Гъэстыныпхъэ шхъуан­тIэр зимыIэхэм аIэкIэгъэхьэгъэным фытегъэ­псыхьэгъэ программэм ишIуагъэкIэ Адыгеим газыр имыIэу къэнагъэ­хэм япчъагъэ нахь ма­кIэ мэхъу зэпыт.

Мары джырэблагъэ джыри зы унагъо ар фатIупщыгъ.
«Социальнэ газификацием» ишIуагъэкIэ Мыекъопэ районым ит поселкэу Усть-Сахрай щыпсэурэ зэшъхьэгъусэхэу Осеев Николайрэ Алинэрэ гъэстыныпхъэ шхъуантIэр аIэ­кIа­хьэ хъугъэ. Мафэу ар зыщафатIупщыгъэм унагъом ихьэ­кIагъэх АР-м и Къэралыгъо Совет — Хасэм и Тхьаматэу Владимир Нарожнэр, Мыекъопэ районым ыкIи Да­хъо псэупIэ коеу поселкэр зы­хахьэрэм яадминистрациехэм япащэхэу Михаил Марьиныр, Григорий Бородкиныр, нэмыкIхэри.
Шъолъыр Парламентым и Тхьаматэ унагъом фэгушIуагъ, УФ-м и Президентэу Владимир Путиным пшъэрылъ къышIыгъэу гъэстыныпхъэ шхъуантIэр цIыфхэм аIэкIэгъэхьэгъэным фытегъэпсыхьэгъэ проекты­шхор зэрэпхыращырэр, псэу­пIэ­хэм зэкIэми газыр ящэлIэ­гъэ­ным епхыгъэ IофшIэнхэр шIуа­гъэ къатэу Адыгеим зэ­рэщылъагъэкIуатэхэрэр джыри зэ ащ агу къыгъэкIы­жьыгъ.
Поселкэу Усть-Сахрай гъэстыныпхъэ шхъуантIэр федеральнэ проектэу «ЗекIоным иинфраструктурэ зегъэушъомбгъугъэныр» зыфиIорэм къыдыхэлъытагъэу 2020-рэ илъэсым ращэлIагъ. Ар пстэум-
кIи километрэ 90-рэ мэхъу. «Социальнэ газификацием» ишIуа­гъэкIэ километри 6,8-рэ хъурэ кIуапIэхэр псэупIэ кIоцIым щызэбгыращыгъэх.
Гъэстыныпхъэ шхъуантIэм фэгъэзэгъэ компанием ипащэ къызэриIуагъэмкIэ, поселкэм дэсэу газыр фыращэлIэнэу зэзэгъыныгъэ къадэзышIыгъэр унэгъо 97-рэ мэхъу. Ахэм ащы­щэу 16-мэ яунэхэми ащызэбгыращынэу тхылъхэр къатыгъэх.