Анцокъо И.
Чъэпыогъум мэф ошIухэмкIэ тегъэгушIо. ГурытымкIэ чэщ-зымафэм фабэр градус 15 — 16-м кIахьэ. Ащ елъытыгъ гъэфэбэгъу лъэхъаныр зыщырагъэжьэщтыр. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритырэмкIэ, чэщ-мэфитфым къыкIоцI фабэр градуси 8-м нахь макIэ хъумэ, унэхэр агъэплъынхэу аублэщт, фабэр къэзытырэ псэуалъэхэр ащ фэхьазырых.
Мыекъопэ къэлэ администрацием тызэрэщигъэгъозагъэмкIэ, мы тхьамафэм ыгузэгухэм адэжь къалэм фабэр щатIупщыщт. Социальнэ лэжьапIэхэр ублапIэ хъущтых. Ахэм къакIэлъыкIощтых къатыбэу зэтет унэхэр. Ащ ехъулIэу, шэкIогъум иапэрэ мафэхэм, нахь чъыIэ къэхъущтэу ащ лъыплъэрэ къулыкъум къеты.КъэIогъэн фае, гъэфэбапIэм иIофшIэн зыригъэжьэжьыкIэкIэ, ыкIуачIэ изэу фабэр къытыным мэфищ-тфыр пэIохьэ. Арышъ, гъэфэбэгъу лъэхъаныр аублагъэу, ау зиунэ зэу къэмыфэбагъэхэр мыгумэкIынхэу ащ иIофышIэр къыфэджэх. Игъорыгъозэ зэкIэми анэсыщт. СчетчиккIэ фэбапкIэр зытыхэрэм ащ къыридзагъэм елъытыгъэщт уасэу атыщтыр, ар зэрымытхэм фабэр къызатыгъэ мазэм къыщегъэжьагъэу ыпкIэ къафалъытэщт.Анцокъо Ирин.