Орэдымрэ къашъомрэ я Дунэе фестивалэу «Кавказыр ыкIи зэрэдунай орэмамыр!» зыфиIоу Тыркуем икъалэу Яловэ щыкIуагъэм ансамблэу «Мыекъуапэ инэфылъэхэр» хэлэжьагъ.

Кавказым ыкIи дунаим мамырныгъэр ащыгъэпытэгъэным фэгъэхьыгъэ фестивалыр Тыркуем щызэхащагъ. Къалэу Яловэ игубернаторрэ къалэм щылэжьэрэ Темыр Кавказ обществэмрэ фестивалым кIэщакIо фэхъугъэх.
Фестивалым иапэрэ мафэ Iофтхьабзэм хэлэжьэрэ къэшъуа­кIохэмрэ орэдыIохэмрэ нэIуасэ зэфэшIыгъэнхэм епхыгъэ зэIукIэхэр рагъэкIокIыгъэх. Илъэсыбэ хъугъэу къалэм пэблагъэу щыс чылэхэм къарыкIыгъэ хэхэс адыгэхэмрэ къэшъокIо купымрэ зэблагъэ хъугъэх. Ахэм пчыхьэ зэIукIэ — чэщдэс яIагъ.
ЯтIонэрэ мафэм Iофтхьабзэм къекIолIэгъэ купхэр зэхэт­хэу Яловэ игъогумэ арыкIуа­гъэх. Къэлэ гузэгум къыщышъуа­гъэх. Ащ къыкIэлъыкIоу чIыпIэ зэIухыгъэмэ къэшъуакIохэм якъэгъэлъэгъонхэр ащыкIуагъэх. Къалэу Яловэ иамфитеатрэ цIыкIу исценэ «Оркъ Къафэр» ансамблэм къыщишIыгъ.
«Мыекъуапэ инэфылъэхэм» япащэу, Урысыем культурэмкIэ изаслуженнэ IофышIэу, Адыгеим изаслуженнэ артистэу Нэныжъ Айдэмыр къалэм ипащэ зэIукIэгъу дыриIагъ. Кавказым имамырныгъэ агъэпытэзэ, фстивалыр зэдэлэжьэныгъакIэхэм якъэкIуапIэу, ащ хэлажьэхэрэм ясэнэхьат ишэпхъэ лъагэхэм ягъэлъэгъуапIэу зэрэхъущтым ицыхьэ зэрэтелъыр къалэу Ялова имэрэу Мехмет Гюрель хигъэунэфыкIыгъ.
— Ти Адыгей ищытхъу ти­лъэпкъ къашъохэмкIэ тыди щызэлъядгъашIэ тшIоигъоу лъэ­шэу тиIоф тегугъу, купым хэтхэми ягулъытэ мы лъэны­къомкIэ къызэрэтIэтыщтым тынаIэ тет. Дунаим мамырныгъэ илъэу цIыфхэр псэунхэр анахь шъхьаIэу щыт, — зэIукIэм къы­щиIуагъ Нэныжъ Айдэмыр.
КъэшъокIо купыр щыIагъ адыгэ чылэу Соуджакъ (Новоросийскэ икIыжьыгъэ адыгэхэр ащ бэу щэпсэух). Мэфэ реным купыр чIыпIэ гъэшIэгъонхэм къащаращэкIыгъ. СыхьатиплIырэ кIогъэ адыгэ джэгум хэлэжьагъэх. Чылэу Соуджакъ Тыркуем икъэшъокIо купыбэ къекIолIагъ. Нэбгырэ мини 5-м ехъоу къэзэрэугъоигъэхэр чэщ хъугъэу зэхэкIыжьыгъэх. Фестивалым иаужырэ мафэ изэфэшIыжьын тегъэпсыхьагъэу амфитеатрэм исценэ ин къэгъэлъэгъонхэр щыкIуагъ, гала-концертэу ар зэраухыжьыгъэм тиансамблэ къэшъуищэу «Лъэпэрышъор», «Щэщэныр», хореографическэ композициеу «Си Адыгей» зыфиIохэрэр къыгъэлъэгъуагъ. Пчыхьэзэхахьэм адыгэ джэгу ­къыдыхэлъытэгъагъ. Ащ хэлэжьагъэхэр зыщыщ лъэпкъымрэ бзэу аIулъымрэ емылъытыгъэу, къэшъоным ыбзэ фестивалым къекIолIэгъэ ныбжьыкIэхэр благъэ зэфишIыгъэх.
Фестивалым ыуж къыдэфэгъэ гъэпсэфыгъо мафэм къэшъокIо купыр Стамбул рагъэблэгъагъ, ащ ичIыпIэ дахэхэр зэрагъэлъэ­гъугъ.
Лъэпшъыкъо Фатим.