Шварц фэгъэхьыгъэ фестиваль

Студенческэ театрэхэм яапэрэ шъолъыр фестивалэу «Обыкновенное чудо» зыфиIорэр Мыекъуапэ щыкIуагъ. ТхакIоу, драматургэу Евгений Шварц къызыхъугъэр илъэси 130-рэ зэрэхъугъэм ар фэгъэхьыгъагъ.

Урысыем щыпсэурэ лъэпкъхэм языкIыныгъэ и Илъэс къыдыхэлъытагъэу УФ-м шIэныгъэмкIэ ыкIи апшъэрэ гъэсэныгъэмкIэ и Министерствэ иIэпыIэгъу­кIэ Iофтхьабзэр зэхащагъ. Ащ сомэ миллиони 4,5-рэ пэIуагъэхьагъ, Адыгэ къэралыгъо университетыр кIэщакIо фэхъугъ. Урысыем ишъолъыр зэфэшъхьафхэм ятеатрэ 13 фестивалым хэлэ­жьагъ. Шварц ипшысэхэм ахэт геройхэр зыхэлэжьэгъэхэ театральнэ къэгъэлъэгъонхэр зэхащагъэх.Советскэ тхакIоу, драматургэу, сценаристэу Евгений Шварц цIэрыIо зышIыгъэр ипшысэхэр ары. Ащ итхыгъэхэу «Золушка», «Сказка о потерянном времени», «Марья искусница» зыфиIо­хэрэр, нэмыкIхэри урысые культурэм идышъэ фонд хэхьагъэх.Фестивалым пшъэрылъ шъхьаIэу иIагъэр студентхэр зэрипхынхэр, ятвор- ческэ IэпэIэсэныгъэкIэ зэхъожьынхэр, ахэр театральнэ искусствэмрэ куль- турнэ кIэнымрэ нэIуасэ афэшIыгъэнхэр.Проект иным ипрограммэ гъэшIэгъо­нэу агъэпсыгъ. Чъэпыогъум и 19-м мэфэкI шIыкIэм тетэу АКъУ-м фестивалыр къыщызэIуахыгъ. УФ-м шIэныгъэмкIэ ыкIи апшъэрэ гъэсэныгъэмкIэ иминистрэ игуадзэу Ольга Петровам онлайн шIыкIэм тетэу пэублэ гущыIэ къышIыгъ.— АР-м и ЛIышъхьэу КъумпIыл Мурат ыцIэкIэ фестивалым хэлажьэхэрэм шIуфэс шъосэхы. Мыщ фэдэ проектхэр щыIэныгъэм щыпхырыщыгъэнхэм Адыгеим мэхьанэшхо щыраты. Ахэр тарихъ шIэжьыр, республикэм илитературнэ, икультурэ кIэн къэухъумэгъэнхэм фэлажьэх. Литературнэ зыкIыныгъэм игъо­гоу Евгений Шварц итворчествэ пхырыщыгъэр ныбжьыкIэхэм къагъэлъэгъощт, — къыIуагъ АР-м культурэмкIэ иминистрэу Аулъэ Юрэ.— Евгений Шварц сятэжъ. Ащ итворчествэ фэгъэхьыгъэ фестиваль зэхэтщэным илъэсыбэрэ сыкIэхъопсыгъ ыкIи ар непэ къыддэхъугъ, — къыIуагъ тхакIом икъорэлъфэу Мария Крыжановскаям.Адыгэ къэралыгъо университетым истуденческэ театрэу «Арт-Ритонымрэ» студиеу «Пространствэмрэ» Iофтхьабзэр къызэIуахыгъ. Евгений Шварц ипьесэу «Дон Кихот» къыхэхыгъэ пычыгъохэм къяджагъэх. Проектым къыдыхэлъытагъэу Астрахан къэралыгъо медицинэ университетым иныбжьыкIэ театрэу «Альма-Матерым» пшысэу «Обыкновенное чудо» зыфиIорэм техыгъэ къэгъэлъэгъон фестивалым къыщишIыгъ.

