Кощхьэблэ районым ипсэупIэу Вольнэм щыщ Арсений Семеновым теннис цIыкIумкIэ Къыблэ федеральнэ шъолъырым изэнэкъокъу иедзыгъо зэрэщытекIуагъэм ишIуагъэкIэ ащ икIэух уцугъоу Москва щыкIощтым хэлэжьэнэу фитыныгъэ къыдихыгъ.
Зыныбжь илъэс 14-м шIомыкIыгъэхэрр зыхэлэжьэгъэхэ зэнэкъокъур чъэпыогъум и 22-м къыщегъэжьагъэу и 25-м нэс Славянск-на-Кубани щырагъэкIокIыгъ. Краснодар краим, Адыгеим ыкIи Къырым яспортсмен анахь лъэшхэм заушэтыгъ, зэкIэмкIи нэбгырэ 16-мэ.Арсений зэIукIэгъу 12 иIагъ, ахэм ащыщэу зыр шIуахьыгъ — къытекIуагъэр Краснодар щыщ Александр Шлындровыр, адрэхэм зэкIэми текIоныгъэ къащыдихыгъ. Республикэм илIыкIо IэпэIэсэныгъэшхо зэрэIэкIэлъыр къыгъэшъыпкъэжьыгъ. КIэух едзыгъом титеннисист Шытхьалэ щыщ Даниил Казарцевым IукIагъ ыкIи 3:1-у ащ текIуагъ. ЕшIэгъу 11 зырызэу яIагъэхэм ауж Семеновым, Шлындровым ыкIи Казарцевым очко пчъагъэу рагъэкъугъэр зэфэдизыгъ. Ау къэгъэлъэгъон тедзэхэмкIэ Адыгеим испортсмен апэрэ чIыпIэр ыубытыгъ. Александр Шлындровым ятIонэрэ чIыпIэр фагъэшъошагъ, Даниил Казарцевыр ящэнэр.Зэнэкъокъум икIэух едзыгъо тыгъэгъазэм и 21-м къыщегъэжьагъэу и 27-м Москва щыкIощт. Ащ хэлэжьэщт Арсений Семеновым гъэхъагъэхэр ышIынхэу фэтэIо.