Зэхэлъ амалхэм яшIуагъэкIэ

УФ-м и Правительствэ и Тхьаматэ игуадзэу Марат Хуснуллинымрэ Адыгэ Республикэм и ЛIышъхьэу КъумпIыл Муратрэ Iоф­шIэгъу зэIукIэгъу тыгъуасэ Москва щызэдыряIагъ. ЦIыфхэр зычIэсыщтхэ унэхэм яшIын, гъогу ыкIи коммунальнэ инфраструктурэм хэхъоныгъэ егъэшIыгъэным, лъэпкъ проектэу «ЩыIэныгъэм пае инфраструктурэр» зыфиIорэм япхыгъэ Iофыгъохэм атегущы­Iагъэх.

«Инфраструктурэм ихэхъоныгъэкIэ ыкIи цIыфхэм ящыIакIэ нахьышIу шIыгъэнымкIэ IофшIэныр Адыгэ Республикэм щылъэкIуатэ. Мы илъэсым пыкIыгъэ мэзибгъум къыкIоцI цIыфхэр зычIэсыщт унэ квадрат метрэ мин 455-м ехъу атIупщыгъ, фэтэрыбэу зэхэт унэхэу ашIыгъэхэр илъэсэу икIыгъэм елъытыгъэмэ, проценти 6-кIэ нахьыбэ хъугъэ. Инфраструктурнэ бюджет чIыфэхэм ягъэфедэни шIогъэшхо къеты. Ащ ­ишIуагъэкIэ 2022-рэ илъэсым къыщы­ублагъэу непэ нэс бюджетым хэмыхьэрэ инвестицие сомэ миллиард 22,9-рэ агъэфедэн алъэкIыгъ. А пстэуми яшIуа­гъэкIэ IофшIэпIэ чIыпIакIэу мин 1,4-м ехъу щыIэ хъугъэ. ТапэкIи амалэу щыIэхэр дгъэфедэнхэм, цIыф псэупIэхэм хэхъоныгъэ ашIыным лъэныкъо зэфэшъхьафхэр къыдэтлъытэхэзэ текIолIэным, IофшIэным зедгъэушъомбгъуным, цIыфхэм ящыIакIэ нахьышIу шIыгъэным апае Iэрыфэгъу амалхэр ядгъэгъотынхэм мэхьанэшхо иI», — къыIуагъ Марат Хуснуллиным.УФ-м и Правительствэ и Тхьаматэ игуадзэ республикэм ынаIэ къызэрэтыригъэтырэм, цIыфхэм ящыIакIэ нахьышIу шIыгъэнымкIэ зишIуагъэ къэ­кIорэ проектышхохэм ягъэцэкIэнкIэ IэпыIэгъу къызэраритырэм апае зэрэфэразэр къыIуагъ Адыгеим и ЛIышъхьэ. КъумпIыл Мурат къызэрэхигъэщыгъэмкIэ, цIыфхэр зычIэсыщтхэ унэхэм яшIын Адыгеим лъэшэу анаIэ щытырагъэты, инженер ыкIи транспорт инфраструктурэр гъэкIэжьыгъэнымкIэ бэ зэшIуахырэр. Республикэм зыпкъитыныгъэ хэлъэу тапэкIи хэхъоныгъэ ышIыным, экономикэм нахь зыкъыIэтыным, инвестициехэр нахьыбэу гъэфедэгъэнхэм, IофшIэпIэ чIыпIакIэхэр зэхэщэгъэнхэм а пстэури алъапсэ мэхъу. АР-м и ­ЛIышъхьэ а IофшIэным исоциальнэ лъэныкъо анахь мэхьанэ зиIэхэм зэращыщыр къыхигъэ­щыгъ. ПсэолъэшIыныр дэгъоу зэрэ­лъыкIуатэрэм ишIуагъэкIэ унэжъхэм цIыфхэр къачIэщыжьыгъэнхэм, ­кIэлэцIыкIу ибэхэм псэукIэ амалэу яIэхэр нахьышIу шIыгъэнхэм, сабыибэ зэрыс ыкIи унэгъо ныбжьыкIэхэм, хэушъхьафыкIыгъэ дзэ операцием хэлажьэхэрэм IэпыIэгъу ятыгъэным яамалхэр щыIэ мэхъух.