтIонэрэу зигугъу къашIыгъэр чъыгым «исосудистэ системэ» мастэкIэ уц хэбгъэхъоныр ары.
Джащ фэдэу пкIашъэхэр къызпытэ­къужьхэкIэ, игъом ахэр Iупщыхэу бгъэстыхэмэ ишIогъэшхо къакIоу къаIуагъ. Ахэм захэзыгъэбылъыхьэгъэ хъунэр машIом дэкIодыщт. Анахь шъхьаIэу къы­хагъэщыгъэр мы шIыкIэхэм цIыфым, псэушъхьэхэм, бжьэхэм е нэмыкIэу шIуагъэ къэзытырэ хьацIэ-пIацIэхэм яягъэ зыпари зэрарамыгъэкIырэр ары.
ИкIэухым, пстэури къызэфахьысы­жьзэ, хъунэм пэшIуекIорэ шIыкIэхэр зыщаушэтыщтхэ чIыпIэ агъэнэфагъ. Шхъомчым икъызэтегъэнэн къэлэ паркым къыщырагъэжьэнкIэ енэгуягъо. Владимир Нарожнэм тишъолъыр иохабзэ къыдалъы­тэзэ, охътабэ тырамыгъашIэу хьацIэ-пIацIэр зэрагъэкIодыщт программэр агъэ­хьазырыныр шIокI зимыIэ Iофэу зэрэщытым къыкIигъэтхъыгъ.