Мыекъуапэ щыщ Хьажъджэрый Бэллэ щэрыонымкIэ Урысые зэнэкъокъухэм джэрз медаль къащихьыгъ.

Бэдзэогъум и 3-м къыщегъэжьагъэу и 14-м нэс Московскэ хэкум ит комплексэу «Лисья нора» щэрыонымкIэ щызэнэкъокъущтых. Илъэс 15-м къыщегъэжьагъэу илъэс 17-м нэс зыныбжь спорт­сменхэу шъолъыр 37-мэ къарыкIыгъэхэр ахэм ахэлэжьэщтых.
ХэушъхьафыкIыгъэ чIыпIэхэр къыдэзыхыхэрэм медали 108-рэ аратынэу агъэнэфагъ. Московскэ хэкум къикIыгъэ командэр зэкIэми анахь ин, ащ спортсмен 76-рэ хэхьэ.
Адыгэ Республикэм ыцIэкIэ мы зэнэкъокъухэм ахэлажьэх Олимпийскэ чемпионэу Сергей Алифиренкэм ыгъэсэрэ Хьажъджэрый Бэллэрэ Урысыем изаслуженнэ тренерэу Георгий Гуляйченкэм ыгъэсэрэ Анна Андращукрэ. Аннэ я 4-рэ чIыпIэр, Бэллэ я 3-рэ чIыпIэр къыдахыгъ. Тыжьын медалыр зыхьыгъэр Краснодар краим щыщ спорт­сменкэу Юлия Лизун, дышъэр – Республикэу Удмуртием къикIыгъэ Евгения Падеринар ары.