Гъужъыекъо Рустам рэгушхох

Я 21-рэ лIэшIэгъум иублэгъум ЗАГС-м ирайон отдел пае унакIэ Тэхъутэмыкъуае щашIыгъагъ.

Архитектурэ шапхъэу къыхахыгъэм ебгъэпшэн псэуалъэ республикэм а лъэхъаным итыгъэп. Ау уахътэм унэр ыгъэтIэсхъагъ, къыкIэщхыщтыгъ, дэпкъхэр зэхэшъухьэщтыгъ. Къоджэдэсхэр ащ иIофышIэхэм IэпыIэгъу афэхъугъагъэх. А лъэхъаным джыри ныбжьыкIэ дэдагъ, ау ащ пае къымыгъанэу гъэцэкIэжьын Iофхэм чанэу ахэлэжьэгъагъ Гъужъыекъо Рустам. Джащыгъум къыбгурыIонэу щытыгъ ар чыжьэу зэрэлъыкIотэщтыр.Рустам Пшызэ къэралыгъо технологическэ университетыр къыухыгъ, экономист сэнэхьатыр зэригъэгъотыгъ. 2006-рэ илъэсым къыщыублагъэу илъэс 20-м ехъурэ цIыфхэм IофшIэн ягъэгъотыгъэнымкIэ Гупчэу Тэхъутэмыкъое районым щыIэм ипащэу, гъэсэныгъэ зиIэу, къулыкъушIэ Iазэу цIыфмэ Рустам ашIэщтыгъ ыкIи лъытэныгъэшхо фашIыщтыгъ.Ащ фэдиз уахътэм IофышIэхэри зэблэхъугъэ хъугъэ, ау ыпэкIэ Гупчэм щылэжьагъэхэми, джырэкIэ Iоф щызышIэхэрэми яеплъыкIэ инспектор шъхьа­Iэу Цуякъо Саидэ къыриIотыкIыгъ:— Рустам ныбжьыкIэ дэдэу IэнатIэм Iухьэгъагъэми, ар Тхьэм къыгъэхъугъэ пащэу теплъыщтыгъ: шъыпкъагъэ хэлъ, пшъэрылъхэр егъэуцух, ыIуа­гъэм текIырэп, ипшъэдэкIыжь зыдешIэжьы ыкIи IофышIэхэми ягукIаехэр ренэу зэхешIыкIы.ИIэпэIэсэныгъэ зэрэхигъэхъон фаер къызыгурыIорэ Рустам Урысыем ичIыпIэ зэфэшъхьафхэм кIощтыгъ, исэнэхьатэгъумэ яIофшIакIэ зыщигъэгъуазэщтыгъ. 2022-рэ илъэсым цIыфхэм IофшIэн ягъэгъотыгъэнымкIэ гупчэхэр гъэкIэжьыгъэнхэм фэгъэхьыгъэ пилотнэ проектыр зэрахьылIэщтым егупшысэхэ зэхъум, къыхахыгъэр Тэхъутэмыкъое районыр арыгъэ.

Рустам районым ыкIи республикэм ащыхъурэ-ащышIэрэм ренэу ынаIэ тетыгъ. Апэ ар Тэхъутэмыкъое къоджэ псэупIэм инароднэ депутатхэм я Совет идепутатэу хадзыгъагъ, нэужым щэгъогогъо районым инароднэ депутатхэм я Совет идепутатыгъ. Бюджетым, хэбзэIахьым ыкIи социальнэ-экономическэ хэхъо­ныгъэмкIэ комиссиеу Советым иIагъэм ипэщагъ, народнэ депутатхэм я Совет итхьаматэ игуа­дзэу щытыгъ.— Гъужъыекъом Iоф дэпшIэныр сыдигъокIи гъэшIэгъоныгъэ,— къеIуатэ ащ дэлэжьэгъэ ­Хъущт Хъариет – Тэхъутэмыкъое районым инароднэ депутатхэм я Совет иаппарат испециалист шъхьа­Iэ. – Гъэсэныгъэ зиIэу, гугъапIэхэр къэзытырэ Iофы­шIэу, гукъэкIыкIэхэр зикIэсэ цIыфэу щыт ­шъыпкъ.Пэщэныгъэ IофшIэным епхыгъэ шIэныгъэхэм ахигъахъо шIоигъоу Рус­там ятIонэрэ апшъэрэ еджапIэр — народнэ хъызмэтымкIэ ыкIи къэралыгъо къулыкъумкIэ УФ-м и Президент дэжь щыIэ Урысые академиер къыухыжьыгъ.