ЗэлъашIэрэ тхакIом ищыIэныгъэ гъогу, итворчествэ афэгъэхьыгъэ лекциехэр, егъэджэн сыхьатхэр чъэпыогъум и 20-м зэхащагъэх. Къызэхэхьагъэхэр Шварц зыфэдэгъэ цIыфыр, МыекъуапэкIэ ащ мэхьанэу иIагъэр, ежь тхакIом тикъалэ лъэшэу зэрикIэсагъэр къэгъэлъэгъонымкIэ ыкIи электроннэ лъэтегъэуцомкIэ арагъэшIагъ. ТхакIом икъорэлъфэу Мария Крыжановскаям студентхэр IукIагъэх, ятэжъ фэгъэхьыгъэ гукъэкIыжьхэмкIэ ар къадэгощагъ. «Проблемы развития студенческих любительских театров» зыфиIорэ семинарыр ныбжьыкIэхэм афызэхащагъ. Адыгеим ичIыопс, къэлэ тарихъым ыкIи таурыхъхэм ядунай афэгъэхьыгъэ экскурсие гъэшIэгъонхэр, лъэс зекIо гъогоу «Евгений Шварц и Мыекъуап» зыфиIохэрэр хьакIэхэм арагъэлъэгъугъ.ЗэхэщакIохэм зэрэхагъэунэфыкIыгъэм­кIэ, фестивалым зэнэкъокъу нэшанэ иIагъэп. Экспертхэм лъэныкъо зэфэшъхьафхэмкIэ анахь дэгъухэр къыхагъэщыгъэх, ахэм дипломхэр ыкIи нэпэеплъ шIухьафтынхэр аратыгъэх.— Илъэситф хъугъэу тиуниверситет «Шварц и Унэ» дэлажьэ. Урысыем щыпсэурэ лъэпкъхэм языкIыныгъэ и Илъэс тегъэпсыхьагъэу Евгений Шварц фэгъэхьыгъэ фестивалыр апэрэу зэхэтщагъ. Урысыем иапшъэрэ еджапIэхэм ащылэжьэрэ студенческэ театрэхэм ясэнаущыгъэ тхэкIошхом итворчествэ къыхэхыгъэ къэгъэлъэгъонхэмкIэ къаушыхьатыгъ. ЗэхэщакIохэм ацIэкIэ мыщ хэлэжьэгъэ студенти 126-мэ тызэрафэразэр ясIомэ сшIоигъу. Къэгъэлъэгъонхэм адэлэжьэгъэ эксперт купым IофшIэны­шхо ышIагъ, анахь дэгъухэр къыхагъэщыгъэх, — къыIуагъ искусствэхэмкIэ Институтым ипащэу Тыгъужъ Фатимэ.— Студенческэ театрэхэм яапэрэ шъо­лъыр фестивалэу «Обыкновенное чудо» зыфиIорэм мэхьанэшхо иIэу сэлъытэ. Тихэгъэгу имызакъоу, зэрэду­наеу щызэлъашIэрэ драматургым, тхэкIо цIэрыIом игукъэкIыжь фабэхэр лъэгъуп­хъэу ныбжьыкIэхэм сценэм къытыра­хьагъ,— къы­Iуагъ искусствэхэмкIэ Адыгэ респуб­ликэ колледжэу Тхьабы­сымэ Умар ыцIэ зыхьырэм икIэлэ­егъаджэу, теат­ральнэ критикэу, эксперт купым хэтэу Шъхьэлэхъо Светланэ.Студенческэ театрэхэм агъэуцугъэхэр къызщагъэлъэгъогъэ пчыхьэзэхахьэу чъэпыогъум и 23-м АКъУ-м щыкIуагъэр Iофтхьабзэхэм кIэух афэхъугъ.Лъэпшъыкъо Фатим.