Урысые почтэм и Мафэ фэгъэхьыгъэ Iофтхьабзэ Адыгэ Респуб­ли­кэм и Правительствэ зычIэт унэм щыкIуагъ. Адыгеим и ЛIышъхьэу КъумпIыл Мурат федеральнэ почтэ зэпхыныгъэм и ГъэIорышIапIэу Адыгэ Республикэм итым иIофышIэхэм афэгушIуагъ.

Мы зэIукIэгъум щыIагъэх АР-м и Къэралыгъо Совет — Хасэм и Тхьаматэу Владимир Нарожнэр, министрэхэм я Кабинет и Тхьаматэу ЛIыхэсэ Махьмуд, экономикэ хэхъоныгъэмкIэ ыкIи сатыумкIэ ми­нистрэу Шэуджэн Заур.
КъумпIыл Мурат почтэ зэпхы­ныгъэм иIофышIэхэмрэ иветеранхэмрэ ясэнэхьат мэфэкIкIэ афэгушIуагъ, почтэ къулыкъум социальнэ лъэныкъомкIэ мэхьанэу иIэр зэрэин дэдэр къыхигъэщыгъ. Анахьэу етIани къуаджэхэм ащыпсэухэрэмкIэ ыкIи пэIудзыгъэ чIыпIэхэм ащыIэхэмкIэ почтэ къутамэхэр анахь Iэрыфэгъоу щыт лъэныкъохэу алъытэх фэIо-фашIэхэр игъом ыкIи икъоу къаIэкIэхьанхэмкIэ.
«Арышъ, почтэ зэпхыныгъэм зыпкъитыныгъэ хэлъэу ыкIи цыхьэшIэгъоу иIофхэр зэшIуихынхэм, анахьэу етIани къэралыгъо IэпыIэгъур республикэм щыпсэухэрэм игъом къаIэкIэхьаным мэхьанэшхо тэркIэ иI. Ащ къыхеубытэх пенсиехэри нэ­мыкI ахъщэ IэпыIэгъухэри. Илъэси­тIу­кIэ узэкIэIэбэжьмэ Президен­тэу Владимир Путиным партиеу «Единэ Россиер» кIэщакIо зы­фэхъугъэ Iофтхьабзэм дыригъэ­штагъ, ар зэпхыгъэр къуаджэхэм почтэ Iофтхьабзэхэр зэращызэшIуахыхэрэм нэмыкIэу, уахътэм нахь диштэу зэхэщэгъэнхэр ары. Непэ къэралыгъом ипащэ пшъэрылъ къызэрафишIыгъэм тетэу ыкIи хэгъэгум и Пра­вительствэ иIэпыIэгъу хэлъэу Уры­сыем и Почтэ зэхъокIыныгъэшIухэр фэхъух. Ахэм зыкIэ ащыщ пэрыт цифрэ технологие­хэр IофшIэным зэрэщагъэфе­дэхэрэр, фэIо-фашIэу зэшIуа­хыхэрэр нахьыбэ зэрэхъухэрэр, зэпхыныгъэм иджырэ амалхэмкIэ почтэ къутамэхэр зэрэзэтырагъэпсыхьэхэрэр», — къы­Iуагъ АР-м и ЛIышъхьэ.
ИлъэситIоу блэкIыгъэм Адыге­им икъоджэ псэупIэхэм къутэмэ 30 ащагъэцэкIэжьыгъ, офисыкIэу 2 къызэIуахыгъ. Мы илъэсым джыри къутэми 3 агъэ­цэкIэжьыщт ыкIи кIэу почтэ офиси 4 къызэIуахыщт.
КъумпIыл Мурат къызэрэхигъэщыгъэмкIэ, почтэхэм яинфраструктурэ нахь зэтегъэпсы­хьэгъэным республикэм ипащэ­хэр фэхьазырых, зигъо Iофыгъоу къэуцухэрэм язэшIохынкIи яшIуагъэ къарагъэкIыным анаIэ ренэу тырагъэтыщт.

Ащ нэужым афагъэшъошэгъэ тынхэр аIэкIэгъэхьэжьыгъэнхэм епхыгъэ Iофтхьабзэр ублагъэ хъугъэ. АР-м и ЛIышъхьэ ирэзэныгъэ тхылъхэр аратыжьы­гъэх Федеральнэ почтэ зэпхыныгъэм и ГъэIорышIапIэу Адыгэ Респуб­ликэм щыIэм ипащэу Наталья Алифиренкэм, а IофшIапIэм ипащэ игуадзэу Виктория Дудкинам, къуаджэу Джэджэхьаблэ дэт почтэ къутамэу 385235-м ипочтальонэу Хьэшхъанэкъо Илья, Адыгэкъалэ дэт къутамэу 385200-м иоператорэу Дыхъу Назрэт.
Ащ нэмыкIэу АР-м и Къэралыгъо Совет — Хасэм ирэзэныгъэ тхылъхэр аратыжьыгъэх къуаджэу Джыракъые дэт поч­тэм икъутамэ ипащэу Аулъэ Ма­риет, Федеральнэ почтэ зэ­пхыныгъэм и ГъэIорышIапIэу АР-м щыIэм ибухгалтер шъхьа­Iэу Светлана Поповам, мы Iоф­шIапIэм иплановэ-экономическэ куп иIэшъхьэтетэу Ольга Литвиненкэм.
ИкIэухым Адыгэ Республикэм и ЛIышъхьэ IэпэIэсэныгъэ ин зэрахэлъым ыкIи пшъэдэкIыжь хэлъэу яIофшIэн зэрагъэцакIэ­рэм апае Урысыем и Почтэ иIофышIэхэм зэрафэразэр джы­ри зэ къыхигъэщыгъ. Рэзэныгъэ гущыIэхэр шъхьафэу ариIуагъэх почтэ зэпхыныгъэм иветеранхэм ясэнэхьат зэрэфэшъып­къагъэхэм, зышъхьамысыжьхэу Iоф зэрашIагъэм ыкIи почтэ IофшIэным епхыгъэ хэбзэ шIагъоу щыIэхэр нахь бай зэра­шIыгъэхэм апае.
Шъугу къэтэгъэкIыжьы: мы илъэсым мэкъуогъум Петербург щыкIогъэ дунэе экономи­ческэ форумым АР-м и ЛIышъхьэу КъумпIыл Муратрэ Урысыем и Почтэ игенеральнэ пащэу Михаил Волковымрэ Адыгеим ыкIи Урысыем и Почтэ зэдэлэжьэныгъэу азыфагу илъыщтым фэ­гъэхьыгъэ зэзэгъыныгъэм аIапэ кIадзэ­жьыгъагъ. А зэзэгъыныгъэр зыфэгъэхьыгъэр почтэ зэпхыныгъэм иамалхэр республи­кэм ис цIыфхэм нахь Iэры­фэ­гъоу къызфагъэфедэн алъэ­кIыныр, фэIо-фашIэхэм зя­гъэушъомбгъугъэныр ыкIи цIыф­хэмрэ бизнесымрэ апае электрон сервисхэм япчъагъэ хэ­гъэ­хъогъэныр ары.
Адыгэ Республикэм и ЛIышъхьэ ипресс-къулыкъу къытыгъэ къэбархэмкIэ Тхьаркъохъо Сафыет.