Адыгеим лъэпкъхэм языкIыныгъэ и Мафэ зыфегъэхьазыры. Мыгъэ ащ мэхьэнэ хэхыгъэ иI — 2026-рэ илъэсыр УФ-м и Президентэу Владимир Путиным иунашъокIэ Урысыем щыпсэурэ лъэпкъхэм языкIыныгъэ и Илъэсэу агъэнэфагъ.
«Ащ джыри зэ къеушыхьаты ткIуачIэ зыкIыныгъэм, зэрэлъытэжьыныгъэм, культурэ шэн-хабзэхэм якъызэтегъэнэн ыкIи лъэпкъхэм язэкъошныгъэ къызэрагъэпсырэр», — къащитхыгъ исоциальнэ нэкIубгъохэм АР-м и ЛIышъхьэ.Лъэпкъ зыкIыныгъэм и Мафэ ихэгъэунэфыкIын къыдыхэлъытагъэу, хабзэ зэрэхъугъэу, Адыгеим имуниципальнэ псэупIэхэм зэкIэми мэфэкI Iофтхьабзэхэу республикэм щыпсэухэрэмрэ ащ ихьакIэхэмрэ зэзыпхыхэрэр ащыкIощтых. МэфэкI Iофтхьэбзэ шъхьаIэхэр Мыекъуапэ Лениным игупчэу дэтым щызэхащэщтых. Мафэм сыхьатыр 12-м «Мы — единое целое» шъхьэу зыфашIыгъэ концерт къыщатыщт. Лъэпкъ ыкIи культурэ зэфэшъхьафхэр къэзыгъэлъагъохэрэр бэу ащ щызэрэугъоинхэу ежэх. Пчэдыжьым къыщегъэжьагъэу муниципальнэ псэупIэхэм ячIыпIэ хэхыгъэхэр гупчэм щызэIухыгъэщтых, республикэм икъалэхэм ыкIи ирайонхэм ягъэхъагъэхэр ыкIи нэмыкIхэм къахэзыушъхьафыкIыхэрэр шъхьаджи зэригъэлъэгъун ылъэкIыщт. «Урысыем илъэпкъхэм я Ассамблее» ишъолъыр къутами, лъэпкъ-культурнэ объединениехэми лъэпкъ щагухэр агъэхьазырых.Джащ фэдэу гупчэм лъэпкъ Iэпэщысэхэм яфестивальрэ яермэлыкърэ щыкIощтых, Адыгеим цIыфлъэпкъэу щыпсэухэрэм якультурэ нахь благъэу зыфашIын алъэкIыщт, шIоигъоныгъэ зиIэхэм IэрышI Iэпэщысэхэу зыфэдэ къэмыхъугъэхэр къызIэкIагъэхьашъущтых.Урысыем ис лъэпкъхэм яшхыныгъохэри ахэм япщэрыхьапIэхэм зэхащэрэ фестивалым къекIуалIэхэрэм ауплъэкIушъущтых. Iофтхьабзэу «Пирог на четвертое» зышъхьэм къыхиубытэу мыIэрысэ зыдэлъ пирог ашIыщт, мэфэкIым хэлажьэхэрэм арагъэшхыщт.Спорт ыкIи культурнэ-гъэсэныгъэ Iофтхьабзэхэри мэфэкIым къыдыхэлъытагъэх. Урысыем щызэхащэхэу «Искусствэхэм ячэщ», «Этнографическэ Iорытхышхом», сурэт техыгъэхэм язэнэкъокъоу «Къэралыгъо анахь дахэр» зыфиIорэм Адыгеири ахэлэжьэщт. Республикэм щыпсэухэрэр джащ фэдэу шIушIэ проектхэм зэрапхыщтых. ГущыIэм пае, «Единэ Россием» инароднэ программэ къыхиубытэу хэушъхьафыкIыгъэ дзэ операциер зыщыкIорэм шIушIэ IэпыIэгъукIэ атIупщыщт.«Сицыхьэ телъ лъэпкъ зыкIыныгъэм и Мафэ джыри зэ къызэригъэшъыпкъэжьыщтым культурэ, бзэ ыкIи хэбзэ зэмылIэужыгъуабэу тиIэхэм Урысыери, Адыгеири нахь лъэшы зэрашIыхэрэр, тызэгъусэу ыпэкIэ тылъыкIотэнымкIэ зыкIыныгъэмрэ зэгурыIоныгъэмрэ IэпыIэгъу къытфэхъух!» — къытхыгъ КъумпIыл Мурат.