Iэшъынэ А.
Лъэпкъхэм языкIыныгъэ и Мафэ ехъулIэу, шэкIогъум и 3-м къыщегъэжьагъэу и 12-м нэс, онлайн ыкIи офлайн шIыкIэхэм атетэу «Этнографическэ диктантышху» зыфиIорэ Iофтхьабзэр Урысыем ишъолъырхэм ащыкIощт. Мы илъэсым ар я 11-у зэхащэ. Ащ фэгъэхьыгъэ пресс-конференцием Iофтхьабзэр Адыгеим зэрэщыкIощтым щытегущыIагъэх.
АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт пэублэм къызэрэщиIуагъэмкIэ, хабзэ зэрэхъугъэу, Адыгеим щыпсэухэрэр «Этнографическэ диктантышхом» чанэу хэлажьэх. Илъэс 11-м къыкIоцI ащ дунэе мэхьанэ иIэ хъугъэ.— Этнографическэ диктантышхор шэкIогъум и 3-м Адыгеим щыкIонэу агъэнэфагъ. Офлайн шIыкIэм тетэу ар тиреспубликэ ичIыпIи 3-мэ ащыкIощт: Лъэпкъ музеим, поселкэу Тульскэм культурэм и Унэу дэтым ыкIи Тэхъутэмыкъое районымкIэ А.Н. Березовскэм ыцIэ зыхьырэ гурыт еджапIэу N 2-м. Ащ хэбзэ къулыкъухэм яIофышIэхэр, лъэпкъ культурнэ организациехэм ялIыкIохэр къедгъэблэгъэщтых. Ахэм анэмыкIэу, шIоигъоныгъэ зиIэхэр онлайн шIыкIэм тетэу УФ-м Лъэпкъ политикэмкIэ исайт зыщатхынышъ, Iофтхьабзэм хэлэжьэнхэ алъэкIыщт, — къыIуагъ Долэ Долэт.Этнографическэ диктантышхор Урысыем игушъхьэлэжь баиныгъэ гъэпытэгъэным, уасэ фэшIыгъэным афэIорышIэщт. Онлайн шIыкIэм тетэу хэушъхьафыкIыгъэ дзэ операцием хэлажьэхэрэм яупчIэхэр къатынхэ алъэкIыщт. Мыр Iофыгъо шъхьаIэу щыт, ахэм яупчIэхэм яджэуапхэр къызIэкIагъэхьанхэ амал яIэщт.— Этнографическэ диктантышхоу гъэрекIо Москва щыкIуагъэм Адыгеим ыцIэкIэ сыхэлэжьагъ. Эфир занкIэм тетэу ар зэрищагъ Валдис Пельш. УпчIэ 20-м щыщэу зыр Адыгеим фэгъэхьыгъагъ. ПхъэкIычыр зие лъэпкъыр зыфэдэр къашIэнэу щытыгъ. Ащыгъум лъэшэу сшIогъэшIэгъоныгъ Адыгеим итарихъ бэмэ ашIэу къызэрэчIэкIыгъэр. Ащ урыгушхонэу щыт, — къыIуагъ комитетым итхьаматэ.— Адыгэ Республикэм лъэпкъ зэфэшъхьафхэм ащыщэу нэбгыри 110-рэ фэдиз щэпсэу. Сэнэхьатэу яIэм, лъэпкъэу зыщыщым ямылъытыгъэу, диктантым цIыфхэр зэрепхых. Лъэпкъхэм азыфагу зэгурыIоныгъэ ыкIи мамырныгъэ илъыным мы Iофтхьабзэр фэIорышIэ. Лъэпкъ культурнэ организациехэр мыщ къетэгъэблагъэх. Iофтхьабзэр дахэу, гум къинэжьэу рекIокIыным пае тиреспубликэ щыпсэурэ лъэпкъ зэфэшъхьафхэм яшъуашэхэр ащыгъхэу ащ хэлэжьэнхэу закъыфэтэгъазэ, — къыIуагъ Шъхьэлэхъо Аскэр.КIэухым комитетым итхьаматэ къэзэрэугъоигъэхэр зэрэщигъэгъозагъэхэмкIэ, лъэпкъхэм языкIыныгъэ и Мафэ фэгъэхьыгъэу Урысыем ис цIыф лъэпкъхэм языкIыныгъэ фэгъэхьыгъэ Дунэе фестивалым Адыгеир хэлэжьэщт. ШэкIогъум и 1-м къыщыублагъэу и 8-м нэс культурнэ Iофтхьэбзэ зэфэшъхьафыбэ тиреспубликэ щырагъэкIокIыщт.КIАРЭ Фатим.