КушъхьэфачъэмкIэ дунэе зэнэкъокъоу «Урысыем итур» зы­фиIоу Башкирием щырагъэкIокIыгъэр едзыгъуиплIэу го­щыгъагъэ, ащ изэфэхьысыжь­хэм­кIэ, Адыгэ Республикэм щыщ спортсменыр апэ ишъыгъ.

Тишъолъыр къэзыгъэлъагъорэр Беларусым икушъхьэфэчъэ клубэу «Минск» зыцIэм хэтэу, спортым-
кIэ мастерэу СтIашъу Мамыр ары.
Зэнэкъокъухэм хэгъэгум ишъолъыр 18-мэ ыкIи Бе­ларусым къарыкIыгъэ спорт­смени 100-м ехъу ахэлэ­жьагъ. Ахэм ащыщэу зы нэбгырэр дунэе класс зиIэ мастер, 29-р Урысыем спортымкIэ имастерых. «Уры­сыем итур» иедзыгъуиплI къалэу Уфа, Чишминскэ ыкIи Иглинскэ районхэм яшъолъырхэм бэдзэогъум и 11-м къыщыублагъэу и 13-м нэс ащыкIуагъэх.
Едзыгъо пэпчъ гъогууа­нэмэ якIыхьагъэ километри 120-м къыщегъэжьагъэу 160-м нэсэу щытыгъ. Зэ­кIэмкIи гъогоу къакIугъэр километрэ 406-рэ мэхъу. СтIашъу Мамыр ятIонэрэ едзыгъоу поселкэу Калтымановэм щыкIуагъэм щатекIуагъ, зыщызэнэкъокъугъэхэ гъогум километри 139-рэ икIыхьэгъагъ.
Адрэ гъогууанэхэм ар яблэнэрэу, яенэрэу ыкIи япшIыкIузэнэрэу финишым къащысыжьыгъ. Ащ фэшI майкэ гъожьэу генеральнэ IэпэIэсэныгъэмкIэ пэрыт чIы­пIэр къэзыгъэлъагъорэр иеу къэнэжьы. Кушъхьэфэчъэ клубэу «Минскэм» итренер къызэриIуагъэмкIэ, ахэм амалэу щыIэр зэкIэ рахьы­лIэщт джырэблагъэ Респуб­ликэу Удмуртием едзыгъуитIу зэнэкъокъоу щыкIощтхэм СтIашъу Мамыр ащытекIоным пае. ЕдзыгъуиплI зэнэкъокъум ыуж кушъхьэфэчъэ клу­бэу «Минскэм» команднэ зачетымкIэ ящэнэрэ чIыпIэр ыубытыгъ, ащ ыпшъэкIэ кIуа­гъэхэр Санкт-Петербург щыщ командитIур ары.