Мы мафэхэм Мыекъопэ «Зэкъошныгъэр» поселкэу Прогрессым щыщ футбол командэу «Биолог-Новокубанск» зыфиIорэм ешIэгъу дыриIагъ. ЗыщешIагъэхэр Мыекъуап, республикэ стадионэу «Зэкъошныгъэр» ары.

Адыгеим икомандэ итренер шъхьаIэу Сергей Мирошниченкэр зыщагъэнэфагъэм къыщегъэжьагъэу мыр апэрэ ешIэгъу хъугъэ. Командэхэр зэрэзэIукIэщтхэр къаIопщыгъагъэп, ау тикомандэ шIу зылъэгъухэрэр ащыщыбэ стадионым къеблэгъэгъагъ. ЗэкIэхэри ешIэгъум ыгъэрэза­гъэх, пчъагъэр 2:0-у «Зэкъошныгъэр» текIуагъ. ЯтIонэрэ таймым Iэгуа­ор щыдэзыдзагъэхэр Даниил Антоненкэмрэ Ислам Оразаевымрэ.

ТапэкIэ Урысыем изэнэкъокъу­хэм къахиубытэрэ ешIэгъухэр щыIэщтых. Бэдзэогъум и 27-м Ростов икомандэу «Ростов-2» зыфиIорэм дешIэнэу «Зэкъошныгъэм» зегъэхьазыры.