Адыгеим и ЛIышъхьэу КъумпIыл Муратрэ псыкъэкIуапIэхэм я Федеральнэ агентствэ и Пащэу Дмитрий Кирилловымрэ Красно­гвардейскэ районым кIогъагъэх уплъэкIун гухэлъ яIэу.

ЦIыфхэмрэ чIыпIэхэмрэ псыр къызиукIэ зэрарэу къафихьырэр дэгъэзыжьыгъэнымкIэ псы­Iыгъы­пIэхэм язытет зыщагъэ­гъозагъ ыкIи ащ епхыгъэ Iоф­тхьэ­бзэ гъэнэфагъэхэм атегущыIагъэх.
Урысые Федерацием и Правительствэ и Тхьаматэ игуадзэу Дмитрий Патрушевым ипшъэ­рылъхэр гъэцэкIагъэ хъунхэм къыдыхэлъытагъэу а Iофтхьа­бзэр кIуагъэ. Илъэсэу икIыгъэм жъоныгъуакIэм Темыр-Кавказ ыкIи Къыблэ федеральнэ шъо­лъырхэм язытет фэгъэхьыгъэ зэIукIэу кIуагъэм ахэм ягугъу къыщашIыгъагъ.
Iофтхьабзэм хэлэжьагъэх Адыгеим ыцIэкIэ Урысые Феде­рацием исенаторэу Александр Наролиныр, АР-м иминистрэхэм я Кабинет и Тхьаматэу КIэрэщэ Анзаур, тыкъэзыуцу­хьэрэ дунаир ыкIи чIыопс къэ­кIуапIэхэр къэухъумэгъэнхэмкIэ АР-м щыIэ ГъэIорышIапIэм ипащэу Сергей Колесниковыр, Красногвардейскэ районым ипащэу Гъубжьэкъо Темур, псы къэкIуапIэхэмкIэ Федеральнэ агентствэм къепхыгъэ Пшызэ псы ГъэIорышIапIэм ипащэу Роман Авдеевыр.

Апэ къызыщыуцугъэхэр къуа­джэу Хьатикъуаерэ Лэбапэрэ зэзыпхыхэрэ лъэмыджыр ары. Псыхъоу Пшызэ иджабгъу нэпкъ ылъэныкъокIэ лъэмыджым икIэгъэкъонхэм адэжь чъыгыжъхэр, ыхэкIэ нахь улъыкIуатэмэ, пшэхъо зэтырихьагъэхэр бэу щыплъэгъущтых. Псыр къызиу­кIэ, цIыф псэупIэхэм къакIэоным ищынагъо нахь ин мэхъу а чIыпIэхэм икъоу псыр зэрарымыкIорэм пае.
Урысыем псыкъэкIуапIэхэмкIэ ипащэу Дмитрий Кирил­ловым агентствэм ичIыпIэ къулыкъу пшъэрылъ фишIыгъ Пшызэ ичIыпIэхэу хэкIхэр зыщызэтырихьагъэхэм яIофыгъо зэшIуихынэу.
Адыгеим и ЛIышъхьэу КъумпIыл Мурат шъолъыр ГъэIоры­шIапIэмрэ Красногвардейскэ районым иадминистрациерэ пшъэрылъ афишIыгъ а лъэныкъомкIэ, Лэбэпэ районым ыкIи Пшызэ ипсыкъэкIуа­пIэ­хэмкIэ Iофтхьабзэу зэшIуахыщт­хэр, зэрэзэдэлэжьэщтхэр агъэнэфэнэу. ЛъэсрыкIохэр ыкIи автомобиль псынкIэхэр тхьа­мыкIагъо лъэмыджым къыте­хъухьаным щымыщынэхэу щызекIонхэм иамали мыщ щытегущыIагъэх.
Ащ нэужым зэIукIэм хэла­жьэхэрэм Пшызэ исэмэгубгъу нэпкъ дэжь щыIэ дамбэр къаплъыхьагъ. Дмитрий Кирилловым Iофтхьабзэхэр къыгъэнэфагъэх шапхъэу щыIэхэр укъуа­гъэ мыхъунхэмкIэ ыкIи псыхъоу Пшызэ щынэгъо лъэгапIэм нэсэу зыкъыIэтын зэрилъэкIыщтыр къыдалъытэзэ псырыкIопIэ тедзэ ашIын зэрэфаем анаIэ тыраригъэдзагъ.
ИкIэухым республикэм и ЛIы­шъхьэрэ Федеральнэ агентствэм и Пащэрэ Краснодар псы­IыгъыпIэм инэпкъэу псэупIэу Красногвардейскэм дэжь щыIэм изытет зыщагъэгъозагъ.

ПсыIыгъыпIэм икъокIыпIэ лъэныкъо дэгъукIыгъэ чIыпIэхэр иIэх, чъыгхэмрэ куандэхэмрэ бэу ахэм атет, псым зыкъызиIэткIэ, ахэр чIеухъумэх. Ащ нэмыкIэу псыр зэрэщэнджым къыхэкIэу аштрамым (водяной орехкIэ заджэхэрэм) зэлъекIу. Бассейным иукъэбзынкIэ Iоф­тхьабзэхэр зызэрамыхьэхэ-
кIэ, а чIыпIэр псыуцупIэ шIоеу хъущт, къыпэблэгъэ псэупIэхэм адэс цIыфхэми ящыIакIэ къыкIыригъэчын ылъэкIыщт.
ИкIэухым лъэныкъохэр зытегущыIагъэхэр Краснодар псы­IыгъыпIэм изытет гъэтэрэзы­гъэнымкIэ Iофтхьабзэхэм язэ­хэфын. КъызэраIуагъэмкIэ, ­лъэпкъ проектэу «Тыкъэзыуцу­хьэрэ ду­наир» зыфиIорэм ди­штэу къэралыгъо программакIэм а проектыр хагъэхьащт.
Адыгэ Республикэм и ЛIышъхьэ ипресс-къулыкъу къытыгъэ къэбархэмкIэ Тхьаркъохъо Сафыет.