Гъужъыекъом игъэхъагъэхэм осэ ин къафашIыгъ: Республикэм и ЛIышъхьэ и Рэзэныгъэ тхылъ, Къэралыгъо Советым — Хасэм ищытхъу тамыгъэу «Закон. Пшъэрылъ. Намыс» зыфиIорэр, Тэхъутэмыкъое районыр загъэпсыгъэр илъэси 100 зэрэхъугъэм фэгъэхьыгъэ медалыр, нэмыкIхэр.2025-рэ илъэсым цIыфхэм IофшIэн ягъэгъотыгъэнымкIэ АР-м икъэралыгъо къулыкъу и ГъэIорышIапIэ ипащэ игуа­дзэу Рустам агъэнэфагъ. Ащ ыуж федеральнэ гъэсэныгъэ программэу «Мэр­хэм яеджапI» зыфиIоу УФ-м и Президент дэжь щызэхащагъэм ар хэлэжьагъ. Программэм гъэIорышIэкIо IофышIэхэр егъэхьазырых, къулыкъушIэмэ яIэпэIэсэныгъэ ахегъэхъо. Бэ темышIэу, ­2026-рэ илъэсым ишышъхьэIу мазэ, АР-м и ЛIышъхьэ иунашъокIэ Рустам Абубачыр ыкъор IофшIэн ягъэгъотыгъэ­нымкIэ АР-м икъэралыгъо къулыкъу и ГъэIорышIапIэ ипащэу агъэнафэ.КъумпIыл Мурат пэщакIэм зэIукIэгъу зыдешIым, пшъэрылъыкIэхэр Гупчэм къыфигъэнэфагъэх: шъолъырым щырагъэжьэгъэ проектыкIэхэр агъэцэкIэныр, фондэу «Хэгъэгум иухъумакIохэм» якъу­тамэу республикэм щыIэм дэлэжьэнхэр, ащ ишIуагъэкIэ хэушъхьафыкIыгъэ дзэ операцием хэлэжьагъэхэмрэ ахэм яунагъохэмрэ IофшIэн ягъэгъотыгъэныр нахь агъэпсынкIэныр.Рустам иунагъо исмэ зэкIэмэ шIэныгъэ зэрагъэгъотыным мэхьанэшхо раты. Ишъхьэгъусэу Саидэ Пшызэ къэралыгъо университетыр къыухыгъ, филологие шIэныгъэхэмкIэ кандидат, Пшызэ къэралыгъо мэкъумэщ университетым IэкIыб къэралыгъуабзэхэмкIэ икафедрэ идоцент, научнэ IофшIэгъэ 40-м ехъу иI.Зэшъхьэгъусэмэ сабыитIу зэдапIу – Къэплъан илъэс 22-рэ ыныбжь, Радмилэ — илъэс 17.Пэрытныгъэ шэныр яшъэожъые хэлъэу къэтэджыгъ, ау анахьэу ар къызщыхэщыгъэр илъэс 19-м зынэсыр ары.Къэплъан ицIыкIугъом къыщегъэжьагъэу техникэм ыкIи конструированием апыщэгъагъ. РобототехникэмкIэ зэнэкъо­къумэ ахэлажьэщтыгъ, ахэм ащыщы­гъэх я V-рэ Дунэе робототехническэ фестивалэу «Робофинист-2018» зыфиIоу Санкт-Петербург щыкIуагъэмрэ я XI-рэ Урысые технологическэ фестивалэу «PROFEST-2019» зыфиIоу Москва щызэхащагъэмрэ.Къыхэгъэщыгъэн фае, Къэплъан рес­публикэ естественнэ-хьисап еджапIэр (РЕМШ-р) дэгъу дэдэкIэ къыухыгъ. Уахътэ къызщыфыхэкIырэм, адыгэ къашъохэм, кикбоксингым ыкIи есыным апылъ.ЕГЭ-мкIэ балл инхэр къызэрихьыгъэм ишIуагъэкIэ, анахьэу физикэмкIэ (балл 99-рэ), зыфэе апшъэрэ еджапIэ къыхихын амал иIагъ. Москва дэт научнэ-­ушэтэкIо технологическэ университетэу ежь ыгукIэ зыфэягъэм чIэхьагъ. Ащ къызэриIуатэрэмкIэ, ныбжьыкIэ дэдэу къэлэ шъхьаIэм зыдафэм, апэрэ илъэс­ныкъом еджэныр къехьылъэкIыщтыгъ, ау тIэкIу-тIэкIузэ нэIуасэхэр иIэ хъугъэ, апэрэхэм ащыщэу Адыгеим икIыгъэ студентхэм я Ассоциациеу зэхащэгъагъэм хэхьагъ. ЗэчIыгогъухэр зэрэшIэнхэмкIэ ыкIи IэпыIэгъу зэфэхъужьынхэмкIэ ащ мэхьанэшхо иI.