ХьакIэщ къызэIуахыгъ

Къуаджэу Хьакурынэхьаблэ дэт лъэпкъ культурэмкIэ Гупчэм щагъэпсыгъэ хьакIэщым мы мафэхэм ипчъэхэр къызэIуихыгъэх.

МэфэкI Iофтхьабзэм хэлэжьагъэх АР-м культурэмкIэ иминистрэ игуадзэу Пхъэ­чыяшIэ Суандэ, АР-м лъэпкъ культурэмкIэ и Гупчэ ипащэ игуадзэу Анцокъо Фатимэ, АР-м илъэпкъ сурэтышIэу, ижъырэ орэдхэр къэзыIорэ купэу ­«Жъыум» изэхэщакIоу ГъукIэ Замудин, филологие шIэныгъэхэмкIэ докторэу, адыгэ IорIуатэм иугъоякIоу, профессорэу Унэрэкъо Рае, гуманитар ушэтынхэмкIэ Адыгэ республикэ институтым ­иIофышIэхэр, нахьыжъ лъапIэу районым исхэр.Iофтхьабзэр къызэIуихыгъ Шэуджэн район администрацием ипащэу Аулъэ Рэщыдэ.— Районым хьакIэщ ит зэрэхъугъэр хъугъэ-шIэгъэшху. Адыгэхэм сыдигъокIи хьакIэр агъэлъапIэщтыгъ, ижъыкIэ хьакIэщ зимыIэ унагъо щыIагъэп. Федеральнэ программэм ишIуагъэкIэ мы чIыпIэр гъэпсыгъэ хъугъэ. АР-м и ЛIышъхьэу КъумпIыл Мурат мыщ фэдэ къэралыгъо программэхэм тахэлэжьэн амал къызэрэтитырэмкIэ тыфэраз. АР-м культурэмкIэ и Министерствэ IэпыIэгъу ренэу къызэрэтфэхъурэр къыхэзгъэщы сшIоигъу. Лъэпкъ культурэм ибаигъэ къыткIэхъухьэрэ лIэужхэм ягъэшIэгъэнымкIэ, зэхэхьэ гъэшIэгъонхэр щырагъэ­кIокIынхэмкIэ хьакIэщыр чIыпIэ Iэрыфэгъу хъущт. ЦIыф кIуапIэ зэрэхъущтым тицыхьэ телъ, — къыIуагъ Аулъэ Рэщыдэ.Къэзэрэугъоигъэхэм АР-м культурэмкIэ иминистрэ ыцIэкIэ шIуфэс къарихыгъ ПхъэчыяшIэ Суандэ.— Лъэпкъ проектэу «Унагъом» ифедеральнэ проектэу «Семейные ценности и инфраструктура культуры» зыфиIорэм текIоныгъэ къыщыдэзыхыгъэхэм гухэ­лъэу ашIыгъэхэр зэрифэшъуашэу зэрэзэшIуа­хыхэрэм тегъэгушхо, ахэм якъызэIухын лъытэгъэкIуатэ. Адыгэ культурэм хэхъо­ныгъэ ышIынымкIэ, шэн-хабзэхэр нахь игъэкIотыгъэу арагъэшIэнымкIэ мы хьакIэщым мэхьанэшхо иI. Мыщ Iофтхьэбзэ зэфэшъхьафхэр щызэхащэщт, адыгабзэр щагъэжъынчыщт, лъэпкъ мэкъамэхэр щыIущтых. Джырэ лъэхъанымрэ ижъымрэ зэзыпхырэ чIыпIэу щытыщт. Лъэпкъ культурэм икIэн шъуи­шъыпкъэу шъузэрэдэлажьэрэмкIэ тышъу­фэраз, — къыIуагъ Суандэ.Миллионищэу къатIупщыгъэмкIэ чIыпIэ хэхыгъэ агъэпсыгъ, ар зэрифэшъуашэу, ижъырэ хьакIэщхэр унэгу къыкIигъэуцоу зэтырагъэпсыхьагъ. Джэныкъо машIор итэу, пIуаблэхэр дэпкъхэм апылъхэу, лъэпкъ Iэмэ-псымэ зэфэшъхьафхэмкIэ баеу щыт. ХьакIэу къекIолIагъэхэм Iэнэ лъэкъуищхэр апашъхьэ итыгъэх. Ахэм лъэпкъ шхыныгъохэр бэу атетыгъ.Хьакурынэхьаблэ дэт лъэпкъ культурэмкIэ Гупчэм ипащэу Iэшъхьэмэфэ Сусаннэ яIофшIэн зэрэзэхащэрэр къэзэрэугъоигъэхэм къафиIотагъ. ХьакIэщ агъэпсыным бэрэ зэрэкIэхъопсыщтыгъэ­хэр къыIуагъ.— Шэуджэн районым иапэрэ хьакIэщ тарихъым хэхьащт, бэгъонэу тыщэгугъы. ТиныбжьыкIэхэр адыгабзэкIэ гущыIэнхэм, зэрэадыгэхэр ащымыгъупшэным, шэн-хэбзэ дахэу тиIэхэр ашIэным, ахэр зэрахьанхэм, нахьыжъхэм шъхьэкIафэ афашIын зэрэфаер ащымыгъупшэным апае зэхахьэхэр редгъэкIокIыщтых, зэдэгущыIэгъу гъэшIэгъонхэр зэхэтщэщтых. АР-м и ЛIышъхьэ къытфигъэуцугъэ пшъэрылъхэр зэрифэшъуашэу дгъэ­цэкIэщтых. КъыткIэхъухьэрэ лIэужхэм ялъэпкъ культурэ шIу ядгъэлъэгъущт, адыгабзэкIэ дгъэгущыIэщтых, — къы­Iуагъ Сусаннэ.Зэнэкъокъум хэлэжьэнхэ зэхъум IэубытыпIэ ашIыгъэр зэлъашIэрэ купэу, ижъырэ орэдхэр къэзыIорэ, ижъырэ мэкъамэхэр къезыгъэIорэ купэу «Джэныкъом» иIофшIэн ары. Ар зылажьэрэр гъэрекIо илъэсипшI хъугъэ. Ащ ипащэу Юсуп Заур къызэриIуагъэмкIэ, пчыхьэзэхахьэхэр бэу зэхащэнхэ мурад яI, ахэм районым ис цIыф цIэрыIохэр къа­рагъэблагъэхэзэ ашIыщт. Купым иIэпэIэ­сэныгъи хагъэхъощт. ГъукIэ Замудин къаригъэлъэгъугъэ гъогум тетхэу «Джэныкъом» ижъырэ орэдхэр цIыфхэм арегъашIэ, тарихъэу ахэм апылъхэр къафаIуатэ. Урысые Федерацием ичIыпIабэмэ зэрифэшъуашэу закъыщигъэлъэгъуагъ. ХьакIэщ орэдкIэ купым икъэгъэлъэгъон ыублагъ, нэужым ­ижъырэ орэдхэр бэу къаIуагъ.Iофтхьабзэм икIэухым хьакIэу къе­кIолIагъэхэм ащыщхэр адыгэхэм хьакIэм мэхьанэу ратыщтыгъэм къытегущыIа­гъэх, шэн-хэбзэ дахэу ахэлъыгъэхэр агу къагъэкIыжьыгъэх, къызэIуахыгъэ хьакIэщыр цIыф кIуапIэ хъунэу къафэлъэIуагъэх.ДЕЛЭКЪО Анет.