Урысые физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэмкIэ ушэтынхэр Урысыем ишъолъырхэм мы илъэсым иятIонэрэ мэзищым зэращыкIуагъэхэм зэфэхьысыжьхэр фашIыгъэх.

Адыгэ Республикэм щыщ нэбгырэ 3466-мэ яухьазырыныгъэ а уахътэм ауплъэкIугъ. Хэгъэ­ушъхьафыкIыгъэ дышъэ тамыгъэ­хэр нэбгырэ 597-мэ къыдахыгъэх.
2024-рэ илъэсым, мэлылъфэгъум и 1-м къыщыублагъэу бэ­дзэогъум и 1-м нэс акIугъэ ушэтынхэмкIэ рейтингым Адыгэ Республикэр я 70-рэ чIыпIэм щыт. Шъолъыр 85-р пштэмэ, апэрэ чIыпIэм щытыр Ямало-Ненецкэ автономнэ шъолъырыр ары. Хэгъэгум исубъект 40-мэ якъэгъэлъэгъонхэм зэрахагъэ­хъуагъэр нафэ хъугъэ.
IофшIэным ыкIи зыкъэухъумэжьыным фэхьазырыгъэнымкIэ Адыгеим иинтернет-портал нэбгырэ 115386-мэ зыщарагъэтхыгъ. 2024-рэ илъэсым иятIонэрэ мэзищым а пчъагъэр 511-кIэ нахьыбэ хъугъэ.
Урысыер зэрэпсаоу пштэмэ, сайтым нэбгырэ 611902-мэ зыщарагъэтхыгъ, ахэм ащыщэу 551103-р ушэтынхэм ахэлэжьагъэх, нэбгырэ 379966-мэ ухьазырыныгъэ дэгъу дэдэу физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм ишапхъэ­хэм адиштэрэр къагъэлъэгъуагъ.
Нэбгырэ 303490-мэ хэгъэушъхьафыкIыгъэ дышъэ тамыгъэхэр къыдахыгъэх, 43913-мэ — тыжьын тамыгъэхэр, 32563-р джэрз тамыгъэхэмкIэ агъэгушIуагъэх.
2024-рэ илъэсым игъэтхэпэ мазэ комплексэу «IофшIэным ыкIи зыкъэухъумэжьыным сафэхьазыр» зыфиIорэм ыныбжь илъэси 10 хъугъэ. А уахътэм къыкIоцI хэгъэгум къыщаIэтыжьыгъэ движением нэбгырэ миллион 23,4-рэ хэлэжьагъ, ахэм илъэси 6-м къыщегъэжьагъэу илъэс 70-м нэс аныбжь. Ушэтын гупчэхэм миллион 14,5-мэ яухьазырыныгъэ къащагъэлъэгъуагъ. ХэушъхьафыкIыгъэ тамыгъэхэр нэбгырэ 10843978-мэ аратыгъ.

Ащ фэдэ тамыгъэ зиIэхэу апшъэрэ еджапIэмэ ачIахьэрэмэ фэгъэкIотэнхэр къафашIы, къэралыгъо ушэтынхэмкIэ баллэу къа­хьыгъэхэм афыхагъахъо. Ау ащ фэдэ унашъор еджэпIэ заведением иадминистраций ары зышIырэр.
Урысые физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм федеральнэ проектэу «Спортыр—щыIэныгъэм ишапхъ» зыфиIорэм ипшъэрылъхэр егъэцакIэх, ар лъэпкъ проектэу «Демографием» изы Iахь.
ШIоигъоныгъэ зиIэхэр зэкIэ мы ушэтын комплексым хэлэжьэнхэ алъэкIыщт.