Непэ фэдэ огъулэ ыкIи жъоркъ лъэхъаныр ма­­шIом зыкъыштэным ищынагъо зы­щы­хэ­хъо­рэ уахът. Аужырэ ма­фэ­хэри ащ ишы­хьатых.

ЧIыпIэ зэфэшъхьафхэм ма­шIом зыкъызэращиштагъэр къэ­барлъыгъэIэс амалхэм янэкIубгъохэм арыкIхэрэп. Мафэ къэс хъугъэ-шIэгъакI. АР-м ошIэ-дэмышIэ IофхэмкIэ икъулыкъуи хъурэ-шIэрэм цIыфхэр ренэу щегъэгъуазэх ыкIи сакъынхэм къыфэджэ. МашIом нахьыбэрэмкIэ зы­къызыщиштэрэр уцылъэ чIы­налъэхэр ары. Адыгеим ошIэ-­дэмышIэ IофхэмкIэ икъулыкъу ителеграм-нэкIубгъо къы­зэрэщытыгъэмкIэ, блэкIыгъэ тхьамафэм къыкIоцI, мэшIогъэ­кIосэ-къэгъэнэжьакIохэм ма­шIом зыкъыштагъэу гъогогъу 69-рэ дэкIыгъохэр яIагъэх. Пчъагъэм щыщэу 41-м ар къызыхэкIыгъэу агъэунэфы­гъэр уц гъугъэр ары.
Аужырэ хъугъэ-шIагъэхэм ащыщ бэдзэогъум и 14-м псэу­пIэу Подгорнэм ихэгъуа­шъхьэ дэжь къыщыхъугъэр. Тыгъэм зэхигъэгъухьэгъэ уц-­чъыг зэ­хэтэу чIыгу квадратнэ метрэ 650-рэ фэдиз хъурэм машIом закъыщиштэгъагъ. Лы­гъэм идэгъэзыжьын мэшIогъэкIосэ-къулы­къушIэ нэбгырэ 15-рэ техники 5-рэ хэлэжьагъэх.
Джащ фэдэу лыгъэм унэм зыридзыгъэуи агъэунэфыгъ. ПсэупIэу Хьэкъунае къыпыщылъ Приречнэм дэт унэм ибгъагъэ щыщ квадратнэ мет­рэ 15-р, щагум дэтыгъэ гъу­шъалъэхэр, уц гъугъэм зэлъи­убытыгъэ ­чIыгу гектар 700-р лыгъэм ыхьыгъэх. МэшIогъэ­кIосэ-къулыкъушIэ нэ­бгырэ 19-рэ техникэу 6-рэ машIом идэгъэзыжьын Iоф да­шIагъ. ХэкIодагъэрэ шъобж зы­тещагъэрэ щыIэп.
Зэпымыурэ огъулэ мафэхэм апкъ къикIэу ахэм афэдэ тхьа­мыкIагъохэр къэмыгъэхъу­гъэн­хэм фэшI бэдзэогъум и 15-м къыщегъэжьагъэу машIом зы­къыштэнымкIэ лъэхъан щынагъоу республикэм щагъэнэфагъ. ЦIыфхэм машIо амы­шIы­нэу, уц гъугъэ ыкIи ­хэкIхэр амыгъэстынхэу, унэхэм, ха­тэ­хэм къапыщылъ чIына­лъэхэр игъом аукъэбзынхэу АР-м ошIэ-дэмышIэ IофхэмкIэ икъулы­къу къэджэ. Ащ нэмыкIэу, хапIэ пэпчъ псы зэрыт псэуалъэхэр адэтынхэ ыкIи унэхэм якIолIэрэ гъогу­хэм уащызэблэкIышъунэу щы­тын фае.
Джащ фэд, машIо къэхъуным ищынагъо зыщыухъумэгъэным фэшI мэзхэм ахахьэ­хэрэм авто­мобильхэр ащ хамыгъэзыхьанхэм бэдзэогъум и 26-м нэс гъэлъэшыгъэу гъу­нэ лъафыщт. Мэз IофшIэнхэри агъэмэкIагъэх.
ЗыгорэкIэ мэзым лыгъэм зыкъыщиштагъэу гу лъызытэ­рэр телефонхэу: 8-800-100-94-00-мкIэ, 8(8772)52-22-29-мкIэ теонхэу АР-м мэз хъызмэтымкIэ и ГъэIорышIапIэ цIыф­хэм за­къыфегъазэ.
Ом изытет лъыплъэхэрэм къы­зэратырэмкIэ, фабэр джыри зэкIэкIощтэп, градус 39-м нэсэу мы тхьамафэми жъор­къыщт. Ащ елъытыгъэу, машIо къэхъунымкIэ я 4-рэ класс зиIэ щынагъо Адыгеим шъхьащыт. Арышъ, шъусакъ! ОшIэ-­дэмы­шIа­гъэ къэ­хъумэ, шъузытеощтыр: 01,101,112-рэ.
Мыекъуапэ машIор щынэгъончъэнымкIэ хэушъхьафыкIыгъэ хабзэ щагъэнэфагъ. Республикэм икъэлэ шъхьаIэ ипащэ къызэритыгъэмкIэ, бэдзэ­огъум и 15-м къыщыублагъэу:
— мэзым имыщыкIэгъэ шъып­къэу ухэты ыкIи къэлэ псэупIэм ыубытырэ чIыналъэм зэIухыгъэ машIо щыпшIы хъущтэп;
— машIор щынэгъончъэнымкIэ шапхъэу щыIэхэр зыукъо­хэрэм тазырэу атыщтым ха­гъэ­хъощт;
— хабзэр зыукъохэрэр агъэ­пщынэщтых зэрахьэрэ Iофхэм тхьамыкIагъо къызыздахьыкIэ!
ЛъыплъэкIо къулыкъухэмрэ полициемрэ, лъэтемыт ыкIи ком­мунальнэ къулыкъухэм, чIы­пIэ общественнэ зыгъэIорышIэ­жьыпIэхэм гъэлъэшыгъэ шIыкIэм тетхэу Iоф ашIэщт.
Лъэтемыт къулыкъухэр ма­шIом фэгъэхьыгъэ Iофыгъохэм ренэу алъыплъэщтых игъом къызщыкIэнэгъэ чIыпIэхэр агъэу­нэфынхэу ыкIи елбэтэу ахэм ядэгъэзыжьын ыуж ихьанхэу.
— Хъытыум машIом техыгъэ сурэтыр е видеор къижъугъэ­хьаным ыпэкIэ телефонхэу 101-м ыкIи 112-м шъутеу, къэба­рыр лъэтемыт къулыкъухэм аIэ­кIэжъугъахь. Ащ ишIуагъэ къэкIощт зыгорэм ищыIэныгъэ е имылъку къызэтенэнымкIэ, — закъыфигъэзагъ къэлэдэс­хэм Геннадий Митрофановым.
Адыгеим имуниципальнэ псэу­пIэхэри гъэлъэшыгъэ Iоф­шIакIэм техьагъэх.
Анцокъо Ирин.