Ассоциацием иIофшIэн чанэу хэлажьэу Къэплъан ыублагъ, нэужым ащ итхьаматэ хъугъэ. Организацием иофис Адыгэ Республикэм и ЛIыкIо IофшIапIэ иунэ чIэт. Ащ ныбжьыкIэмэ апае Iофтхьэбзэ зэфэшъхьафхэр щырагъэкIокIых. Ахэм Адыгеим, Къэбэртэе-Бэлъкъарым, Къэ­рэщэе-Щэрджэсым, Краснодар краим, Темыр Осетием ыкIи фэшъхьаф шъолъыр­хэм ащыщхэр чанэу ахэлажьэх.ИлъэсищкIэ узэкIэIэбэжьмэ зэхащэгъэ Ассоциацием Урысыем икъэлабэхэм ащеджэрэ тичIыгогъухэр зэрепхых, чIыпIабэмэ сообществэм икъутамэхэр къа­щызэIуахыгъэх: Санкт-Петербург, Ростов, Ставрополь, Саратов. Адыгеим иIэшъхьэтетхэр къадэIэпыIэхэзэ Ассоциацием хэтхэм яIоф агъэцакIэ. Зэгъусэхэу гъэ къэс проект инэу «IофышIэмэ яеджапIэу «Рыфабгъор» зэхащэ.2018-рэ илъэсым Москва щызэхащэгъэгъэ ныбжьыкIэ объединением къыкIэ­лъыкIуагъэу Ассоциациер плъытэмэ хъущт. НыбжьыкIэмэ ялIыкIо пащэу Москва а лъэхъаным щыхадзыгъагъэр АкIэгъу Закир — УФ-м и Правительствэ и Финансовэ университет истудент. Джырэ уахътэм Закир Заур ыкъор аспирантурэм щеджэ ыкIи КъокIыпIэ Чыжьэмрэ Арктикэмрэ хэхъоныгъэ ягъэ­шIыгъэнымкIэ Министерствэм щэлажьэ, IэкIыб Iофхэм афэгъэзагъ. ГущыIэгъоу дашIыгъагъэхэм ащыщ мары ащ къыщиIогъагъэр: «Ехьыжьэгъэ щыIэкIэ-­псэукIэу Москва дэлъым узщыхэтым, уихэгъэгу цIыкIу щыщ Iахь горэ бгъотыным осэшхо иI».Непэ Закир къэралыгъо IофшIэнышхо егъэцакIэми, Ассоциациер щыгъупшэрэп: «Адыгеим ыкIи ткъош республикэхэм къарыкIыгъэ ныбжьыкIэхэу Москва щыIэхэр зэзыпхырэ гукъэкIхэм ренэу адесэгъаштэ: мыщ фэдэ къэлэшхом уичIыгогъухэм яIэпыIэгъу щызэхэпшIэным мэхьанэшхо иI — зы нэбгырэр шъофым щызэолIэп. Нахь лъэшэу сызгъэгушIорэр Ассоциацием непэ ипащэу лэжьэрэ Къэплъан зэрэтичIыгогъур, сикъоджэ гупсэ зэрэщыщыр ары. Къэплъан сэнаущыгъэшхо хэлъ, игухэлъхэр къыдэхъунхэу, анахь лъэгэпIэ инхэм анэсынэу сыфэлъаIо».Къэплъан къызщыхъугъэ икъоджэ гупсэ егъэлъапIэ, уахътэ къыфыхэкIы къэс ар чылэм къэкIо, игупсэхэр ыкIи иныбджэгъу­хэр зэрегъэлъэгъух.Къэплъанэ ышыпхъу Радмилэ Тэхъутэмыкъое гурыт еджапIэм щеджэ, пшъэшъэжъыеми бэ темышIэу щыIэныгъэм игъогу къыхихыщт. ЯпшIэнэрэ классыр къызеухым, Радмилэ ишIэныгъэхэр ыуплъэ­кIугъэх, зэтыгъо къэралыгъо ушэтынхэм ахэлэжьагъ ыкIи урысыбзэмкIэ балл 94-рэ къыхьыгъ, джы апшъэрэ еджапIэм чIэхьанэу зегъэ­хьазыры. Радмилэ Тэхъутэмыкъое музыкальнэ еджапIэри къыухыгъ, адыгэ къашъохэм ыкIи есыным апылъ, художественнэ литературэр икIас.Ныжъ-тыжъхэу Долэт­хъанрэ Абубэчыррэ якIалэу Рустам щыIэныгъэ лъапсэу фашIыгъэр зэригъэфеда­гъэм, пIуныгъэу рагъэгъотыгъэм зэрэтемыкIыгъэм афэшI лъэшэу фэразэх, унагъом хэхъоныгъэу ышIырэмэ агъэгушхох, насыпышIоу залъытэжьы.Тэхъутэмыкъуае щыпсэурэмэ яцыхьэ Гъужъыекъо­мэ яунагъо телъ, джыри бэрэ ягъэхъагъэхэмкIэ агъэгушIонхэу мэгугъэх.АкIэгъу Разиет.Тэхъутэмыкъуай.