ГъэцэкIэжьын IофшIэнхэр макIох
Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къызэрэщыдэлъытагъэу, 2024-рэ илъэсым къэлэ гъэпсыкIэ зиIэ поселкэу Яблоновскэм игъогуи 4-мэ ягъэцэкIэжьын лъагъэкIуатэ, ащ фэдэ IофшIэнхэм япроцент 50 фэдизыр агъэцэкIэгъах.
Зэзэгъыныгъэхэм адиштэу Яблоновскэм иурамхэу Центральнэм, Карл Маркс ыцIэ зыхьырэм, Коммунархэм яурам, Тэхъутэмыкъое районымкIэ поселкэу Новэм иурамэу ПсэолъэшIхэм ацIэ зыхьырэр джырэ шапхъэхэм адиштэу зэтырагъэпсыхьэх. Фирмэхэу «Дортранссервисымрэ» «Тэхъутэмыкъое ДРСУ-мрэ» ягъогушIхэм ощхыпсыр зэрылъэдэрэ псэолъакIэхэр агъэпсыгъэх.
Муниципальнэ образованиеу «Яблоновскэ къэлэ псэупIэм» иадминистрацие анахьэу ынаIэ зытыригъэтыгъэр гъогухэр зэрагъэцэкIэжьхэрэм дакIоу жъы хъугъэ псырыкIуапIэхэр зэблэхъугъэнхэр, электричествэр зэрыкIорэ гъучIычхэм япкъэухэр гъэкощыгъэнхэр, чIычIэгъ газрыкIуапIэхэм язы Iахь гъэцэкIэжьыгъэныр ары. Арэущтэу зыкIызекIуагъэхэр жъы хъугъэ коммуникациехэр гъэцэкIэжьыгъэнхэ фаеу зыхъукIэ гъогухэр икIэрыкIэу зэхамытIыхьажьынхэм пай.
Яблоновскэм щыкIорэ гъэцэкIэжьын IофшIэнхэм къадыхэлъытагъэу, асфальт зытелъ лъэс гъогухэр автомобиль гъогухэм абгъуитIукIэ ащагъэпсых, унэхэм якIурэ гъогухэми асфальт атыралъхьэ. КъэIогъэн фае зэзэгъыныгъэм диштэу гъогу зэхэкIыпIэхэм адэжь тIэкIу нахь ехьыхыгъэу лъэс гъогур зэрэщагъэпсырэр, сэкъатныгъэ зиIэхэмрэ лъэсрыкIо хьафизэхэмрэ атегъэпсыхьэгъэ плиткэкIэ ахэр зэрапкIэхэрэр.
Джащ фэдэу зигугъу къэтшIыгъэ урамхэм асфальт атыралъхьэ. Зэзэгъыныгъэхэм къазэращыдэлъытагъэм тетэу ахэм остыгъэхэр, гъогу тамыгъакIэхэр атырагъэуцощтых, агъэтхъыщтых, къэгъэгъэ, кондэ къэгъэкIыпIэхэр зэтырагъэпсыхьащтых.
Поселкэу Новый садым иурамхэм ащыщэу километрэ 0,67-рэ зикIыхьагъэу сомэ миллион 35-рэ зыпэIухьагъэр, Яблоновскэм иурамэу Карл Маркс ыцIэ зыхьэу сомэ миллион 45-рэ зытекIодагъэр непэкIэ хьазырых. Коммунархэм яурам щыщэу сомэ миллион 36-рэ зыпэIухьагъэм изэтегъэпсыхьан ыкIэм фэкIо. Мы псэупIэм иурамэу Центральнэм щыщ Iахьэу сомэ миллиони 145-рэ зытекIодагъэм телъытэгъэ гъэцэкIэжьын IофшIэнхэм япроцент 40-р зэшIуахыгъах.
ГъэцэкIэжьын IофшIэнхэр джыри къэлэ псэупIэм щылъагъэкIуатэх, щэIагъэ къызыхагъэфэнэу гъогушIхэр цIыфхэм къяджэх, федеральнэ лъэпкъ проектым диштэу гъогухэр зэрагъэцэкIэжьыщтхэмкIэ ахэр къагъэгугъэх.