Бэдзэогъум и 19-м ыкIи и 20-м пчыхьэм сыхьатыр 7-м Пушкиным ыцIэкIэ щыт унэм щыкIощт спектаклэ-фантазиеу «За гранью…» зыфиIорэр. Режиссерыр ыкIи зыгъэуцугъэр Абхъаз Республикэм изаслуженнэ артистэу Зыхьэ Зуралбый.

Ар узгъэщхырэ, гум лъыIэсырэ, мэхьэнэ куу зиIэ ыкIи джырэ уахътэм диштэрэ, ямышIыкIэу гъэпсыгъэ спектаклэу щыт. ЗэмынэIосэ хъулъфыгъищ камерэ зэжъум зэдифагъэх. Ахэр хэукъо­ныгъэу аIэкIэшIагъэхэм зэрапхых. Агъэ­тIысыгъэхэм шъхьафит хъужьынхэмкIэ гугъапIэу яIэр зэкIэ зэрапхырэр пшъа­шъэу очылэу къафагъэкIуагъэкIэ алъы­тэрэр ары. Ар къаIорэм, агу ихъыкIырэм, ягупшысэхэм, зыгъэгумэкIхэрэм акIэдэIукIы. Ау пшъашъэр апэрэ еплъы­гъомкIэ къызэрэпшIошIыщтым тетэу къызэрыкIоу щытэп.
Зы камерэм зэдисынхэу хъугъэ хъулъ­фыгъэхэр ядунэететыкIэкIи, ягупшысакIэкIи, язэхашIэкIи зэфэшъхьаф шъып­къэх, ау ахэр зэзыпхырэр зы – шъхьафитныгъэм фаблэх. Ежьхэм дао горэхэр зэфыряIэх нахь мышIэми, ныбджэгъуныгъэми а зэфыщытыкIэхэм чIыпIэ ащегъоты. Енэгуягъо ящыIэныгъэ­кIэ ежьхэм яфедэхэм анэмыкI горэми апэрэу ахэр ягупшысэнхэкIэ.