«Урысые Федерацием и Президентрэ и Правительствэрэ лъэныкъо пситэумкIи ренэу яшIуагъэ къызэрэтагъэкIырэм къыхэкIэу а пшъэрылъхэр зэшIотхынхэ тэлъэкIы. Лъэпкъ проектэу «ЩыIэны­гъэм пае инфраструктурэр» зыфиIорэм илъэ­ныкъо заулэхэмкIэ Адыгеир анахь гъэ­хъэгъэ ин зышIыгъэ шъолъырхэм ахэхьэ. Непэ республикэм гъогухэмкIэ проектышхохэр щыпхыращых, цIыф псэупIакIэхэр нахьыбэ мэхъух, псэупIэ-коммунальнэ хъызмэтым иIофшIэни нахьышIоу зэхэщагъэ хъугъэ. ТицIыф псэупIэхэри нахь зэтегъэпсыхьагъэ, нахь дахэ мэхъух. Анахь мэхьанэ зиIэр ежь цIыфхэми а зэхъокIыныгъэхэр зэралъэ­гъухэрэр, якъалэхэм, якъуаджэхэм ыкIи ястаницэхэм язэтегъэпсыхьанкIэ гъэпсын Iофэу къырахьыжьэхэрэм чанэу ахэлажьэх. Хуснуллин Марат Шакирзян ыкъом тиреспубликэ ынаIэ къызэрэтыригъэтырэм пае сызэрэфэразэр джыри зэ къыхэсэгъэщы. ТапэкIи а IэпыIэгъум къытырэ амалхэр дгъэфедэщтых, федеральнэ гупчэм иIэпыIэгъу дакIоу цIыфхэм ящыIакIэ нахьышIу шIыгъэным пае рес­публикэм ежь амалэу иIэхэми нахь ахигъэхъощт», — къыIуагъ КъумпIыл Мурат.АР-м и ЛIышъхьэ къызэрэхигъэщыгъэм­кIэ, республикэм псэолъэшIыным джыри нахь зыщиушъомбгъунымкIэ яшIуагъэ къэкIо чIыпIэхэм яхэхъоныгъэ ипрограммэ зэшIохыгъэ зэрэхъурэм. А гухэлъхэм апае чIыпIэ 13 агъэнэфагъ, проект ­12-мэ япхырыщын рагъэжьагъ.ЗэIукIэгъум илъэхъан гъогухэм яшIын хэушъхьафыкIыгъэу анаIэ тырагъэтыгъ. КъумпIыл Мурат къызэрэхигъэщыгъэмкIэ, федеральнэ IэпыIэгъум ишIуагъэкIэ республикэм гъогухэми, цIыфхэми ящынэгъончъэнкIэ Iофтхьэбзэ гъэнэфагъэхэр щызэрахьэх. НепэкIэ республикэм иавтомобиль гъогухэм япроцент 80-м ехъур шапхъэхэм адештэ. ЗэIукIэгъум илъэхъан УФ-м и Правительствэ иIэпыIэгъу хэлъэу гъогу псэолъэ инхэу ашIыхэрэм атегущыIагъэх: Мыекъуапэ къэзыухьэрэ автомобиль гъогоу зишIын лъыкIуатэрэр, автомобиль гъогухэу «Гъозэрыплъэ – Лэгъонэкъэ тешъор», федеральнэ гъогум изы Iахьэу А-146-р, транспорт зэхэкIыпIэ зыхэтыщт гъогу Iахьэу километрэ 13 зикIыхьагъэр.Коммунальнэ инфраструктурэр гъэ­кIэжьыгъэным, цIыфхэр жъы хъугъэ унэхэм къачIэщыжьыгъэнхэм ипрограммэ игъэцэкIэн епхыгъэ Iофыгъохэр зэIукIэм илъэхъан къаIэтыгъэх. ГущыIэм пае, 2025 – 2026-рэ илъэсхэм ателъы­тэгъэ программэм тегъэпсыхьагъэу рахъухьагъэхэм ашъхьадэкIынхэ алъэ­кIыгъ: унэжъ фондым щыщ квадрат метрэ мини 2,1-м ехъум цIыфхэр къа­чIащыжьыгъэх, нэбгыри 120-мэ псэупIакIэ яIэ хъугъэ. Джащ фэдэу инфраструктурнэ бюджет чIыфэхэм яшIуагъэкIэ инженер ыкIи социальнэ инфраструктурэр гъэпсыгъэнымкIэ, зекIоным хэхъо­ныгъэ егъэшIыгъэнымкIэ, общественнэ транспортыр гъэкIэжьыгъэнымкIэ проектхэр зэшIохыгъэ мэхъух.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.